توْکنیسم سیاستی و حکومت کادرلارینا اۆمود - اۆچونجو بؤلوم

آنا صحیفه یازارلار

توْکنیسم سیاستی و حکومت کادرلارینا اۆمود: اؤیردیلمیش چاره‌سیزلیک باغلامیندا علمی، سیاسی، آراشدیرما مقاله‌سی

«اۆچونجو بؤلوم»

گۆنئی آذربایجان ملی حرکاتینین پزشکیانین سئچیلمه‌سیندن سوْنرا ایران اسلام جمهورییتی طرفیندن یؤنلتمه سیاستینین تحلیلی:

(سیمبوْلیزم، اؤزونه-قاتما و قیرینتی چؤرک سیاستلری ،فانوْن و مئممی-نین اوْرتایا قوْیدوغو سؤمورگه‌دن خلاص نظریه‌لری، سلیگمانین ایره‌لی سۆردویو اؤیردیلمیش عاجزلیک و آشاغیلیق حیسی پسیخوْلوگییاسی باغلامیندا)

پزشکیانین غلبه‌سی و توْکنیسم سیاستی چرچیوه‌سینده تطبیق ائدیلن سیمبوْلیزم سیاستی:

مسعۇد پزشکیان، هر نه قدر تۆرک منشألی اوْلوب، زمان-زمان آنا دیلی و کیملیی ایله باغلی نسبتا مثبت مؤقعلر ایفاده ائتسه ده، همیشه ایران اسلام جمهورییتینین رسمی سیستمینین ایچینده فعالیت گؤسترمیش بیر فیگۇر اوْلوب. اوْنون اجراائدیجی گۆجون باشینا کئچمه‌سی، حاکمییت باخیمیندان گۆنئی آذربایجان توْپلومونا سیمبوْلیک بیر جواب اوْلدو.(دیل، کۆلتور و عمومیلیکده سؤمورگه‌چی سیاستلرده هئچ بیر اساسلی دَییشیکلیک ائدیلمه‌دن).

اگر مسئله‌نی یالنیز گۆنئی آذربایجان ملی حرکاتی چرچیوه‌سینده دَیرلندیرسک، ۱۴۰۳ (۲۰۲۵) پرزیدنت سئچکیلرینده پزشکیانین آدایلیغی و غلبه‌سی ایله ایران رژیمی، بۇ تۆرک اصیللی سیمبوْل واسیطه‌سیله آذربایجان تۆرکلرینین ملی طلبلرینی سیمبوْلیک و پسیخوْلوژی یوْللا اداره ائتمه‌یه چالیشدی. بۇ سیاستی اۇیقولاماقدا، «تۆرک توْپلومونون کوْللکتیو شعورونا خطاب ائتمک، کیملیک آلتی ایله «اؤزوموزدن بیری حاکمییتده‌دیر دۇیغوسو یاراتماق، سیاسی اشتراک حیسینی آرتیرماق، حاقسیزلیق و آیری-سئچکیلیکدن دوْغان مغلۇبیت دویغوسون آز دا اوْلسا یۇمشالتماق، و نهایت، ایران ملی بیرلیک دیسکۇرسونو گۆجلندیرمک، کیملیک چاتلاقلارینی اوْنارماق و جوغرافی ایران آنلاییشینا باغلیلیق حسینی دیرچلتمک» کیمی هدفلر گؤز اؤنونده ایدی . بئله‌لیکله ده، ایکینجیل وطنداش اوْلما دۇیغوسو، اؤزونو یاد حس ائتمه، و مرکزدن اۇزاق دۆشمه حسلری آرادان قالدیریلماغا چالیشیلدی.

توْکنیسم سیاستینین هدف آۇدیتوریاسی، بۇردا آذربایجان تۆرکلری و عمومیلیکده تۆرک توْپلومودور. داها قیسا دئسک، بۇ سیاستدن مقصد، الده رئال حۆقوقی قازانج و یا استرۇکتور دَییشیکلیی اوْلمادان، اوْنلارین اؤزلرینی سیستمه "عاید حس ائتمه‌لرینی" تامین ائتمکدیر. اؤزتجه دئسک، هدف بئله ایدی کی، آذربایجان تۆرکلری پزشکیانی "اؤز نامزدلری" کیمی قبۇل ائتسینلر، اوْنون حاکمییتده اوْلماسینی غۆرور حسی ایله مدافعه ائتسینلر،لاکن هئچ بیر اساسلی حۆقوقی و استرۇکتور دَییشیکلیی باش وئرمه‌سین. بۇنون نتیجه‌سینده، گۆنئی آذربایجانین رادیکال ملی حرکاتی، تدریجا پزشکیان و اطرافیندا فوْرمالاشان رفوْرمیست، سئچکی یؤنوملو تۆرک حرکاتینا چئوریله بیلردی . بئله‌لیکله‌ده ملی حرکت، حاکمییتین اداره ائده بیلجه‌یی بیر آخیما چئوریلمیش اوْلاردی.

۲. مسعۇد پزشکیان حکومتین (co-optation) اؤزونه-قاتما سیاستی باخیمیندان

پزشکیانین ایران پرزیدنتلی‌یینه سئچیلمه‌سی، ظاهرده خالق اراده‌سی ایله باش وئرمیش بیر حادیثه کیمی تقدیم اوْلونسا دا، اسلام جمهورییتی کنتکستینده بۇ، گئرچک دَییشیکلیکدن چوْخ، بیر سیرا ملی فعاللاری حاکیمییته قاتما استراتگیاسینین بیر حصّه‌سی ایدی.

ایران رژیمی پزشکیانی سئچمکله‌، یالنیز تۆرکلره قارشی داها ملایم و ائمپاتیک بیر گؤرونتو یاراتماغا چالیشمادی، هم‌ده گۆنئی آذربایجان ملی حرکاتیندا یئر آلان محافظه‌کار و اصلاحاتچی قانادلارا میدان وئره‌رک، بۇ حرکاتین بۆتوولویونو ضعیفلتمَیه چالیشدی.

اصلینده‌، بۇ اؤزونه-قاتما سیاستینین اساس هدفی آذربایجان ملی فعاللاریدیر. حاکمییت ملی حرکات داخیلینده بیر قطبلشمه یاراتماق ایستَه‌ییر. بئله کی، بیر طرف حاکیمییته اینتگراسییا اوْلموش، اوْنون دیلی ایله دانیشان و اؤزونو عاغیللی، سیاسی دۆشونجه‌لی کیمی تقدیم ائدنلر، باشقا طرف ایسه اموْسیونال، ایده‌آلیست، ایران اوْپوزیسیونونون تأثیرینه معرۇض قالمیش و بعضا حتی خَیانتکار کیمی دامغالانان کسیم اوْلسون. بۇ ایکیلیکله‌، حرکاتچیلار ایچینده پارچالانما یارادیلیر و نتیجه‌ده حرکاتین گۆجو ضعیفلدیلیر.

مقاله‌نین دیگر بولوملرینی بورادان اوخویا بیله‌ر سینیز:

• بیرینجی بولوم

• ایکینچی بولوم

• دوردونجو بولوم

• بئشینجی بولوم