توْکنیسم سیاستی و حکومت کادرلارینا اۆمود: اؤیردیلمیش چاره‌سیزلیک باغلامیندا علمی، سیاسی، آراشدیرما مقاله‌سی

«دؤردونجو بؤلوم»

پزشکیانین فعالیتی چؤرک قیرینتیسی سیاستی باخیمیندان:

چؤرک قیرینتیسی سیاستی (Bread Crumb Politics)، حاکمییتین اجتماعی ناراضیلیغی اۇجوز، سیموولیک، آما تأثیرسیز امتیازلارلا اداره ائتمه تاکتیکاسیدیر. بۇ سیاستده، اساس و استرکتور دییشیکلیکلردن یایینماق، اوْنون یئرینه خیردا امتیازلارلا، راضیلیق الده ائتمک مقصدی گۆدولور.

ایراندا و گۆنئی آذربایجاندا اصلاحاتلارین نتیجه‌سیز قالماسینین ان مهم سببلریندن بیری، سوْن اوْتوز ایلده‌، حاکمیت طرفیندن خالقین اعتیراض انرژیسینی بوْشالتماق اۆچون وئریلن اهمییتسیز، آما سیموولیک امتیازلار و بۇ امتیازلارین اصلاحاتچیلار طرفیندن شیشیردیله‌رک "اۇغور" کیمی تقدیم اوْلونماسی اوْلوب. البته‌، آشیری محافظه‌کارلار، هابئله ایرانچیلیق ایدئولوگییاسینی داشیان آشیری گروپلارین بئله امتیازلارا قارشی چیخماسی، بۇ بوْش و گؤرونتو خاراکترلی آددیملارین جاذبه‌سینی آرتیریر. شهریارین حیدربابایا سلام شعریندن بیر نئچه بندین اوْخونماسی، آذربایجان و تۆرکیه‌دن گلن دیپلماتیک هیئتله تۆرکجه سلاملاشما، باکینین فخری خیابانیندا پیشه‌ورینین آدینین چکیلمه‌سی، تراکتور فتبول کومانداسینین چمپیون اوْلماسی، تبریزده شاخسی مراسمینده سینه ورماق بئله‌، بۇ چؤرک قیرینتیسی سیاستینین نمونه لریدیر. بۇ و بۇنا بنزر بۆتون داورانیشلار، راضیلیق امضاسی آلماق اۆچون وئریلمیش چؤرک قیرینتیلاریدیر.

۵- پزشکیانین سئچیلمه‌سی - سؤمورگسیزلشدیرمه نظریه‌سی و بوْیون اَیمه پسیخوْلوگییاسی باخیمیندان:

فرانتز فانوْنون سؤمورگسیزلشدیرمه نظریه‌سینه اساساً، سؤمورگه‌چی رژیملر چوْخ واخت یئرلی ائلیتانی حاکمیت استروکتورونا داخیل ائده‌رک اساسلی اعتراضلاری نیتراللاشدیرماغا چالیشیرلار. بۇ باغلامدا پزشکیان «یئرلی امکداش» روْلونو اوْیناییر . اوْنون وظیفه‌سی ظلم سیستمینه داها انسانی و اصلاح ائدیله بیلن بیر سیما قازاندیرماقدیر.

بئله دۆشونولوردو کی، پرزیدنتلییه تۆرک منشألی بیر شخصین گلمه‌سی، تۆرکلرین حاکمیت سیستمی ایله داها چوْخ یاخینلیق حس ائتمه‌سینه‌، نتیجه‌ده بۇ سیستمی "اؤز سیستمی" کیمی قبۇل ائتمه‌سینه و مقاومتین ضعیفلمسینه، حتی اوْنون مدافعه‌سینه جهد گؤسترمه‌سینه یوْل آچاجاق.

یئنی سؤمورگه سیاستینین ان گۆجلو تاکتیکاسی، محض یئرلی قۆوه‌لردن استفاده ائدرک، آزادلیق ایستَین قۆوه‌لرین قارشیسینی آلماقدیر. نه قدر چوْخ یئرلی انسان حاکمیت استرۇکتورلاریندا یئر آلارسا، سؤمورگه آلتیندا اوْلان خالقین آزادلیق حرکاتلاری دا بیر اوْ قدر جاذبه‌سینی ایتیریر و سلاح‌سیزلاندیریلیر.

سومورگه‌ده یاشایان انسانلار اؤزلریندن اوْلان بیر شخصین سئچکی یوْلو ایله غالب گلمه‌سی ایله‌، اؤزلرینی غالب حس ائدیر، هَیجانلانیر، ایللرله چکیلن ملی آلچالدیلمانین قصاصینی آلدیغینی دۆشونور. طبیعی اوْلاراق، «ایرانشهری» دۆشونجه‌سینه صاحب بؤیوک بیر گروپۇن بۇ دۇروما دؤزومسوز یاناشماسی و رئاکسییاسی، بۇ سیمبوْلیک غلبه‌نین دادینی داها دا آرتیریر.

فانونون نظریه‌سینه گؤره، بۇ حال «سؤمورگه آلتینداکی انسانین کوْلونیزاتورلا پسیخوْلوژی عینی‌لشمه‌سی» حالینا بنزَییر (باخ: Fanon, Black Skin, White Masks, 1952) . امید وار ایدی کی، بعضی ملی فعاللار پزشکیانین پرزیدنتلی‌یینی بیر نوع غلبه کیمی قبۇل ائدیب، حرکاتین اساس مقصدلرینی، اوْنا دوْلایی یوْللا حواله ائده‌جکلر.

۵- اؤیرنیلمیش چاره‌سیزلیک و عاجزلیک پسیخوْلوگییاسی باخیمیندان:

ایرانین ایندیکی دۇروموندا ایللرله داوام ائدن باسقی و رپرسیا، انسانلاردا گئرچک دَییشیکلیک احتمالینا قارشی گۆجلو بیر اینامسیزلیق یارادیب. انسانلار آرتیق حاکمیت خارجینده فوْرمالاشان هئچ بیر حرکاتین ائتکیلی اوْلاجاغینا اینانمیرلار. اوْنلار اؤیردیلیب کی، هئچ بیر ایشه اؤزلری قرار وئره بیلمه‌زلر، هر هانسی دَییشیکلیک یالنیز حاکم طبقه‌نین اراده‌سی ایله ممکن‌دور.

حتی بعضیلری سئچکیلرده اشتراکین رژیمه لگیتیملیک قازاندیردیغینی بئله گؤرمزلیکدن گلیر.

بۇ منظره‌ده‌، اؤیرنیلمیش عاجزلیک پسیخوْلوگییاسینا اۇیغون اوْلاراق، آذربایجانلی بعضی مدنی فعاللار، بیر تۆرکون حاکمیت باشیندا اوْلماسی ایله‌، بیر تۆرلو سانرییا بنزر اییمسرلییه و یالانچی دینجلییه دۆشورلر. اوْنلار دۆشونورلر کی، حاکمییتین بعضی حصّه‌لری تۆرک خالقی اۆچون نسه ائتمه‌یه قرار وئریب.

بۇ ایچریدن گلن دَییشیکلیک اۆمیدلری، نتیجه‌ده انسانلاری گؤزلمه موْدونا کئچیریر، فعاللیغین یئرینی پاسسیولیک آلیر و بۇ دا جیدّی اعتراضلارین سؤنمه‌سینه سبب اوْلور.

مقاله‌نین دیگر بولوملرینی بوردان اوخویا بیله‌ر سینیز:

• بیرینجی بولوم
• ایکینجی بولوم
• اوچونجو بولوم
• بئشینجی بولوم