آمریکادا اونا گؤره چئوریلیش اولمور کی، واشینگتن‌دا آمریکا سفیرلیگی یوخدور.

بو سؤزلری آمریکاین ایراق‌داکی کئچمیش سفیری جون نقروپونته دئمیشدی.

ماراقلیدیر، دئییلمی؟ بونو اؤزونو ایفشا کیمی ده آنلاماق اولاردی، اما بیز او قدر ساده لؤح یاناشمایاق مسئله‌یه. دونیانی ایداره ائتمیی قارشیسینا مقصد قویان بیر دؤولتین بئله سهو بوراخاجاق سیاستچیسی اولا بیلمز، طبیعی کی، بو اولسا-اولسا، میدان اوخوماغین ان یومشاق فورماسیدیر.
ائله یاخین کئچمیشه نظر سالساق گؤرجییک کی، دئمک اولار، بوتون چئوریلیش یاشانمیش اؤلکه‌لرده آمریکا سفیرلیگی وار. اولسون کی، باشقا سفیرلیکلر ده وار، فرق ائتمز، اساس او کی، هر داشین آلتیندا آمئریکا سفیرلیکلرینین آیاق ایزلری مؤوجود.

اصلینده، «ماجرالارلا دولو آمریکا» ماهنی‌سینی اوخوماق فیکریم یوخدور. ایران ایسلام رسپوبلیکاسینا گتیرجکدیم سؤزومو. هه، ایران، جنوب قونشوموز. اؤلکه‌نین اوزرینه ائله بیر چتیر توتوبلار کی، هئچ اللهین بیر داملا یاغیشی دا دوشه بیلمیر یئره، قالدی کی هانسیسا سانکسییالار فایدا وئره. ائله تزه‌لیکجه ایسرایلله بیر آز سؤزلری چپ گلمیشدی، بو چپلیگی ده راکت ضربلریله دوزلتدیلر. اوکئانین او تاییندان دا ها ایللاه ائدیرلر بیر سفیرلیک آچالار، آلینمیر. «عرب بهاری» دالغاسی دا چاتا بیلمدی ایران ساحللرینه. ایندی لاپ آوارا قالیبلار، یقین کی، یئنی پلانلار اوزرینده ایشلر گئدیر. نه ائتسینلر آخی، ایچریده آداملاری یوخ تورکییه‌ده‌کی کیمی «گزی پارکی» اعتراضلاری یارادالار، سوسیال شبکه‌لردن ایستیفاده محدودیتی ده ایمکان وئرمیر کی، میللتی قیزیشدیریب تؤکسونلر کوچه‌لره.

اما دئیه‌سن، ایران حاکمیتینین آخیرینا بیر قیزجیغاز چیخاجاق. افقان اصیللی قیز بیر مدت ایران‌دا مهاجیر حیاتی یاشاییب، ایندیسه کانادادا مسکونلاشیب. اینستاگرام حسابینی «ندا یاسی» آدییلا ایستیفاده ائدیر و آرتیق بیر میلیونا یاخین ایزلییجیسی وار. اؤزو ده بوتون پایلاشیملاری فارسجا یازیر. دئمک اولار، مراجعتلرینین هامیسی ایرانداکی ایزلییجیلرینه عونوانلانیب. ویدئو-چارخلاریندا یاری چیلپاق دلیلیکلری، لاغلاغی دانیشیق اوصلوبو، ایران‌داکی مؤوجود سیستمله کوبودجا مزه‌له‌نمه‌سی میلیونا یاخین اینسانین رغبتینی قازانیب.

ایندی کیم دوشونه بیلر کی، بو قیز ائلجه ایله‌نجه خاطرینه هوققا چیخاردیر سوسیال شبکه‌ده؟ اونسوز دا مؤوجود رژیمین قاداغالاریندان جانا ییغیلان جنوب قونشولاریمیز، گونی‌لی سویداشلاریمیز بو جور وجسیز حیات یاشایا بیلن بیر قیزین اؤزگورلویونه حیران قالمایا بیلمزلر.

هر حال‌دا، بیر میلیون ایزلییجی کیفایت قدر جدی گؤستریجیدیر. بو حیران‌لیق نه ایله نتیجه‌لنه‌جک، بونو گله‌جک گؤستره‌جک. البته، دیگر سوسیال شبکه‌لردن سونرا اینستاگرام دا قاداغان ائدیلمه‌سه.

ندنسه ایچیمدن بیر سس بو سوسیال شبکه‌نین ده ایران‌دا سون گونلرینی یاشادیغینی دئییر.

یوخسا «آمریکا سفیرلیگی» ایدئیاسی داها آرزوولونان اولاجاق...