رمان و حئکایه یازدیغیمدا بعضی کاراکترلر ائله ذهنیمه ساپلانار کی، متن باشا چاتمیینجا او کاراکترلردن قورتولاجاغیم اولماز.

ألیمده یازدیغیم یئنی حئکایه‌ده‌کی چوبوقلو عنتیقه قوجا بویون منیم‌له برابر ورزش باشگاهینا گلدی. چوخ چالیشدیم اونو باشیمدان ائله‌ییب، آزاد ذهن ایله باشگاها گئدیم، آمما او باشیمدان أل چکمه‌دی کی چکمه‌دی. اوزه‌رینده قادینلار تایمی یازیلمیش پرده‌نی قیراغا چکیب، ایچری کئچیب- کئچمز عنتیقه قوجا قاشلارینی ییغیب دئدی: «بورداکیلارین قولاخلارینین پرده‌سی قالیندی؟»

دئدیم: «ورزشدن قولاق پرده‌سینه نه دخلی وار؟»

دئدی: «ساواش مئیدانیندا توپ- توفه‌یین بئله سسی چیخماز هاندا قالسین وردیش مئیدانی!»

دئدیم: «ورزش باشگاهلارینین قایداسی بئله‌دی. موسیقی سسی اوجا اولدوغوندا آدام دئییر بلکه بتردن ورزش ائله‌ییر.»

«هییییم» دئییب، منیم‌له برابر باشگاهین پیلله‌لریندن آشاغی ائندیک. رنگ به رنگ گئیینمیش قادینلاری گؤرجک یئنه سوروشدو: «بولار کوچه- خیاواندا گؤردویوموز همان لچک‌لری قادینلاردیلار یوخسا آیری یئردن گلمه‌دیلر؟»

دئدیم: «ائله همان لچکلی‌لردیلر آمما بوردا آیری یئردن گلمه کیمی گؤرونورلر.»

یئنه «هییییم» دئییب، چوبوغونو داماغیندان چیخاردیب، اومودسوز بیر حالدا دئدی: «زری خانیم افشارینان زینب پاشا هارا، بو آیری یئردن گلمه گؤرونن قادینلار هارا؟»

دئدیم: «آیری واختلارینان ایشیم یوخدی، باری ورزش سالونا گلنده باشیمدان أل چک. بئله سؤزلرله ذهنیمی ورزشدن چاشدیرسان آخی.»

دئدی: «من هئش بئله یئرلری تانییردیم؟ باشیم اؤز ایشیمه قال ایدی، منی بئلنچی یئره گتیرن سن اولدون دا. ایندی بیولوم منه دیل اوزونلوخ ائلیرسن؟»

هئچ بیلمه‌دیم عنتیقه قوجا نه واخت باشیمدان أل چکیب گئتدی. بیر آن گؤردوم ساعات بئش یاریمدیر، ورزش مشقی ده باشا چاتیب. مربی همیشه کی کیمی یورولمیاسیز یئرینه دئدی: «اؤلولریزین، امواتیزین حقینده صلوات...»

گؤره‌سن او عنتیقه قوجا باشیمدان اولماسایدی، بو سؤزه نه پولچوک بند ائلردی؟ یقین دئیردی او قولاغی کار ائله‌ین موسیقی هارا، اؤلولریزین....