آنا صحیفه یازارلار |
یوسیف وزیر چمنزمینلی سئودییم یازارلاردان بیریسیدیر.
سئوگی، محبت، اؤلوم، نیفرت، موختلیف جوتلوکلر و موختلیف موناسیبتلر اونون رومانلاریندا و حکایهلرینده اؤز عکسینی تاپیب. دوغما خالقینین تالعی یوسیفی عمرو بویو دوشوندورموش، او بو خالقین منشیینی، اوزاق زامانلارین قارانلیغیندا ایتن کؤکلرینی آراییب آختارمیش و رومانلاریندا اؤزونه مخصوص عکس ائتدیرمیشدیر. اونون "قان ایچینده" رومانی اون سکیزینجی اسیر قاراباغ خانلیغیندا باشوئرهن حادثهلری هم جمعی هم فردی شکیلده ماراقلی تصویر ائتمیشدیر. تاریخی حادثهلرین اینسانلارین فردی حیاتلارینا تأثیرینی اؤیرهنمک، منه داها ایلگینج اولور. بلکه ده فردی حیاتیمیز تاریخی حادثهلرین بیزه تحمیل ائتدیی سونوجلاریدیر. من یوسیف وزیری ادبیاتیمیزین ایلک تاریخی- فلسفی-میفیک رومانینی یازدیغینا گؤره چوخ سئویرم. "قیزلار بولاغی" رومانی ناغیل ایچینده ناغیللارا اوخشاییر. قهرمانین حیاتی قیزلار بولاغی اطرافیندا فیرلانیر. قیزلار بولاغی اطرافیندا؛ قوج طایفاسی ایله بیرگه، یئل اولوسو و ایسکیتلر آراسیندا یاشاماق تکجه ناغیل قهرمانینی یوخ بلکه اوخوجونو دا او اسرارلی تاریخه قایتاریر.
تاریخ
2019.02.06 / 15:21
|
مولف
ایبراهیم رشیدی
|