نیما یوشیج: پیشه‌وری بیر پیغمبر ایدی، افسوس کی آذربایجان اونون قدرینی بیلمه‌دی!

بؤیوک نیک‌اندیش، اوستاد شهریارین لاپ یاخین یولداشی و سیرداشی اولاراق، اوستاد شهریارلا بیرلیکده یاشادیغی 35 ایللیک یولداش‌لیق خاطیره‌لرینی "شهریارین خلوتینده" آدلی 4 جیلدلیک کیتاب‌لاریندا بیزلره پای وئرمیشدیر.

"شهریارلا بیرلیکده اؤزگه‌لشمکدن اؤزلشمه‌یه دوغرو" آدلی کیتابیمی یازدیغیم گون‌لر، حتی سونرالار دا، دؤنه‌لرله نیک‌اندیش جناب‌لارینین قوللوغونا چاتیب، کیتاب‌لاریندا یازمادیغی، داها دوغروسو یازا بیلمه‌دییی، خاطیره‌لر و موضوع‌لار حاققیندا سورغولاریمی اوندان سوروشاردیم.

بیر گون نیک‌اندیش جناب‌لارینا دئدیم: "اوستاد شهریارین ایستر شعرلرینده، ایسترسه دانیشیق‌لاریندا هئچ زامان آچیقجا پیشه‌وری‌نین آدینا راست گلمه‌میشم. آنجاق، اونون بیر پارا شعرلرینین آلت قاتیندا پیشه‌وری‌نین باشلادیغی اولای‌لارین ایزلرینی گؤرمکده‌یم. سیز بیر زامان اوستاد شهریاردان "تهران و تهرانی" آدلی شعرینی نئجه و نه اوچون یازماسی حاققیندا سوروشموشدونوز، او دا سیزه وئردییی جوابیندا "آذربایجان دموکرات فیرقه‌سی"-ندن آد آپارمیشدی. ایستیرم گؤرم بو اوزون ایل‌لر سوره‌سینده کی اوستادین یانیندایدینیز، اوستادین دیلیجه پیشه‌وری حاققیندا بیر سؤز ائشیتدینیزمی؟ یا اولدو کی باشقاسی پیشه‌وری حاققیندا بیر سؤز دئیه و اوستاد تپکی گؤستره؟!"

نیک‌اندیش جواب وئردی: "بیر گون بانک‌دایدیم. اوستاد شهریار منه زنگ آچیب دئدی: ایشدن چیخدیقدا گل بیزه، نیما یوشیج گلیب بورا...

اوستادین ائوینه گیردیییمده گؤردوم شهریارلا نیما بیربیرلرینه جان دئییب، جان ائشیدیرلر. سؤز آراسی تهران‌دا اولدوقلاری گون‌لریندن و تهرانلی شاعیرلرین کؤتو داورانیش‌لاریندان دانیشدیلار. بیردن نیما یوشیج هیجانلاناراق شهریارا دئدی: شهریارجان، سنین تبریزین وار ایدی، دوردون گلدین. منیم هارام وار ایدی باش گؤتورب گئدم؟

بو سؤز شهریارا چوخ تأثیر ائله‌دی و شهریار بیر آن سوسدوقدان سونرا دئدی: نیماجان، من پیشه‌ورینی یاخیندان گؤرمه‌میشدیم. دموکرات‌لارین حوکومتینده ده، من تهران‌دایدیم. سن رضاخانین زیندانیندا پیشه‌وری‌نی گؤرموشدون. او نئجه آدام ایدی؟!

نیک‌اندیش دئییر، نیما بو سورغونو ائشیتدییینده اوچ سئری سوروشدو: شهریارجان دوزونو دئییم؟!

شهریار دا هر اوچ سئری دئدی: هن دا نیماجان، ایستیرم گؤروم او نجور آدام ایدی.

سونوجدا نیما یوشیج دئدی: شهریارجان، پیشه‌وری بیر پیغمبر ایدی، افسوس کی آذربایجان اونون قدرینی بیلمه‌دی!

ی س: نیک‌اندیش جناب‌لاری ایله ایکی دؤنه گؤرونتولو دانیشیق آپارمیشام. بو خاطیره ده، او دانیشیق‌لارین بیرینده اونون دیلیجه نقل اولوبدور. قیسمت اولسا، بیر گون، او گؤرونتولو دانیشیق‌لاری یاییملایاجاغام.