طالعیمیز ایله باغلی سورونولار یاشیردی . نئجه اولاجاغینی بیلمیردی. هر گون بئینینده مینلر فیکیر دولاشیردی. هارایا عایید اولدوغونو بیلمه دن یئنی بیر دونیا دوزه نی گرکدیگینی دوشونوردو. ایلار اولاردی بو سللولدا ایدی. بیر چوخ اینسان گلیب گئتمیشدی یانینا. سوچو نه ایدی بیلیرسینیز می؟ یاشادیغی اؤلکه ده میللیتینین حاققینی ساوونماق اوچون بیر اولوشوم قورماق ایستیردی. میللتینی تمثیل ائتمک ایستیردی حاقسیزلیغا قارشی. آما اونون بو ایسته یی ایللرجه عؤمرونون زینداندا کئچمه سینه ندن اولموشدو.

و نه غریبه دیر یالاندان میللتین سسی اولدوغونو گؤسترن یالانجیلارین شکیللری ایله شهرلر دولو ایدی. بلکه بیر چوخ اینسا ن اونون آدینی بئله بیلمیردی. آما او بوتون بونلارا باخمایاراق آزربایجانا اولان اینامی اوچون دیره نیردی. بلکه او دا دؤولتین اونا وئردیگی اؤنریلری قبول ائتسه ایدی ایندی او دا او یالانجیلارین مجلیسینده اوتوراجاقدی. آما بیلیردی کی او زامان او اؤزونو و میللی مجادله سینی ساتمیش اولاجاقدی.

ایچینده دوشونوردو. بیزیم دوشمنیمیز کیمدی دئییه؟ بونون دوشونمک اوچون چوخ زامانی وار ایدی. خالقینین سعادتی هاردا ایدی و ایندی خالق هارا گئدیردی؟ ندن میللت گئرچک دوشمنی اونودوب اؤزونه یالانچی بیر دوشمن یارادیب و اونون دالیسیجا گئدیردی؟ ندن او سؤزده میللت وکیللری سککیز ایل بویونجا بیر سفر اونو گؤرمه یه گلمه دی؟ ندن هئچ بیر زامان اونون آدینی دیله گتیرمه دیلر؟ یوخسا اونون آدینی یاساق می ایدی؟

بوتون بو دوشونجه لری هردن بیر ده اولسا قلمه آلیردی آما کیمسه اونو انلامیردی. توپلوم هیجان آختاریردی . بعضن بیر یالانچی سردارین اؤلومو ایله هیجانلانیردیلار بعضن ده یالانچی سئچگیلرین هیجانی.