یوخاری

«طوفانلی تبریز» - بئشینجی بؤلوم

آنا صحیفه یازارلار
12 Punto 14 Punto 16 Punto 18 Punto

تورکجه‌یه چئویردی: سوسن نواده‌رضی

خالقین ائوینه گئدنده، ننه‌لییی پالتار یوواندا، اونا کؤمک ائتمه‌سی، تولومبا ووروب بالاجا دولچالاردا سو گتیرمه‌سی لاپ یاخشی یادینا گلیر.

او گوندن حوسئن، دیری قالماق اوچون ایشله‌‌مه‌سی گرکدیینی اؤیرنمیشدی. سریه ننه اونا تاپشیرمیشدی کی، ائو یییه‌لری‌نین اوشاق‌لاری اونونلا باشباشا قویسالار، اونو اینجیتسه‌لر، حتتا کؤتک وورسالار دا، او عوض آچمامالی دیر، چونکی چؤرکدن دوشر آدام.
ایشلمک، کؤتک یئمک، عوض آچماماق حتتا جینقیرینی بیله چیخارتماماق، حوسئن اوچون بیر نؤوع آلیشقانلیغا، گؤرئوینی یئرینه گتیرمه‌یه دؤنموشدو. ائو یییه‌لری‌نین اوشاق‌لاری اونو دؤوه‌نده، او هئچ اعتراض ائتمه‌دن، عوض آچماغی دوشونمه‌دن، گئدیب بیر گوشه‌ده دوراردی. اونلارا باخاردی. اونلار بئله گومان ائدردیلر کی حوسئن گولور، کؤتک یئمکدن خوشو گلیر. اونا گؤره داها دا شیرنیشیب اونا دولاشاردیلار. سونرا اونون دینمزلیینی گوروب گولمک‌لری توتاردی. حوسئنین بو داورانیشیندان بعضی اوشاقلار خوشلاناردیلار. اونونلا آرخاداش اولاردیلار. آنجاق بو آرخاداشلیغین بیر اوجو ائله شوخلوغا، میرتا، کؤته‌یه‌زنلیغا گئدیب چیخاردی!

حوسئن گونوگوندن بوی آتیردی، بؤیویوب گوجله‌نیب، خوش هیکل اولوردو. اونونلا یاشید اولانلار دا اونونلا بیرگه بؤیویوردولر. آنجاق اونلاردان هئچ بیریسی، نه بازو-بیله‌کده نه ده بوی- بوخوندا حوسئنه چاتمازدیلار.

آما گئنه ده، گوجلولویونه رغمن، هئچواخت اوشاق‌لاری دؤومزدی. اوشاق‌لارلا میرتداشیب ، گوله‌شیب دالاشماق حوسئن اوچون بیر اویون، بیر ایلنجه ساییلیردی. او بونا آلیشمیشدی، بونو سئویر بوندا لذت آلیردی.

یولدان گئچن‌لر، بیر چوخ واخت، گؤرردیلر خیابانین یا کوچه‌نین بیر گوشه‌سینده نئچه اوغلان اوشاغی بیر بوینو یوغون یئنی‌یئتمه ایله ال‌به‌یاخا گوله‌شیر زوتداشیرلار. اول ائله بیلیردیلر ساواشیب بوغوشورلار، و آراچیلیق ائتمک ایسته‌ییردیلر. سونرا یاخین‌لاشینجا تعججوب ائدیردیلر چونکی گؤروردولر اونلار یامان- یوغوز یئرینه بیر- بیرینه بند اولوب میرتداشیر گولورلر.

اوشاق‌لار نه قدر ده حوسئنی اینجیتسه‌یدیلر گئنه ده او حیرص‌لنمزدی. محلله اوشاق‌لاری‌نین بیریسینه زور دئین یا دا ظولم ائله‌‌ین اولسایدی، یا کیمیسی قولدورجاسینا بیری‌نین حاققینا ال‌اوزونلوق ائتسه‌یدی، او زامان حوسئن سرت‌لشردی، همیشه‌کی جیلدیندن چیخاردی، گولوش‌لری آجیلاشاردی. حریفی‌نین ساواشینا گئدن پهلوان‌لار کیمی یاخینا گلردی. کؤکسونو گه‌ریب، زور دئین ظالیمین قاباغیندا دوراردی. هئچ نه دئمزدی. آنجاق اود پوسکورن باخیش لاری‌یلا کیم ایله طرف اولدوغونو او آداما قاندیراردی. طرف ده کیم اولور اولسون، بو حوسئنین او حمیل، صبیرلی، شوخلوچول حوسئن بیزوو اولمادیغینی باشا دوشردی. گؤرردی کی، او ایندی بیر اؤکوز کیمی یومولوب بودارلاماغا سازلاشیر. اودور کی، طرف ال آیاغینی ییغیشدیریب سوزولوب گئدردی. حوسئن بیر ایکی یول بو جور زور دئین شرور اوشاق‌لاری ادب ائله‌میشدی، بونا گوره ده اوشاق‌لار اونو چوخ سئوردیلر. اؤزل‌لیک‌له ده کیمسه‌نین حاققینا ال اوزاتمایان ال‌- آیاق‌سیز ضعیف اوشاق‌لار. حوسئن، اونلار اوچون گووه‌نیله‌جک بیر دایاق، گوجلو بیر آرخاداش ساییلیردی زور دئین شرور اوشاق‌لارا قارشی‌.

حوسئنین چوخ لذت آلدیغی ایلنجه‌لریندن بیری بو ایدی کی، هر سحر، هله ایشه چاغیریلمادان، گلیب مینه‌ججیم خیابانی‌نین شرقی طرفینده، موصطافا مسجیدی‌نین گوذریندن آشاغا، شمس توخونما کرخاناسی‌نین یاخین‌لیغیندا دوروب گؤزله‌یردی سرهنگ غلامحسین شیبانی –هاوا آلای کوموتانی- گلنده بو دا اونا سلام وئرردی. سرهنگ هر گون آت ایله ایشینه گئدردی. حوسئن سرهنگ شیبانی-دن چوخ خوشو گلردی. او چوخ مهریبان و نزاکتلی ایدی. اونون گؤزونده سرهنگ شیبانی، آغ آتین بئلنده یاخیشیقلی اندامی ایله، ائشمه بوغ‌لاری ایله، سورمه‌ای رنگده کاسکئت و شالواری ایله، قارا مئشین کوتو ایله، و اوزون پارلاق چکمه‌لری ایله، تر-تمیز و طراوتلی اوزو ایله، بیر قهرمان کیمی گوزوکردی. او حوسئنی گؤرونجه اونا گولومسه‌یردی و حوسئنین سلامینا جواب اولاراق دئیردی:
-یاخشی‌سان حوسئن آغا؟ خوشسان؟

حوسئن جواب وئرردی:

-بلی جناب سرهنگ، مرحمتیز آرتیق!

-اؤزونه یاخشی باخ جوان! هله‌لیک!

حوسئن باخیشی‌ایله سرهنگی مینه‌ججیم کورپوسونه کیمی یولا سالاردی. سونرا قولاق یاتیرداردی، بیر ساعات سونرا اوچاغین موتورونون سسی چیخینجا، حوسئن باغیراردی:

-سرهنگ اوچاغی‌یلا گئتدی گؤیه!

سونرا اوجادان- اوجادان گولوب هارای چکه‌رک دئیردی:

-آی اللاه، هاچان اولار بیز ده او اوجالارا گئده‌بیلک؟

داوامی وار

تاریخ
2020.04.03 / 20:44
مولف
سعید منیری
شرح لر
دیگر خبرلر

نه آغلارسان، نه سیزلارسان، بیر دردی بئش اولان کؤنلوم...

تبریز دلیلری بیزی اؤزباشینا بوراخدی... – تبریزلی یازار

تبریزلیلره آچیق مکتوب: او کیشی کیمدیر؟

هیمنیمیزه غضبیمیز واردی، میزیلدانیردیق…

ارمنی تعصبو چکه‌ن «بایقوش» آذربایجانلیلار

ارمنیلر بو دعوتی قبول ائتمیرلرسه…

فاجعه اؤنوندییک: رژیمدن حاقیمیزی زورلا آلمالیییق!

سیز ۴۰ میلیونو اونوتموسوز – بایرامینیز مبارک

ارمنیلرین تهدید ائتدیی لو عسگروو وفات ائتدی

سلیمانی‌دن باکییا گؤره تهرانا سنساسیون اتهاملار

خبر خطّی
Axar.az'da reklam Bağla
Reklam
Bize yazin Bağla