(بیرآز طنز، بیرآز گرچک)

کورونا سالقینی باشلانقیجدا سوفوکلوس-ون اویون اثرلری کیمی تام بیر تراژدی کیمی گؤرونمکده ایدی. بو سالدیرقان ویروس، اینسان‌لارین، آلین‌یازی‌لارینین قارشیسیندا، نه قدر الی‌-قولو باغلی هابئله باجاریقسیز اولدوقلارینی گؤسترمکده‌ایدی. آنجاق، بو آجیماسیز اویون بیردن بیره مولیئر-ین اویون اثرلرینه اوخشادی! کمدی اولدو! تام کمدی دئمک اولماسا دا، ائله مولیئرین اثرلرینه تای کمدی ایله تراژدینی بیرلشدیردی.

کورونا قورخوسو هامینین اوره‌یینی چیرپینتییا سالمیشدی! هامی چکینه-چکینه، قورخا-قورخا کورونادان دانیشماقدایدی؛ دئدیییم کیمی تام بیر تراژدی یاشانماقدایدی. آنجاق، بیردن بیره "جمهوری اسلامی"نین بؤیوک باش‌لاری دا "جماعت‌دن آیری دوشمه‌سینلر" دئیه، کورونا توتماغا باشلادیلار. ایشین کومیک اوزو ده ائله بوردان باشلاندی!

او گونه دک، کورونا هئچ کیمه رحم ائتمه‌میشدی. بیرینه سالدیرماقدا او آغ-یاخا می‌دیر، یوخسا قارا-یاخا می‌دیر؟ دئیه، سوروشمامیشدی. حتی اورادا – بورادا کورونانی "دئموکرات بیر ویروس" آدلاندیرانلار دا اولموشدو. آنجاق، بیر چوخ اولای‌لار کیمی کورونا دا ایرانا آیاق باسدیقدان سونرا، ائله بیل، دَییشدی!

یوخسول‌لاری اؤلدورن کورونا ایلک باشدا بئش – اون "بؤیوک باش"ی اؤلدوردویسه ده، داها سونرا بو ایشدن چکیندی! البته، بو آرادا بؤیوک‌باشلار کورونا توتماغا ادامه وئردیلر! آنجاق، نه‌دنسه اونلارین اؤلمه‌لری دوردورولدو! آرتیق، کورونانین گوجو "علی اکبر ولایتی" کیمی جانسیز هابئله گوجسوز بیر وارلیغا دا چاتمادی!

ایندی یا کورونا "دئموکرات بیر ویروس" دئییل! یا ایران‌ کیمی بیر اؤلکه‌ده دئموکرات اولماغین نه قدر آغیر هزینه‌لی اولدوغونو اونا آنلاتمیشلار! او دا بیردن-بیره اویانمیش و "ولایتمدار" اولموش‌دور!

بلکه ده سورون هئچ کورونادا دئییل! بلکه ده، کورونا ائله همن کورونادیر آما کورونا توتانلار یالان دانیشیرلار. سؤزون دوزونو دئسم، بلکه ده ایران بؤیوک‌باش‌لاری هئچ کورونا توتمامیشلار. فقط جماعته روحیه وئرمک اوچون یالاندان "بیز ده کورونا توتدوق و توختادیق" اویونو یولا سالمیشلار!

البته، بو آرادا، بیر دوقتور دا ادعا ائله‌میشدیر کی بیرچوخ کورونا داواسی ایرانا گتیریلمیش، آما قارایاخا میللتین الینه چاتمامیش و یالنیز "بؤیوک باش‌لارین" درمانی اوچون قوللانیلماقدادیر!

بو سؤزلرین هانسی دوز دور؟ هانسی یالان؟ من ده بیلمیرم. یالنیز بیر زادی بیلیرم: کورونا کورونا دیر! نه ولایتمداردیر، نه ده دئموکرات! آنجاق، اؤلدوردوکلرینین چوخو قارایاخا میللتدنسه، بو ایشین ایچینده بیر ایش واردیر!

ساغ قالین!