Axar.az
یوخاری


یادیما گلمیر...

آنا صحیفه یازارلار
12 Punto 14 Punto 16 Punto 18 Punto

تزه یازیلاریمی جیریب تؤکموشدوم اوتاغین بوجاغینداکی بوش دولا. کئچن گئجه چیغیر باغیر سالمیش‌ایمیشام کی «سن اؤزونله نه فیکیر ائله‌ییرسن بونلاری یازاندا؟» طاهیر سونرالاردا دئمیشدی.

_ائوه یئتیشجک، آراغی دایادین آغزیوا. سونرا دا موطالعه اوتاغینی پوخا چکدین.

صاباحیسی دوراندا «اده طاهیر، تزه اؤیکومو سن جیریبسان؟» دئیه‌ سوروشدوم.

یوخودا او بؤیور بو بؤیور اولوب، میزیلدادی: «سفئحلمه اؤز شبئهیندی! ائوه گیرمه‌میش او مئراتی چکرسن باشیوا هئله اولار».

فیکیرلشه‌بیلمیردیم. اوره‌ییم آغزیما گلیردی. من توالته یئتیشمه‌میش، اوره‌ییم آغزیما یئتیشدی. ایکی الیمی توتدوم آغزیمین قاباغینا. بیر نئچه سئری قایتاریب، طاهیرین یانینا قاییتدیم.

_آخی من بونلاری نییه جیردیم کی؟

دورموشدو قاپی‌نین آغزیندا. قاش‌لاری قول‌لارینا تای بیربیرینه دویونله‌نمیشدی.

_سحر چاغی دا قوسماق سسی‌له قویما یاتاق.

قاییتدی اوتاغینا. دالیسیجان گئتدیم: «طاهیر داها نه دئدیم؟ نییه جیردیم آخی؟»

_نه بیلیم نییه جیردین؟ همشه عاغلین باشیندا دی کی سایری واخت باشیندا اولا؟ یئری گئت جیریلمیش تیکه‌لرینه باخ بلکه بیر شئی‌لر اوخوندو.

اوتاغا گئدیب، دولو قویدوم قاباغیما. الیمی ایچینه سالیب، کاغیذلاری سیخیم سیخیم تؤکدوم چؤله. آرادا توپورجه ده‌ییردی الیمه. ایسلانان‌لارین جؤهری یاییلمیشدی، قورو تیکه‌لر ده اوخونماق اوچون چوخ بالاجا ایدیلار. هئچ بارماق بندی بویدا دا اولمازدی.

طاهیر گئیینمیشدی. «من گئدیرم چؤله» دئدی. «سن کی قویمادین کیلاس اولمایان گون یاتام. اؤزونده اوتور تزه‌دن یازماغا چالیش؛ سنون کی الوندن گلیر».

باشیم خیردا کاغیذلارا قال اولدو. قاپی‌نین اؤرتولمه‌ سسی‌نی بئله ائشیتمه‌دیم. هئچ بیر کلمه ده اوخونموردو. تکجه گؤی خودکارلا یازدیغیم بیلینیردی.

طاهیر کیلاسین قورتاریب ائوه قایدانا قده‌ر بوش یئره کاغیذپارچالاری‌ایله اللشدیم. ایچه‌ری گیریب منی عینی یئرده گؤردویونده، آخماق‌لارا باخان قیافه‌ایله اوزومه زیللندی: « گده نه‌یه اوتوروب قالیبسان اوردا؟ هئچ ائله‌بیل عؤمرونون هاممیسینی یازماغا چالیشماییب! آیری صفحه گؤتور تزه‌دن یاز دای!»

_نه یازدیغیم یادیما گلمیر طاهیر.

_آدام دا اؤز یازدیغی یادیندان چیخار؟ جومله‌لری ده عینی اولماغا گرک‌لی ده‌ییل، گئنه هئچ اولماسا هانکی ماجرانی یازدیغیوی کی بیلیرسن.

دینمه‌دیم. او دا پالتارلارینی دییشمه‌یه گئتدی.
کاغیذپارالاری ییغیشدیریب، اولده آتدیغیم دولون ایچینه قیتاردیم.

گؤی خودکاری الیمه آلیب، تزه صفحه آچدیم قاباغیما. یازدیم: گئجه‌لرین بیرینده طاهیر کئفلی کئفلی ائوه گلدیکدن سونرا تزه یازدیغیم اؤیکومو جیردی. من اولایدان خبریم اولمادان، هفته سونو آناملا آتامی گؤرمه‌یه گئتدیم ائویمیزه. نئچه گون قالیب اورمویا قیتدیقدان سونرا، بیر گون سحر چاغی یونورسیته‌یه گئتمه‌میش گؤزوم دوشدو جیریلمیش اؤیکومه.

بوردا ساخلاییب، دفتری قاتلادیم قویدوم قیراغا. فیکریمده وار ایدی اوندان سونرا دا منیمله طاهیرین آراسیندا اوز وئرن داوانی یازام.

او گئجه چتین کئچدی. ساعات‌لارجا گؤزومه یوخو گئتمدی. یئریمدن قالخیب، آشپازخانایا گئتدیم. بیر لیوان سویوق سویو باشیما چکدیم. یئریمه قایداندا موطالعه اوتاغیندان گؤرونن ایشیغا گؤزوم دوشدو. اوتاغین اؤز چیراغی سؤنولو ایدی و ائله نظره گلیردی کی بالاجا بیر قووه چیراغی یانیر. آددیم‌لاریمی یاواشیدیب، قاپی‌سینا یاخینلاشدیم. سس گلمیردی. موطالیعه چیراغین سؤندورمه‌یینی اونوتموشام دئیه، قاپی‌نی آچدیم. طاهیر الینده‌کی کاغیذی سورعتله دالینا آپاریب «زهریم یاریلدی!» دئدی. اؤزونو ایتیرمیشدی: «گئجه یاریسی نه‌یه قاپی‌نی بیردن آچیب ایچری کئچیسن؟» آجیغیما گلدی. «اؤز موطالعه اوتاغیم دی» دئدیم. «گؤلوم ایسته‌سه گئجه یاریسی لاپ قاپی‌سینی سیندیریب ایچری کئچه‌رم. الینده نوار؟»

_ائوده بیرلیکده قالیریق. بو اوتاقدا منیم ده حاققیم وار.
_ایستیرسن گئجه‌ یاریسی گیزلیجه گلیم تپیلیم سنین اوتاغینا، دئییم منیم ده حاققیم وار؟ تئز اول الینده کی کاغیذی منه وئر.

کاغیذی اوزونون قاباغینا توتوب دئدی: «بونو ایستیرسن؟»
_هه، وئر منه.

«گل آپار» دئیه‌ن آندا جیبیندن فنده‌ی چیخاردیب، کاغیذین آلتینا توتدو. شیغیدیم اوستونه. کاغیذین تکجه قولاغی الیمه گلدی. قالانی گؤزومون قاباغیندا اوت آلدی. طاهیر گولمه‌یه باشلادی. بیر الیمله یاخاسیندان یاپیشیب، او بیری الیمله انگینه آغیر بیر یوموروق زوپادیم. جانی یوخ ایدی. گیجه‌لیب یئره دوشدو.

باشیمی توولادیم. قاپی‌نین قاباغیندا ایدیم. احتیاط‌لا آچیب ایچری کئچدیم. موطالعه چیراغیم یانیلی قالمیشدی. اوتاغین هر یئرینه باخدیم. هر شئی اؤز یئرینده ایدی. چیراغی سؤندوروب، یئریمه قاییتدیم.

سحر قالخدیغیمدا، طاهیر من‌دن ارکن دوروب گئتمیشدی. تزه اؤیکومو کشوودان چیخارتدیم. اؤزوم و طاهیرین آراسیندا اوز وئره‌بیلن داوادا قالمیشدیم. یازدیم.

بیرده آرتیردیم کی گئجه‌لرین بیری اوتاغیما گیریب یازی‌لاریمی تزه‌دن اوتلاماق ایسته‌ییردی؛ قاباغینی آلماسایدیم. دفتری قاتلاییب، ساعاتا باخدیم. من ده حاضیرلانیب یونورسیته‌یه گئتمه‌لی ایدیم.
کیلاس باشیندا کاغیذ اوسته بیر شئی‌لر چکمه‌یه باشلادیم. یولداشیم دیرسه‌یینی ووردو بؤیرومه. او پیس‌میریتدی اوستاد ایدی. دانیشاندا گؤزوموز چکیلمه‌ملی ایدی صیفتیندن. بؤیروم بیر ده دئشیلدی: «سنه باخیر». کیلاسدا هر کیم ائشیده‌بیلن بیر سسله دئدیم: «باخسین!» گؤزله‌دییم کیمی اوستاد اوزومه حیرصله باخیب امر ائلدی: «دور ایاغا». «راحتم» دئدیم. اوشاق‌لار گولوشدولر.
_من ناراحاتام. دو چیخ ائشییه. بیر ده منیم کیلاسیمدا ایلشمه.
یئریمدن قالخیب، قاپی‌یا دوغرو گئتدیم. کیفیم قالمیشدی. قاپی‌یا یئتیشمه‌میش قاییدیب، گؤتوردوم. الیمدن بوشلاندی. ایچینده‌کی کارکاغیذلار کیلاسین اورتاسینا سپه‌لندی. پارا قالان اؤیکوم ایدی. توزلو کاغیذلاری ییغیب، چیخدیم سالونا. یازماغا چالیشدیم. ایشی قورتارمالی ایدیم. طاهیری اؤلدوردوم‌. جنازه‌سینی ده حیطین لکینده باستیردیم. ایلک اؤیکومون جومله‌لری یادیما دوشمه‌یه باشلادی.
کیلاسین قاپی‌سی آچیلدی. یولداشیمین باشی گؤرسندی: «طاهیر، اوستاد دئییر کیلاسا قایدا‌بیلرسن».

تاریخ
2020.05.18 / 09:20
مولف
Axar.az
شرح لر
دیگر خبرلر

زمانی که ‍ نچروان بارزانی به کلیم الله توحدی بزرگداشت می‌گیرد!

چه خوشبخت است این تبریز...

برگی از تاریخ حزب توده در پس از انقلاب

وحشت بیجا از آذربایجان، مانع استفاده از ظرفیتهایش و ظرفیتهای قفقاز

تهرانداکی خاطیره لریمدن دوقوزونجو بؤلوم

اوز مقدراتیمی و گله‌جه‌ییمی اسیر و ظولمه معروض قالمیش بیر میللت اولاراق اله آلام!

تو بچه بیار، من می‌فروشمش!

آیا دکتر مصدق موافق دولت‌های خودمختار بود؟

چگونه ذهنی تحلیل‌گر داشته باشیم؟

آذربایجان گنجلییی

خبر خطّی
 
Axar.az'da reklam Bağla
Reklam
Bize yazin Bağla