دوزلتمه یامسیلامالارین بیر نئچه نوعو واردیر کی، آشاغیداکیلاردان عبارتدیر.
الف- "ایلتی٤" شکیلچیسیله دوزه لیب ایشلننلر. مثلا: اینیلتی- پیچیلتی- پیریلتی- خیریلتی- گورولتو- خورولتو- فیسیلتی- جیریلتی..
دیلیمیزین بعضی لهجه لرینده "ایلتی" شکیلچیسی "ایرتی" شکلینده ایشلنیر.مثلا "هنیرتی" سؤزونده اولدوغو کیمی.
ب- دوزلتمه یامسیلامالارین بؤیوک بیر قسمی "ایلدا٤" شکیلچیسیله دوزه لیر کی، اساسا فعل کیمی ایشلنیر. مثلا: هیققیلداما- هیریلداما- قاققیلداما- خیریلداما. تربیه سیز اوشاق کیمی بوش- بوشونا هیریلداما / صابر/
مرکب یامسیلامالار
مرکب یامسیلامالارین ایکی سؤزدن و اساسا بیر ساده یامسیلامانین تکراریندان دوزه لیر. مثلا: شیر- شیر، شاپ-شاپ، تاپ- توپ، شاراپ- شوروپ، شیرتا- شیرت...
مرکب یامسیلامالارین آراسیندا تیره قویولور. بو وقته قدر قراماتیکا کتابلاریندا مرکب یامسیلامالار مرکب اسم، یا دا مرکب ظرفلر سیراسینا داخیل ائدیلمیشدیر.
الف- اسم حساب اولونان مرکب یامسیلامالارا مثال: کیبریتی چکدی، اوتاغدا پارتا- پارت /مبتدا- اسم/ قوپدو.
یاز کی، گلدی دام ده لیندی، شاپ پا شاپ دوشدو ایشه، /مبتدا- اسم/ حیرصلنیب چیخدیم داما، نودانا ووردوم بیر تپیک./ معجز/
ب- طرزی حرکت ظرفی اولان مرکب یامسیلامالار. مثال: میرت- میرت اوخوماقدان، کیشی، بیرقان کی، پول اولماز. /نئجه اوخوماقدان؟/
ککلیک گولر ایدی داغدا قاه- قاه/ خیاتی./ نئجه گولردی؟/