قوهوملوق ترمینلری

تبریز دیالکتینده قان قوهوملوقونا عاید ایشلنن ترمینلرین بیر قیسمی آذربایجان ادبی دیلی ایله عینییت تشکیل ائتدییی حالدا، دیگر قیسمینین ایلکین فورما و معناسیباشقا لحجه لر ایله مقایسه ده اوزه چیخیر.

آتا//بابا// ده ده// آککا. تبریز دیالئکتینده آتا سؤزو ایله یاناشی گؤستردیییمیز افاده لری ده ایشلنیر.

نه نه// آبا. تبریز دیالئکتینده نه نه، آبا و مامان سؤزلری آنا معناسیندا ایشلنیر. آبا سؤزو قدیم تاریخه مالکدیر. آبا سؤزونون صفوی لر دؤورونده تبریز دیالئکتینده و فارس دیلینده ایشلنمه سینه ده راست گلینیر.

بؤیوک بابا// آ بابا "آقابابا"// آجان "آقاجان". بو سؤزلر تبریز دیالئکتینده بابا یئرینده ایشلنیر. بؤیوک بابا - آتانین آتاسینا، آ بابا، آجان ایسه آنانین آناسینا دئییلیر.

بؤیوک نه نه. تبریز دیالئکتینده ایستر آتانین، ایسترسه ده آنانین آناسینا دئییلیر.

قردش//داداش، آ داداش "آقاداداش" تبریز دیالئکتینده قردش سؤزو ایله برابر داداش ایفاده سی ده مشاهده اولونور. بؤیوک قارداشا ایسه آ داداش دئییلیر.

عممه. تبریز دیالئکتینده عممه سؤزونه بیبی معناسیندا تصادف ائدیلیر.

اننه. بو سؤز تبریز دیالئکتینین قره ملیک لهجه سینده بؤیوک باجی بیرلشمه سینین سینونیمی کیمی چیخیش ائدیر.

نوه، نتیجه، کؤتوجه، نبیبه، یادیجا. تبریز دیالئکتینده مشاهده اولونان نبیبه افاده سی عرب سؤزو اولوب، اؤز اصلینه اویغون کؤتوجه نین اؤولادی، نتیجه نین نوه سی معناسینی بیلدیریر. یادیجا و ایتیجه سؤزلری مورفولوژی یوللا عمله گلمیشدیر. یادیجا نبیبه نین اؤولادی، کؤتوجه نین نوه سی، ایتیجه ایسه یادیجانین اؤولادی، نبیبه نین نوه سی معناسینی بیلدیریر.