اردبیل‌ده هاوا سرین‌دی. آنجاق تهراندا ایسه هاوا چوخ ایستی‌دی.

بو جمله‌ده "آنجاق" ،"ایسه" ، سؤزجوکلریندن بیری گرکسیز‌دی.

آنجاق:

- جمله‌ده باغلاج کیمی ایشله‌نیر:

آمما، ( اوستده‌کی جمله‌ کیمی)

- بلیرتج(ظرف) آنلامیندا، چتینلیکله، گوجله ، (تاماشانین اوچونجو پرده‌سینه آنجاق چاتا بیلدیم. بو ایشی آخشاما آنجاق قورتارماق اولار./ بو یئره آنجاق بئش آدام یئرلشه بیلر ...)

- ایلگج(ادات) کیمی ایشله‌نیر، یالنیز، تک، ساده‌جه ...

بیز بورایا آنجاق ایش اوچون گلمیشیک. / بونا آنجاق تعجب ائتمک اولار ...

...دینیب دانیشمیردی، سانکی او گونو گمی‌لری غرق اولموش کیمی ایدی.

"کیمی" سؤزجویو "سانکی" سؤزجویونون یئرینی توتور. "سانکی" گرکسیزدی.

"سانکی" نی ساخلاماق ایسته‌سک، جمله بئله اولمالی‌دیر:

-...سانکی او گونو گمی‌لری غرق اولموشدو.
سانکی sanki : ائله‌بیل

منیم دوشونجه‌مه گؤره دیل اوزره داها گؤروله‌جک چوخ ایشلر اولدوغونو دوشونورم.
"منیم دوشونجه‌مه گؤره" گرکسیز‌دی.

- دیل اوزره داها گؤروله‌جک چوخ ایشلر اولدوغونو دوشونورم.

- منیم دوشونجه‌مه گؤره (یا "منجه") دیل اوزره داها گؤروله‌جک چوخ ایشلر واردیر.

اوزره üzrə, و اوزر üzər :

اوزره:
- اویغون اولاراق، گؤره، اساساً آنلامیندا ایشله‌نیر.

آنا بابا عادتلری اوزره دوز چؤرکله اردونو قارشیلادیلار... قادینین تکلیفی اوزره قالخیب چای تؤکدو.

- بیر ایشین قورتارماسینین، سونا چاتماسینین یاخینلاشدیغینی بیلدیریر.

... قولام معلم تلگرامی یازیب قورتارماق اوزره اولان آغساچلی کیشی‌نین توشوندا دایاندی.

اوزر üzər

"اوست" آنلامیندا ایشله‌نیر.
کیتابی ماسانین اوزه‌رینه قویدو. قلملر ماسانین اوزه‌رینده‌دیر.دشمن اوزه‌رینه قوشون چکدیلر...

بو شهره ایلک گلدیگیم گوندن بَری یاشارلا گؤروشورم.
"ایلک" سؤزجویو گرکسیزدی.

"سونو قانلی بیتن بیر سئوگی..."

"سونو" سؤزجویو گرکسیزدی.

"گئجه دامدا اوزانیب گؤیده‌کی اولدوزلاری ساییردیم..."

"گؤیده‌کی" سؤزجویو گرکسیز دئییل‌می؟