بیتمیش اینسانلاریق

یاریمچیق حکایه‌لرین قهرمانیییق

معصوم بهانه‌لرین.

دوغرولارین آدامیییق

"یاخشی اینسانیق" اصلینده، ساده‌جه یاخشی آنلاشیلمیریق.

تانری تک قالماسین،

باشینی قاتسین دئیه واریق.

گؤبک باغیمیز دونیانین بطنینه باغلی

دونیاگیریک، یقین بونداندیر.

بؤیومه‌یه هوسلیگیک،

قازانماغا یئریکدی اللریمیز.

بئینی دومانلی،

روحو یورغون.

گنجلیگی قوجالمیش،

یاشاماغا ارده‌مسیز...

سون ایشله‌نمه تاریخی بیتمیشلریک بیز.

***

دانیشمادیق، سوسدوق یئنه،

بیر گؤروشلوک عمرو اولوب بو سئوگینین.

اوشاق کیمی سئوینمیشیک آیاق اوستو گؤروشلره،

اوزاق-اوزاق حسرتلرین عوضینده اوددوغوموز اؤپوشلره.

دئیجییم نه چوخ سؤز وار

هله یئنی خاطیرلادیم.

اللرینی توتاجاقدیم،

یاناغینی سیخاجاقدیم،

یا دا برک-برک قوجاقلایاجاقدیم...

اونوتموشام...

سندن اوزاق نئچه-نئچه خوش آنلارین خیالینی میلیون دفعه من قورموشام.

نه آز اولور زامانیمیز،

بیز دونیایا سیغیشمازکن نئجه سیغیر بو حسرته بو جانیمیز؟

ایللری سای،

گونلری سای.

بیر کرجیک گؤرمک اوچون

اوزون-اوزون،

بوش- بوش یاشا ایکی قولدا اؤلمک اوچون.

بیر کافه ده

بیر باغچادا بیر نفس‌لیک گولمک اوچون...

سئن سیغمازکن حیاتیما

ساعتلارا نئجه سیغیم؟

من اؤلرکن سن‌سیزلیکدن

اللرینین حسرتیله اوووجلاریم اود توتارکن

نئجه قویوم

آیریلارکه‌ن داش کسیلن بدنینی

یول باشیندا؟

بیز مقدس سئومیش ایکن

بیز مقدس سئویشرکن هاردان چیخیر بو آیریلیق،

بو مسافه

بو گئت-گللر؟

منیم عمروم ساعتلیقدی،

منیم عمروم ثانییه‌لیک.

بلکه- بلکه یئر اوزونده

ان آز عمرو اولان منم.

سن اولمادان نفس چکیب اؤلن منم.

دئیجکدیم بونلاری من

دئیممدیم...

سؤزوموز چوخ،

زامان قیسا.

بیر گؤروشلوک اولوب ائله

بو سئوگینین عؤمور پایی...

سن اوزاغیم،

سن قیمتلیم،

ال یئتمزیم،

نفسیمسه‌ن.

اوزاقدا اول،

یاخیندا اول فرقی یوخدو

سن منیمسن،

بیر گؤروشلوک اولسان بئله،

سن بسیمسن.

قادین اولماق

بیر کیشینین سرخوشکن خاطیرلادیغی قادین اولماقدیر "سئویلمک".

تنهالیغیدی،

قاچیب-قاچیب اینسانلاردان

یولونو ایتیرمیش اوشاق کیمی خاطره‌لره سیغینماقدی.

سوسقونلوغودو،

یوخسونلاشماسیدی،

آدامسیزلاشماسیدی...

هر گئجه

یانینداکی قادینا

کوریین دؤنمه‌سیدیر "سئویلمک".

سیگارت-سیگارت اؤزونو اؤلدورمه‌سیدی.

دوست مجلیسلریندن تلسیک گئتمه‌سیدی.

وئریلن سواللارا جاواب‌سیزلیغیدی.

تانیش کوچه‌لرین،

دوغما آداملارینین "اؤزگه‌سی" اولماسیدی

"سئویلمک".

اوستوندن کیمسه‌سیزلیک،

یازیق‌لیق تؤکولمه‌سیدیر.

بیر کیشینین اؤزونه جکیلمه‌سیدیر "سئویلمک".

هر گون گؤروش یئرینه

عینی واخت‌دا،

ساعت‌دا

اومیدسیز گلمه‌سیدی.

تایی آیری یازیلمیش بیر آدین

هئجا-هئجا کیشی دوداقلارینی اؤپمه‌سیدیر.

دؤش جیبینده ساخلادیغی اسکی، ازیک بیر شکلین اؤنونده هیکله دؤنمه‌سیدیر.

بیر کیشینین کیشی سایاغی اؤلمه‌سیدیر..."سئویلمک".

یئردن، گؤیدن الینی اوزوب

بیر خیالین خاطره‌سینه تاپماق...

بیر کیشینین سیرری اولماقدیر،

قادین اولماق!

ایشکولیک

ایچ دونیاسینین قاپالی پنجره‌لرینین

تک گون توتان طرفی عینکی‌دی،

ماسا آرخاسیندا اسکیمیش عؤمور،

قوجالمیش آرزولار

سیخیجی هفته سونلاری...

قوجالدیب سنی ایش آدامی.

ساچلارینا بولاشمیش آ۴ ورقینین بیازی،

قاریشیق حسابلار،

یازیلماسی گرکن بیر سورو یازی...

بس هان‌سی سندین آراسینا قاریشیب،

کیمین ماساسینا گئدیب آلنینداکی یازی؟

بوغولورسان بوینونداکی قالوستوکلا، (کراواتلا)

داغیلیرسان

دییشیب قامتین

فورمان

یاواش-یاواش اوتورماقدان قارین دا چیخاریرسان،

نه اولسون چوخ قازانیرسان، ایش آدامی؟

مرکب قوخور،

کاغیذ قوخور،

اوفیس قوخور گنجلیین،

باشقالاشیب گؤزلرین

گؤزلریندن دئییل،

مؤوقعیندن باخیرسان.

توکنیر حیات،

وور-توت ۵ ایش گونو، بیری ده هفته سونو

یاشایا بیلسک اونو...

اصلینده نه گؤزلدیر اویسا یاشاماق،

گئجه کولیی دینله‌مک،

دوستلارا قاریشماق،

اوشاق کیمی گؤلکلردن آیاغینی شاپپیلداداراق کئچمک...

حیات قازانماق دئییل،

ایتیرمیی ده بیلمکدیر.

حیات یاشاماق دئییل، یاشاماغی سئومکدیر.