سید موغانلی گونی آذربایجانین تانینان، عینی زاماندا ادبیاتا تحفه‌لر وئرمن شاعرلریندن بیریدیر. او، عینی زاماندا گونیین میللی فعالیدیر.

کولت. آذ تانینمیش شاعر سعید موغانلینین "آتام" شعرینی تقدیم ائدیر:

آنام سانجی چکنده اؤلمه‌میشدی بیردن
ایندی آتام اوچ وعده اؤلور چؤره‌ک یئرینه
آتام شوکور ایچینده
ساری تئللی بوغدالاریمیزدا
آتام گؤی آتلی سولطان
او قده‌ر آج قالدی کانسئر بو شالدیلدی معده‌سینه
او قده‌ر دؤیوشدو عراق ساواشیندا
حاجی‌لار بورجا دوشوب مشهده گئتدی
لندنه اوچدو
او قده‌ر اوتاندیردی شلمچه‌نی
برادر آغا ساری قوچلاریمیزی
قوربان دوغرادی
او قده‌ر دؤیوشدو
هئچ کیم قورخوسوندان سالام وئرمه‌دی سرطانا
چاراسیز گئجه نمازی قیلدی
چاراسیز زنگ آچدی سردارا
سلام آقای رئیس
سلام آقای همسنگر
سیزین خسته‌خانادا معده آغریسینا
نه قده‌ر روشوه وئرمه‌لییم
معده‌مه پاتک ووروبلار قوربان
صداما گوجوم چاتیردی سرطانا یوخ
مکتوب یازدی آتام
سلام آقای میلیاردر
سلام آقای همسنگر
سلام حضرت اجل اکرم افخم
کارخانازدا نگهبان ایسته‌میرسیز
باقی بقای حضرت عالی
آتیمیزی ایتیمیزی داریخما بوغدو
کیشنه‌شیردیلر اولاشیردیلار
سونرا اینه‌ییمیز سودون چوخالتدی بیردن
تویوقلاریمیز ایکی ساریلی یومورتدادیلار
قویونلاریمیز ائکیز دوغدولار
ننم ناماز اوسته
شاه مقصود تسبئحینه ده دئدی
یاخشی کی بالام آجیندان اؤلمدی
سون بئشیک بالام
و داها سونرا
مهره- مهره خرجلندی قیرمیزی تراکتوروموز
آتام مکتوب یازدی
«معجز» دیوانی‌نین آراسینا قویدو
سلام آقای احمدی‌نژاد
دونن قونشو کتدی عدالت
آجیندان اؤلدو
عدالت سهمینه چاتمادی
کفن پولونا ایکی آناج قاز ساتدی
گوللوبه‌ییم خالا
سونرا
حیدربابانی اوجادان آغلادی
یاخشیلیغی الیمیزدن آلیبلار
یاخشی بیزی یامان گونه سالیبلار
آتام مکتوب یازدی
سالام تانری بی
سالام ایلاهی
نئجه‌سن قاداسی
خسته‌خاناندا بوش یئرین وار
داریخیرام واللاه
داریخیرام
داریخی
رام
داریخی
رام
والسلام