سن گئدیرسن؛
سویوناراق یاشامینی آنیلارا.

سن گئدیرسن؛
یویوناراق غوربتینی روژ لکه‌لی شافاقلارا.

سن بو یولون گؤوشه‌ییسن .
و بیلیرسن حسرتینین مئتراژینی
و سئویرسن او آغ بیرچک،
او تومانچاق سئودالارین
سوچلارینی...

یالان-گئرچک سئوینیرسن
و گولورسن
دیشلرینین آراسیندان
بور-بوخوولو کلمه‌لرین اییسی گلیر
و سوسدوقجا؛
قهر باسیر بوغازینی
خینوولارین چنبریند‌ن
یالنیزلیغین سسی گلیر.

آما اینان:
هر گئدندن گلن اولماز.
هئچ بیر ساهات گلیشینه قورولماز
یالنیز کؤلگه‌ن یولا سالار گؤوده‌نی

آمان جانیم!
قوی جئبینه اومودلاری
باس باغرینا کوسولری
و دوشون کی
اینسانلیغین شاه داماری کسیلیب
اونلار آخیب تیلیت-تیلیت
سن آخیرسان

و بیز... .
آدیمیز وار سورغولارین قییناغینا تاخمالی
گؤزوموز وار دوروب-دوروب ایزلرینه باخمالی
و کؤنلوموز
یاندیرمالی، یاخمالی

سن گئدیرسن
قارشیلاییر سنی یاشام
اؤنونده دیز چؤکور زامان
بیرسس گلیر اوزاقلاردان
و زنجیرلر زینگیلده‌ییر بیرهاوادا

خوش گلیبسن وطنینه
دوغوم گونون قوتلو اولسون...