کولت. آز شاعر حسن اومود اوغلونون شعرینی تقدیم ائدیر:

نه‌واختسیز کؤچورسن سونقور باخیشلیم

سوکوتا بورونوب یوللارلا آنلار،
گؤیلرده ساللاییب قاشین-قاباغین.
گئتمک ایسته‌ییرسن آددیمین گلمیر،
گؤزومه باغلی‌دیر سنین آیاغین.

اوخلانیب گؤزومه گؤزلرین سنین،
باخیشین جالاییر کؤنلومه سازاق.
آیریلیق ناغیلین اوخویورام من،
هر کیپریک چالاندا دؤنور بیر واراق.

جومورام کؤنلونه آی دنیز گؤزلوم،
کؤنلون دالغالانیب چاغلاییر منی.
آدیمی سیلیرسن بو گون بختیندن،
گؤزلر داملا ـ داملا آغلاییر منی.

بو گون سن گئدیرسن کدرلی‌یم من،
دونوب‌دور آغزیمدا فریادیم سؤزوم.
یوخ ! یوخ ! آغلاماییر دالینجا سنین،
اوغور اولسون دئیه سو سپیر گؤزوم.

نه واختسیز کؤچورسن سونقور باخیشلیم،
هاچان یازدا کؤچور گؤللرین قازی.
آی ایپک قانادلیم سن کی بیر داها،
قاییتمایاجاقسان نئیلیرم یازی؟!

داشلاردا آغلاییر وداع مارشینا
یوللاردا دوشونوب سون نییت‌ینی.
آیاقلا آرزیمی خوش گونه قوووش،
ایسته‌رم دونیادا سعادتینی.

دئمیشدیم آنانا :"سئودیییم گؤزل،
سیزین قیزینیزدیر، منیم اولاجاق !"
بیلمزدیم ساچین تک باخدیم قارادی،
آرزی چیچکلریم بیر گون سولاجاق.

منیمسه بختیمدن بئله گلیبدیر،
هئچ آلوو بئله‌جه منی یاخمادی.
اوچدو آرزیلاردان تیکدیییم بینا،
ییخیلمیش تاواندان توز دا قالخمادی.

گئتدین بخت ائوینه یولون اوغورلو،
ظن ائتمه اؤز الیم ـ اؤز باشیم اولدو.
گئتدین‌می حیاتین اوغوللو ـ قیزلی،
منیمسه سیرداشیم گؤز یاشیم اولدو.

گؤز یاشیم جواهیر، گؤز یاشیم اینجی،
دایان، گئتمه دایان دردینی آلیم.
آغارمیش ساچیمین ساپینا دوزوب،
بو سون یادگاری بوینونا سالیم.

آتالار دئییبلر:" حیاتین یولو،
یاری قیسمت اولسا یاری همت‌دیر "
اولدوقجا چالیشدیم چاتمادیم سنه،
خوشبخت اول گؤزلیم، بودا قیسمت دیر.

«الوداع» دئییرم تیترک دوداقلا،
لاکین آرزیم، عشقیم دومانا دؤنور.
سؤزلریم آسانجا قوپور دیلیمدن،
آنجاق گؤروشوموز گومانا دؤنور.

کؤکسومده قیزیلدان بیر سارای سالدیم،
یاشارسان عؤمورلوک دیله‌ییمده سن.
گؤزومدن گئتسنده اوزاق دئییلسن،
رویالاریمداسان، اوره‌ییمده‌سن.