کولت. آذ کیان خیاواین "چنبرلر ایچینده..." آدلی شعرینی تقدیم ائدیر:

اللریم گوروشه کورپو سالاندا
توکولمه یه جکدی ،آمما توکولدو
گوزلریم سر حدین ده میر تئلینه
دیکیلمه یه جکدی ، آمما دیکیلدی

چنبره دوشموشم ،چنبره آمان!
ساغیمدا ایلان وار ، سولو مدا چایان
دوداغیم دونیانی چاغیران زامان
تیکیلمه یه جکدی ، آمما تیکیلدی

هانی آللی- گوللو سونا گوزه للر؟
اینیمه بیچیلمیش خارا خزه للر
سینه مین سازیندان قوشما – غزه للر
سوکولمه یه جکدی ، آمما سوکولدو

سازاق هاردان اسیر بیزیم باغچایا
باغچادان بورولوب دوشور تاغچایا
آخ ! تزه دردلریم کوهنه بوغچا یا
بو کولمه یه جکدی ، آمما بوکولدو

بو یوردون با شینا گور گلمیش نه لر؟!
نه جئیران آغلایار ،نه جویومه لر
پاسلی پنجره مه پاخیر پرده لر
چکیلمه یه جکدی ،آمما چکیلدی

آی ائللر : آیاغا دورورام،نه غم ؟
بوردا درد اکیره م ، عیصیان بیچیره م
چونکو تورپاغیمدا قارا بیر سیتم
اکیلمه یه جکدی ، آمما اکیلدی