کولت. آذ گونئی آذربایجان‌لی شاعر آیریلمازاین رحمتلیک اوستاد حبیب ساهیرین روحونا اتحاف ائتدیی "ساهیر" آدلی شعرینی تقدیم ائدیر:

آی اسیر ائلیمین اسیر شاعیری.
ادب محفیلینین چیراغی ساهیر.
سن سیز ائل اوبانی بورویوب دومان.
کوسوب اوره کلرین ماراغلی ساهیر.

«سحرایشیقلانیر»سئویله دین ائله.
بولبولون مئیلینی آرتیردین گوله.
آزادلیغ نغمه سین سالارکن دیله.
اولدون تئللی سازین یاراغی ساهیر.

دئدین نهایت سیز گوی آلتیندا بیز.
قالدیغ فیروزه سیز قالدیغ قوببه سیز.
آدینی هر زامان ساخلادین تمیز.
اولمادین سارایلار قوناغی ساهیر.

«نسیمی»یولونو گئدن سن اولدون.
قوربتده یاشادین قوربتده سولدون.
گونش تک پارلادین بولود تک سولدون.
اولدون صداقتین بولاغی ساهیر.

سئومه دین دونیانین ثروتین وارین.
قارقادین شاهلارین آغ سارایلارین.
عئشقیلن آرتیردین ائل اعتیبارین.
اولمادین هر ایپین بویاغی ساهیر.

گؤردون ملک دونون گئییبدی شئیطان.
جهالت الینده اسیردی اینسان.
شاعیرلر قورخودان لال اولان زامان.
سن اولدون دانیشان دوداغی ساهیر.

گئجه ن ظولمت اولدو گوندوزون قارا.
یالانچی وارلیغدان سن گلدین زارا.
فلک یارا اوستن چکدیردی یارا.
قویدون توپراغ اوسته یاناغی ساهیر.

سن گئتدین ائللریم سینه داغلادی.
قلملر اولاندی دفتر دیغلادی.
سوسوز قالدی یئنه«کؤشن» آغلادی.
سیندی آیریلمازین بوداغی ساهیر.