کولت. آز آتیلا حاجیزاده دنین شئیرینی تقدیم ائدیر:

سن منی بوراخیب، دوشنده یولا
نه گونش قارالدی، نه یاغیش یاغدی
چاخماغیم بیر سیغار آلیشدیرارکن
قهه ریم دیرماشیب، گؤزومو ساغدی

سئوگیلی گونلرین خاطیره‌سینی
نه راحات بوراخدین آی آغرین آلیم
نه ارکن اونوتدون، نه ارکن داندین
یادیندا دییلمی یادینا سالیم:

"خیامین داریشلیق کوچه‌لرینده
باخیشلار بیر بیرین قوجاقلادیلار
او قدر اؤپوشدوک دال کوچه‌سینده
کؤوره‌لیب دوداقلار قان آغلادیلار"

ایشیقلار سؤنرکن، سانکی بورویور
ساحیلی پاریکی‌نی، کدرلی آنلار
نئچه ایل برابر آددیملاساق‌دا
بیزی تئز اونوتدو بو خیاوانلار

بو شهر آلچاق‌دیر، دئمیشدیم سنه
نه قالیب‌سا بیزدن، اوزوندن سیلر
کوچه‌سی گیزله‌در، اؤپوش‌لریمی
سئوگیمی سوپورر، سوپورگه چی‌لر

سانیردیق پای وئریب بیزی بیر-بیره
توپوروم بو شهرین سئوگی پایینا
منه سندن قالان بیر اوزوک‌-اولدو
اودا قیسمت اولدو، شهر چایینا

آه ندن گؤرمه‌دی گؤز یاشلاریمی
بیلمیرم بو شهر سارساخ‌می، کورمو...
یازین تابلولاردا بورانین آدین:
یاریم سئوگی‌لرین شهری اورمو