ایکینجی بؤلوم

خانيم كوسانين تاپيشيرديغي كيمي دئير:

-لاپ دا ياخشي دير! سئوميرسن يئمه!

كوسا آجيقلانيب، آياغا قالخار، پيچاغي گؤتوروب خانيمين بوغازيندا اولان باغيرساغي كسر، قان آخار! خانيم اؤزونو اؤلومه وورار. حرامي‌لر قورخوب، دئيرلر:

-آ كوسا ! آدام بير يئمك‌دن اؤترو خانيمينی اؤلدورر؟ بو نه ايش‌دير گؤردون؟

كوسا دئير:

-اؤلدورن، ديريلده بيلر ده!

سونرا طاقچادان بير بالا قميشي گؤتوروب، خانيمين بورنونا پوفله‌ير، خانيم بير آسقيريب آياغا قالخار!

حرامي‌لر طاماحا دوشوب، تولكونو، هابئله قميشي آلماغا گؤره كوسايا يالوارماغا باشلارلار. كوسا بير آز نم- نوم ائدندن سونرا تولكونو و قميشي باها بير پولا حرامي‌لره ساتار و ائششک پولو دا ياددان چيخار. حرامي‌لر سئوينجك تولكونو و قميشي گؤتوروب يولا دوشرلر. ايلك گون تولكو و قميش باش حرامي‌يا يئتيشير. باش حرامي ائولرينه بير آز قالميش تولكونو بوراخيب دئير:

-گئت بيزيم خانيما دئه گينن من گليرم! ياخشي بير يئمك پيشيرسين!

بير نئچه ساعات سونرا ائوه گئدر، گؤرر نه تولكو وار نه خانيم! هاچاندان هاچانا خانيم قونشو ائويندن گلر . حراميني گؤرجك هاي- بودوروغا باشلايار! حرامي ايسه آجيقلانيب قمه‌ني گؤتوروب خانمين باشيني كسر! سونرا قميشي گئتيرر ، پوله ها پوله، خانيم ديريلمز! بؤيوك حرامي باشا دوشر كي، كوسا يئنه بونلاري آلداديب آمما اوتانديغيندان هئچ كيمسه‌يه بيلينديرمز. صاباح ايسه بير تولكو آليب، قميش ايله ايكينجي حرامي‌يه وئرر. ايكينجي حرامي ده خانميني اؤلدورر، اوتانديغيندان او دا بير سؤز دئمز! بو ساياق هر قيرخ حرامي خانيم‌لاريني اؤلدوروب، بير سؤز دئمزلر. قيرخ گوندن سونرا بير يئره ييغيشيب، حال ماجراني بير- بيرينه آچارلار. بو دؤنه لاپ آجيقلي هر بيري بير اوزون خنجر گؤتوروب كوسانين ائوينه ساري يولا دوشرلر .
كوسا بو گونو ده گؤزله‌ييردي. اونا گؤره ده اؤنجه گئديب مزارليقدا بير بوش مزار تاپميشدي. او مزارين اوستونه بير كؤهنه و ده ليك– دئشيكلي داش قويموشدو. حرامي‌لرين گلمه‌يينی ائشيتجك، كوسا بير منقل اود و بير نئچه شيش گؤتوروب، مزارا گيرر. داشي مزار اوستونه قويار. حرامي‌لر هاي- بودوروقلا ائوه گيررلر. كوسا هاني؟ سوروشارلار. كوسانين خانيمي كوسا تاپيشيرديغي كيمي آغلاماغا باشلايار و دئير كي، كوسا اؤلوبدور. اينانميرسيز مزارليغا گئدين اوزونوز گؤرون!

حرامي‌لر حرص ايله مزارليغا گلرلر، گؤررلر بعلي! كوسا اؤلوبدور. بير- بيرينه دئيرلر:

-داها بيزيم اليميز كوسايا چاتماياجاق‌دير! گلين هر بيريميز اوتوروب كوسانين مزارينه ايشه‌يك!

حرامي‌لر هر بيري مزار اوسته ايشه‌مه‌يه اگله‌شدي. كوسا آتدان اونا بير داغ شيش باتيردي و هامیسینین آلتي ياندي! آياغا قالخيب دئديلر:
-آ حرامزادا كوسا! بو دونيادا او قدر حرام ائديب كي، مزاريندان بئله اود پؤهره‌لير! آدامين آلتي يانير!

آنجاق حرامي‌لر طاماحكارليقدان هم خانيم‌لارينی، هم وارلارينی ايتيريب، هم يانا- يانا قاچديلار ! كوسا ايسه سئوينجك مزاردان چيخيب، ائوينه گلدي. حرامي‌لردن آلديغي پول ايله اوغلونا توي ائديب، يئددي گون يئددي گئجه چاليب- اوخودولار :

ماهني ماهني‌نين باشي ماهني بيلمه‌ين ناشي
ماهني بيلمك ياخشيدير توي- توزاغين يولداشي
كوسا دئير داش داشي كرپيچ داشي داش داشي
جاهيل ايله بال يئمه عاقيل ايله داش داشي
كوسا دئير قوش داشي گل اويناياق بئش داشي
چيركين ايله بال يئمه گؤزل ايله داش داشي
چاخ داشي چاخماق داشي ياندي اوره‌ييم باشي
تانري بير ياغيش گؤندر بيتيرسين داغي داشي
كوسا دئير دوست آشي دوست چؤره‌يي دوست آشي
دوشمانين گولـله‌سيندن يامان اولور دوست داشي
كوسا دئير تاس باشي اوزاق دير چاراداق باشي
گلين چاليب اويناياق چاتلاسين دوشمان باشي!!