بو گون خالق آرتیستی لیلا بدیربیلینین دوغوم گونودور.

Kult.az خبر وئریر کی، لیلا بدیربیلینین ۱۹۲۰-جی ایل یانوارین ۸-ده باکی‌دا آنادان اولوب.

آتاسی آغالار کیشی اوزون ایللر حربچی اولوب، حتی پولکوونیک روتبه‌سینه قدر یوکسلیب. آناسی بیکه خانیم ایسه شمکیرین دللر کندیندندیر.

لیلا بدیربیلینین صنعته گلمیینده ایسه آناسی بیکه خانیمین بؤیوک رولو اولوب. علی بایراموو کلوبونداکی قادینلار درنیینه گئدن بیکه خانیم بؤیوک قیزی لیلانی دا اؤزویله بورا آپاریردی. رقصه بؤیوک ماراغی اولان گلجیین مشهور آکتریساسینین ایستعدادینی اوزه چیخاردیغی ایلک ساحه ده محض رقص اولور. فرقلی خاریجی گؤرونوشه و رقص باجاریغینا صاحب اولان بدیربی‌لی دؤلت فیلارمونییاسینا دعوت ائدیلیر.

اون آلتی یاشین‌دا رققاس فرج جاوانشیروولا عائله حیاتی قورور. بیر ایل سونرا اونلارین اوغلو دوغولور. گنج آنا اولان آکری‌سا ایشیندن آیریلمیر و صحنه فعالیتینی داوام ائتدیریر. لئیلا بدیربیلی ایله فرج جوانشیرووون ائولی‌لییی جمعی ۴ ایل چکیر.

ایکینجی حیات یولداشی دیش حکیمی کامیل آسلانوولا تانیشلیغینین ایسه غریبه تاریخجه‌سی اولوب. کامیل آسلانوو اختصاص‌جا دیش حکیمی اولوب، اما رقص ائتمیی خوشلاییر، گؤزل رقص ائدیرمیش. علی بایراموو کلوبونا گئدیر، لیلانی اورادا گؤرور و چوخ بینیر.

۱۹۴۵-جی ایلده رضا تهماسیب "آرشین مال آلان" فیلمینی چکرکه‌ن گول‌چؤهره رولو اوچون گؤزل خاریجی گؤرونوشه مالیک قیز آختاریر. اوزئییر حاجیبیووون توصیه‌سیندن سونرا لیلا بدیربیلی بو رولا تصدیقلنیر. حتی بئله ادعالار دا سسلندیریلیر کی، گؤزللیک آشیقی اولان اوزئییر بی لیلا بدیربیلینی بو رولا اونا اولان سونسوز سئوگیسینه گؤره توصیه ائدیب. بعضی صنعت آداملاری ایسه عمومیتله بو ایکی شخص آراسین‌دا سئوگی مناسیبتلرینین اولدوغونو دئییرلر.

«آرشین مال آلان» قیسا واخت عرضینده دونیا شهرتی قازانیر. فیلمین یارادیجی گروپو، او جمله‌دن لیلا بدیربیلی ۱۹۴۶-جی ایلده "ایستالین مکافاتی"نا لاییق گؤرورلر.

لیلا بدیربیلی چوخ سوادلی و قابیلیتلی خانیم اولوب. پالتارلارینین بعضیلرینی اؤزو تیکر، اوزرینه ایپله توخونموش بزک‌لی گوللردن ناخیش سالاردی. چوخ دادلی شیرنیاتلار، گؤزل تورتلار بیشیرمیی باجاریردی.

آنتیک اشیالار، هیکللر ساتین آلماغی چوخ سئویب. خیردا هئیکلجیکلردن عبارت کولکسییاسی اولوب. خاریجه گئدنده مشهور اوستالارین ال ایشلرینی آلیب گتیرردی.

لیلا بدیربیلینین مشهورلاشماسیندا بؤیوک رول اوینایان دیگر شخص ایسه ایوسیف ایستالین ایدی. اونون بدیربیلینی "قفقاز گؤزلی"، "آذربایجان گؤزلی" آدلاندیرماسیندان سونرا آکتریسانین گؤزللییی داها بؤیوک ماراغا سبب اولور. سونرالار ایسه شایعه‌لر یاییلیر کی، گویا لیلا خانیمین سووت دؤلتینین رهبری ایله ایستی مناسیبتلری وار.

لیلا بدیربیلینین پرستیشکارلاری سیراسیندا مشهور غزل‌خان علی‌آغا واحیدین ده آدی چکیلیر. حتی شاعرین آکتریسایا اروتیک شعیرلر حصر ائتدیی ده دئییلیر. علی‌آغا واحده حصر اولونان "غزل‌خان" فیلمین‌ده نوبار نووروزووانین جانلاندیردیغی آکتریسا اوبرازی محض لیلا بدیربیلینین پروتوتیپیدیر.

چوخلاری بیلمیر کی، خالق شاعری صمد وورغون دا لیلا بدیربیلینین گؤزللیینین آشیقی اولوب. حتی شاعرین آکتریسایا "آللی-گوللو لیلام" آدلی شعیر ده حصر ائتدیی دئییلیر. همین شعیر ایسه سونرادان ماهنییا چئوریلیب. بو شعیردن سونرا شاعرله آکتریسانین سئوگی مناسیبتلرینین اولدوغو باره‌ده ده مختلیف فیکیرلر سسلنیب.

حیات یولداشی کامیل آسلانوو آلمانییایا گئدیر. اوردان آذربایجانا قاییداندا اوکراینادا آغیر یول قزاسینا دوشه‌رک وفات ائدیر. بو حادثه‌دن بیر ایل سونرا ایسه آکتریسانین قیزی لاله‌نی باکی‌دا ماشین وورور. او، ایسه ۴۸ یاشیندا دونیاسینی دییشیر. محض بو ایکی حادثه‌دن سونرا لیلا بدیربیلی عصب خسته‌لیینه توتولور، هئچ کیمله گؤروشمک، دانیشماق ایستمیر و اؤزونه قاپانیر. یالنیز ۱۹۹۹-جو ایلین یانوار آیینین ۱-ده مرحوم پرزیدنت حیدر علیئو اونا "استقلال" اوردنینی وئررکه‌ن ائوده‌ن چیخیر. ائله همین ایلین نویابر آیینین ۲۳-ده ۷۹ یاشین‌دا دونیاسینی دییشیر.