خالق ماهنیلارینی دینلیرکه‌ن چوخ واخت ائشیتدییمیز جمله‌لری آنلامادان اوستوندن کئچیریک. حالبوکی، دقتله قولاق آسیب آراشدیرسانیز، تاریخین توزلو صحیفه‌لرینی چیرپیب، چوخ سیرلردن آگاه اولاجاقسینیز

Kult.az بیر نئچه نمونه‌نی تقدیم ائدیر.

قایچی آتدیم ساندیغا

جینگیلدییه-جینگیلدییه.

گلیر اوغلان آدامی

دینگیلدییه-دینگیلدییه.

بو خالق ماهنی‌سینین ایلک بندی ماراق یارادیر. نه اوچون ساندیغا قایچی آتیرلارمیش، اوغلان ائوی کیمدیر، هارادان چیخدی؟

کئچمیش‌ده گلین حامیله اولاندا اونون اوغلان و یا قیز دوغاجاغینی معینلشدیرمک اوچون ایکی ساندیقچا گؤتوروب بیرینه قایچی، بیرینه بیچاق قویاردیلار. گلین ایچینده قایچی اولان ساندیغی سئچردیسه قیز، بیچاق اولان ساندیغی سئچردیسه، اوغلان دوغاجاق دئیردیلر. قیزی دوغولاجاغینی بیله‌ن آنالار، ننه‌لر ده بو ماهنینی اوخویوب، قیزا ائلچی گلجیینی، اونون اوچون قاپیلاریندا توی اولاجاغینی بئله بیر ماهنی ایله ایفاده ائدردیلر. بلکه ده، قیز آتاسی اولماق ایسته‌مه‌یه‌ن آتالارا بئله تسللی وئریبلر؟

خالق ماهنیلاریندا خانیملارین ساچلاری ایله باغلی چوخلو ایفاده‌لر یئر آلیر. مثلاً،

«ساچلارینی یان دارا قیز،

آی قاشی-گؤزو قارا قیز».

«ساچین اوزون هؤرمزلر،

سنی منه وئرمزلر».

قدیم‌ده تورک قیزلاری و گلینلری ساچ دوزوملری ایله بیر بیرلریندن فرقلنردیلر. گلینلر ساچلارینی اورتادان، سوبای قیزلار یاندان آییراردی. ساچین اوجونو هؤرمک پیس علامت حساب اولونوردو. قوجا و دول قادینلار ساچلارینی لاپ اوجا قدر هؤرردیلر. گلینلر ساچلارینا قوشا، سوبای قیزلار بیر هؤروک ووراردیلار. هؤروکلرین سایی ایله قیزین سوبای اولوب-اولمادیغی بللی اولوردو.

باشقا بیر نومونه:

«آی قیز، سنین نه وعده‌ندیر،

کسیلیب قیسا تئللرین؟»

ارگه‌نلیک یاشینا چاتمیش قیزلار ساچلارینین اؤنونو قیسا کسدیریب، اؤرپکدن ککیللرینی (تئللرینی) چؤله چیخاراردیلار. «قیز ککیل چیخاردی، اره وئر گئتسین» ایفاده‌سی ده بوردان قالیب.

آشیق "سنین نه وعده‌ن‌دیر، تئللرین قیسا کسیلیب؟" دئیرکه‌ن قارشی‌سینداکی گؤزلین یاشینین آزلیغینا، یئنی‌یئتمه اولماسینا ایشاره ائدیر.