بو گون خالق رسامی ستار بهلولزادنین دوغوم گونودور.

Kult.az خبر وئریرکی، ستار بهلولزاده ۱۹۰۹-جو ایل دکابرین ۱۵-ده باکینین امیرجان کندینده آنادان اولوب.

۱۹۲۷-جی ایلده رسام‌لیق مکتبینه، ۱۹۳۱-جی ایلده آذربایجان رسام‌لیق مکتبینه، ۱۹۳۳-جو ایلده ایسه مسکوا دؤولت رسام‌لیق اینستیتوتونا داخیل اولوب. ۱۹۴۱-جی ایلده سوریکوو آدینا مسکوا رسام‌لیق اینستیتوتونو بیتیریب. مشهور رساملار فاوورسکینین و شاقالین طلبه‌سی اولوب. یارادیجیلیغا «کومونیست» قزئتینده عظیم عظیمزادنین رهبرلییی ایله باشلاییب. ۱۹۳۱-۱۹۳۳-جو ایللرده ایلک کاریکاتورالاری چاپ ائدیلیب.

بهلولزادنین یارادیجیلیغیندا تاریخی مؤوضولار و تاریخی شخصیتلرین پورترتلری «بابک عصیانی»، «فتحعلی خان»، «فضولینین پورترتی» و بو کیمی باشقا اثرلر مهم یئر توتور. محاربه‌دن سونراکی ایللرده آبشرونون نفت معدنلرینی، باغ و کندلرینی تصویر ائد‌ن رسملر یارادیب.

وطن محاربه‌سی، یادائللی غصبکارلارا نفرت رساملاریمیزین اساس مؤوضولاری ایدی. ۱۹۴۱-۱۹۴۵-جی ایللرده ستار بهلول‌زاده «بابک عصیانی»، «فتحعلی خان» اثرلرینی چکیر. بو اثرلرده او، تورپاقلاری اوغروندا جانلارینی فدا ائتمه‌یه حاضر اولموش تاریخی شخصیتلری تصویر ائدیب. «بز قالاسینین مدافعه‌سی» لؤحه‌سی بویالارین آهنگی، کولوریتین دوروستلویو ایله فرق‌لنیر، عینی زامان‌دا، وطن تورپاغینا محبت حس‌سی آشیلاییر.

اونون اثرلری آراسیندا طبیعت تصویرلری «آبشرون اتودلری»، «خزر اوزرینده آخشام»، «خزر گؤزلی»، «بازاردوزو»، «ابدی مشعللر»، «کپزین گؤز یاشلاری»، «وطنیمین بهاری»، «آذربایجان ناغیلی»، «سوراخانی آتشگاهی»، «امیرجان» «افسانوی تورپاق»، «شاهنابات»، «ناخچیوان. آخشام‌چاغی اوردوباد باغلاریندا»، «وطنیمین بهاری»، «قودیالچای وادیسی»، «قیزیل‌بنؤشه‌یه گئدن یول»، «شاماخی اوزوملوکلری» و دیگر اثرلری اوستونلوک تشکیل ائدیر.

تنقیدچیلر یئنی اوصلوبدا ایشله‌یه‌ن ایستعدادلی رسامین اثرلرینی تحلیل ائدرکه‌ن بو صنعت نمونه‌لرینده اولان سطیرآلتی معنالارین تاماشاچینی نئجه دوشوندوردویونو و اونون گئتدیکجه داها آرتیق پوخته‌لشدیینی قید ائدیردیلر. «منی ۲۰ ایلده‌ن سونرا آنلایاجاقلار» دئیه‌ن اوستاد رسام طبیعتین زنگین بویالاریندان، گونون مختلیف چاغلاریندان، ایلین فصیللریندن آلدیغی تصوراتلاری یالنیز اونا مخصوص خصوصی مهارتله وئره بیلیردی.

الجزایر، مصر، لیوان، سورییا، تونیس، نوروچ، چخوسلوواکییا، بولغاریستان، عراق، کوبا، کانادا، بلچیکا، فرانسا، یاپونییا و دونیانین بیر سیرا باشقا اؤلکه‌لرینده فردی سرگیلری نماییش ائتدیریلیب. دونیانین اونلارلا موزئیینده ستار بهلولزادنین اثرلری دایمی اکسپوناتلار سیراسیندا یئر آلیر.

اثرلری آذربایجان دؤولت اینجه‌صنعت موزئیینده، آذربایجان دؤلت شکیل گالریاسین‌دا، ائلجه ده مسکوانین و دیگر شهرلرین موزئیلرینده ساخلانیلیر.

گؤرکملی رسام، معاصر آذربایجان بویاکارلیق صنعتینده منظره ژانرینین یارادیجیلاریندان و ان بؤیوک اوستادلاریندان بیری ستار بهلولزاده ۱۹۷۴-جو ایلده مسکوادا وفات ائدیب، امیرجانا گتیریله‌رک دوغما کندینده دفن اولونوب.