بو گون خالق شاعری رامیز رؤوشنین دوغوم گونودور.

Kult.az معلومات وئریر کی، رامیز رؤوشن ۱۹۴۶-جی ایل دکابرین ۱۵-ده باکینین امیرجان کندینده آنادان اولوب.

اصلن قبادلی رایونونون تیمور موسکانلی کندین‌دندیر. آذربایجان دؤولت اونیورسیتتینین فیلولوگییا فاکولته‌سینی بیتیریب. جعفر جبارلی آدینا "آذربایجانفیلم" کینوستودییاسین‌دا، "موزالان" ساتیریک کینوژورنال ایستودییاسیندا و آذربایجان ترجمه مرکزینین باش رداکتورو ایشله‌ییب. بیر نئچه شعیر کیتابینین مؤلفی‌دیر.

رامیز رؤوشنین سناریلری اساسیندا چوخلو سایدا بدیعی و سندلی فیلم چکیلیب. شعیر و حکایه‌لری ترجمه ائدیله‌رک بیر سیرا کئچمیش سووئت رسپوبلیکالاریندا، آمریکا، آلمانییا، بؤیوک بریتانییا، فرانسا، پولشا، بولغاریستان، تورکییه و ایران‌دا چاپ اولونوب.

۲۰۱۳-جو ایلده "تورک دونیاسی بیلیم، کولتور و صنات اؤدولو"نو آلیب. آوراسییا آکادمییاسینین آکادمیکی و آکادمییانین "آوراسییا افسانه‌سی" مکافاتینین صاحبی‌دیر.

۲۰۱۹ –جو ایلده خالق شاعری فخری آدینا لاییق گؤرولوب.

رامیز رؤوشنین "دونیانین سن اولان یئری" شعیرینی تقدیم ائدیریک.

بوشالدی دونیانین سن اولان یئری…

دونیانین

سن اولان یئریندن ایندی

توزلانا-توزلانا ماشینلار کئچیر،

نازلانا-نازلانا خانیملار کئچیر،

جوانلار کئچیر

توپوروب سیگارت کؤتوکلرینی.

دونیانین سن اولان یئریندن آنجاق

من کئچه بیلمره‌م.

باش آلیب قاچارام گئجه‌لر ایله،

اوزون یوللار ایله، کوچه‌لر ایله،

دونیانین سن اولان یئریندن ائله

باش آلیب قاچارام، قاچا بیلمره‌م.

یئنه ده، آچیلار سحر غفیلدن،

یئنه ده، سؤکولر قیزیل دان یئری.

بوتون یئر اوزونون هر طرفین‌دن

گؤرونر دونیانین سن اولان یئری.

دونیانین سن اولان یئرینه بیر گون

یاغیش یاغاجاق.

گئجه کؤینیینده، اورکک-اوتانجاق،

چیخارسان ائشییه، گؤزلرسن منی،

اوشویه-اوشویه گؤزلرسن منی.

قوشولوب آغلارسان

یاغان یاغیشا،

الیم‌دن نه گلر؟..

منی باغیشلا!..

…نه سن کیرییرسن، نه یاغیش کسیر،

یاغیشا قاریشیب آخارسان، کیری.

آغلایا-آغلایا بو یاز گئجه‌سی

اریییب یاغیشا چیخارسان، کیری.

باخدیقجا قورخورام

یاغان یاغیشا،

آغلایا بیلمیرم…

منی باغیشلا!..