بو گون خالق شاعری عثمان ساری‌وللینین آنادان اولماسیدان ۱۱۸ ایل اؤتور.

Kult.az خاطیرلادیر کی، اعثمان عبدالله اوغلو قوربانوو (عثمان ساری‌وللی) ۱۹۰۵-جی ایل دکابرین ۱۷-ده قازاخ رایونونون ایکینجی شیخلی (ساریوللی) کندینده آنادان اولوب.

اورتا تحصیلینی قازاخ معلملر سمینارییاسیندا آلدیقدان سونرا بیر مدت گؤیچای رایونونون قارامریم و بیغیر کند مکتبلرینده معلم ایشله‌ییب. سونرا تحصیلینی آرتیرماق مقصدیله مسکوایا گئدرک، بورادا مسکوا دولت اونیورسیتتینین فیلولوگییا فاکولته‌سینده اوخویوب.

همین ایلده «گنج ایشچی" قزئتینده "آیاق‌سیز" آدلی ایلک شعری چاپ اولونوب. اونون «دمیر سطرلریم» آدلی بیرینجی کتابی ۱۹۳۴-جو ایلده چاپدان چیخیب. شاعر ۱۹۳۷-جی ایلده آذربایجان یازیچیلار اتفاقینا عضو قبول ائدیلیب.

باکی پداگوژی تکنیکوموندا معلم، باکی تئاتر تکنیکوموندا مدیر، آذربایجان علملر آکادمییاسینین نظامی آدینا دیل و ادبیات اینستیتوتوندا مدیر معاونی، «ادبیات قزئتی»نین رداکتورو، «اوشاق‌گنج‌نشر»ده رداکتور، آذربایجان یازیچیلار اتفاقیندا شعر اوزره مصلحتچی وظیفه‌لرینده ایشله‌ییب.

عثمان ساریوللینین شاعر تالعیی هئچ ده آسان اولماییب، اؤمرونون مختلف آنلاریندا حاقسیزلیقلارا، تعقیبلره معروض قالیب. بئله کی، سووئت رژیمینین قانلی ایللری اونون دا حیاتیندان یان کئچمه‌ییب. او آغیر ایللرده عثمان ساریوللینین قارداشی سورگون اولونوب، اؤزو ایسه رپرسییا قورخوسو آلتیندا یاشاییب. آنجاق هئچ بیر قورخو اونون ایلهام پریسینی الیندن آلا بیلمییب.

عثمان ساریوللی استاد شاعر ایدی. شعرلرینده وطنه، آنا تورپاغا وورغونلوق ان اولوی حسلرله ترنوم اولونوردو.

ایلهام بولاقلاری قورویاجاقدیر،

هر کیمین دئییلسه مایاسی ائلدن،

- دئیه‌ن عثمان ساریوللی پوئزییاسیندا ائله، تورپاغا باغلیلیق هر مصراع‌دا حس اولونور. بو باخیمدان اونون ۱۹۴۳-جو ایلده قلمه آلدیغی «گتیر اوغلوم، گتیر» پوئماسی او دؤورده بؤیوک عکس-صدا دوغورور. خالق معنویاتینین آیناسی حساب اولونان بو اثر فلسفی لیریکانین اصل نمونه‌سی کیمی دیرلندیریلیر.

میروارید دیلبازی یازیردی: «عثمان ساریول‌لی چؤرکسیز یاشاییب، مسلکسیز یاشایا بیلمه‌ین صنعتکارلارداندیر». اونون شعرلری سوژتلی، وطنپرورلیک لیریکاسی نمونه‌لری حساب اولونور.

شاعرین شعرلری آخیجی و یادداقالان اولدوغوندان آشیقلارین دیلیندن دوشمه‌ییب، خالق عثمان ساریوللی پوئزییاسینی سئوه-سئوه اوخویوب، اؤیرنیبلر.

آشیق، بو گون یاخشی کؤکله سازینی،

اورک آچان ماهنیلاردان ده گلسین.

شیرین دوستلوق نغمه‌سیدیر هر سؤزون،

صداقتدن، اعتباردان ده گلسین.

عثمان ساریوللی خالق یارادیجیلیغینین تبلیغی، آشیق صنعتینین تدقیقی ایله یاناشی، ترجمه‌چی‌لیکله ده مشغول اولموش، نظامی، خاقانی، ویکتور هوگو، ناظم حکمت، آلکساندر پوشکینین اثرلرینی، سوفوکلون «آنتی‌قونا» فاجعه‌سینی دیلیمیزه چئویریب.

تانینمیش شاعر ۱۹۹۰-جی ایلده وفات ائدیب و دوغما کندینده دفن اولونوب.