فیلم حافظ شیرازینین بو سؤزلری ایله باشلاییر: «اولمایین ایکی‌اوزلولوک ائد‌نلردن، بیر طرفده یوکسک سسله قران اوخویارکه‌ن، دیگر طرفدن اخلاقسیزلیغینی گیزلتدیینی ظن ائد‌نلردن».

Kult.az خبر وئریر کی، فیلمین سوژئتی فرانسادا یاشایان ایرانلی یازار فریدون سابجامین "داشقالاق ائتمه" اثریندن گؤتورولوب و ۲۰۰۸-جی ایلده آمریکا دا رژیسسور سیروس نورسته طرفیندن چکیلیب.

"ثریانین داشقالاق ائدیلمه‌سی" فیلمی کینو دنیاسیندا بؤیوک سس-کویه سبب اولان اکران اثرلریندندیر. مؤلف اثرده بحث اولونان حادثه‌لرین، تخمیناً، ۳۰ ایل بوندان اؤنجه باش وئردیینی، سونرالار بونو قلمه آلدیغینی دئییر. همچینین، بو فیلم "اسکار" ایله مکافاتلاندیریلیب.

فیلم بو گون دنیادا، او جمله‌دن، مسلمان عالمینده آکتوال اولان دینی فاناتیزم و رادیکالیزمی افشا ائدیر. فیلمین سوژئت خطینه گؤره، ایراندا سفرده اولان قسما اجنبی ژورنالیستین آوتوموبیلی خاراب اولور و او، یاخین کندلردن بیرینده قالیر. ائله همین مدتده زهرا آدلی قادین اؤز باجیسی قیزی ثریانین باشینا گلن حیات حکایه‌سینی اونا دانیشیر.

دؤرد اوشاق آناسی ثریانین اری علی ۱۴ یاشلی قیزلا ائولنمک ایستییر. ثریا بونا قارشی چیخاندا ایسه اری اونو آرادان گؤتورمک قرارینا گلیر. او، مختلف واسطه‌لر فکرلشیر و نهایت، اؤزونه یالانچی شاهد تاپاراق قادینینی شرلییب خیانتده اتهام ائدیر. شاهدی اولمادیغی اوچون اؤز گناه‌سیزلیغینی ثبوتا یئتیره بیلمه‌ین ثریا کوپها آدلی کندین چرچیوه‌سینده شریعت محکمه‌سی طرفیندن آغیر جزایا محکوم اولونور.

۳۵ یاشلی ثزیا ۱۵ آوگوست ۱۹۸۶-جی ایلده آتاسی، اری، اوشاقلاری و یئرلی اهالی طرفیندن داشلاناراق قتله یئتیریلیر.

داشقالاق ائدیلن، ثریا قدر تورپاغا باسدیریلان قادین ازدهاما سسلنه‌رک "آخی سیز بیلیرسینیز منیم گناهیم یوخدور" دئیه‌رک اطرافداکیلارا یالواریر. لاکن اطرافداکیلار شریعتین حکم کسدیی قانونا قارشی چیخا بیلمیرلر. قادینین گناه‌سیزلیغینی هامی کیمی چوخ یاخشی بیلن ملا دا سسینی چیخارمیر و اونون اؤلومونو ساکتجه سیر ائدیر.

اولانلاری ژورنالیسته دانیشان زهرا کاسته کؤچورولن بو یازینین بوتون دنیایا یاییلماسینی ژورنالیستدن خواهش ائدیر. فیلمین سونوندا کندی ترک ائد‌ن ژورنالیست ملا و اونون هم‌فکرلری طرفیندن توتولور.

ماشینی یوخلاییب کاستی تاپیر و سیندیریرلار. بونونلا دا تماشاچینین بوتون امیدلرینی محو ائد‌ن رژیسسور بیر آندا حادثه‌لری داها دا دراماتیکلشدیررک فیلم‌ده دؤنوش ائدیر.کندین چیخیشیندا باشقا احتیاط کاستی ایله ژورنالیستی گؤزله‌ین زهرا اونو ژورنالیسته چاتدیرا بیلیر.

قید ائدک کی، دئییلنه گؤره، سون ۱۵ ایلده ایران، نیگرییا، سومالی، سودان، عراق، افغانستان، پاکستان و سایر اؤلکه‌لرده میندن چوخ قادین ناموس‌سوزلوق، زنا تؤرتمکده اتهام اولوناراق داشقالاق ائدیلمکله اؤلدورولوب. بئله موضوع-دا بو واختادک هئچ بیر فیلمین چکیلمدیینی دئین رژیسسور سیروس نورسته فیلم‌ده کسکین تأثیرلی صحنه‌لره گئنیش یئر آییریب. فیلم تماشاچینین حسلرینه تأثیر ائدیر و اونو بو جور غیر انسانی جزا متودلارینا قارشی مبارزه‌یه سسلییر.

بو فیلمین ایراندا یاییملانماسینا قاداغا قویولوب.