بو دادلی یئمک جلفا شهرینین مطبخینه عایید اولونان بیر یئمکدیر. قدیم زامانلاردا خینا گئجه‌سی قیز ائوی قوناقلارا یئمک کیمی ساده‌جه قوروت-قیله ایسمارلییاردیلار . اما ایندی بو عادت دبدن دوشوب و یئرینه پلوو ویا باشقا بیر تام وئریلیر. لاکین یئنه ده بو دبی اونوتمایانلار دا وار و بو دادلی یئمیی پلووا ترجیه ائتمه‌یه‌نلر ده. قیله جولفا طرفلرده قوورولموش اته دئییلیر و بیلدیینیز کیمی قووورما داها چوخ قویون اتین‌دن حاضرلانیر. لاکین حال-حاضردا قویون اتینه چوخ دا ماراق گؤستریلمیر و مال اتی ده بیشیریلیر.

Kult.az گونئی آذربایجان مطبخینه عایید اولان بو یئمیین رسپتینی تقدیم ائدیر.

۶ نفرلیک قوروت-قیله اوچون :

۲۵۰ گرام قویون اتیندن قیله (قووورما)

۲ سو بارداغی گؤی لوبییا

۱ کیلو ازیلمیش قوروت (قوروت)

یاریم سو بارداغی قاراگؤز لوبیا

۲۵۰ گرام دوغرانمیش ریحان

۱۲۵ گرام دوغرانمیش جعفری

۱۲۵ گرام دوغرانمیش کور

۱ ایری باش نارین-نارین دوغرانمیش سوغان

۲ دنه اورتا بوی کوب-کوب دوغرانمیش بادیمجان

۴ دنه اورتا بوی قابیغی سویولموش و دوغرانمیش پومیدور

۱ دنه آجی بیبر (آزی-چوخو زؤوقه باغلی‌دیر)

یاخشی ازیلمیش ساریمساق

۱ چای قاشیغی ساریکؤک

دوز - لازیمی درجه‌ده

ات سویو

بزک اوچون:

ساریمساق و یاغدا قیزاردیلمیش سوغان.

حاضرلانما قایداسی:

بو یئمیی بیشیرمک ایچین قاراگؤز لوبیانی ۱-۲ ساعت اؤنجه‌دن سودا ایسلاداریق.

بیر ایری سوغانی نارین-نارین دوغراییب بیر قازان‌دا قیزاردیریق و قیزارتدیکدان سونرا ساریکؤکو علاوه ائدیریک.

سونرا قیزارمیش سوغانین اوستونه ات سویو،گؤی لوبیا و قاراگؤز لوبیانی دا علاوه ائدیب قایناداریق . قایناماغا باشلادیغین‌دا اوجاغیمیزین درجه‌سینی ضعیفلدیریلک و وام اوددا بیشیرمه‌یه داوام ائدیریک.

لوبیالار یاری-بیشمیش اولونجا گؤیرتیلری، آجی بیبری و حاضر قیله‌نی (قووورما) علاوه ائدیریک.

۱۰ دقیقه سونرا گؤیرتیلرین رنگی توندلشندن سونرا دوغرانمیش بادیمجانی و پومیدورو دا علاوه ائدیریرک.

هر بیر شئی بیشدیکدن سونرا قورودو علاوه ائدیب و ۱۰ دقیقه ده یاواش-یاواش قاریشدیریلیر کی، قورودوموز چورومه‌سین (کسمه‌سین).

سوسله‌مک اوچون یاغدا قیزاردیلمیش ساریمساق و سوغانلا بزیین.

یئمک حاضر اولدوقدا سوفره‌ده ازیلمیش ساریمساق اولمالیدیر. هر کس اؤز زؤوقونه اویغون یئمیینه ساریمساق تؤکه بیلر.

نوش اولسون!