بو گون میللی موسیقیمیزین گؤرکملی نماینده‌سی ، خالق آرتیستی توکزبان ایسماییلووانین آنادان اولماسیندان ۱۰۰ ایل اؤتور.

Kult.az خبر وئریر کی، توکزبان ایسماییلووا ۱۹۲۳-جو ایل دئکابرین ۲۱-ده باکی شهرینده آنادان اولوب.

موسیقییه اوشاقلیق ایللریندن هوس گؤستریب. بو هوس اونون آصف زینال‌لی آدینا موسیقی تکنیکومونا گتیریب چیخاریب. سس و ایفا اوصلوبو قیسا زامان‌دا اونو موسیقی‌چیلر سیراسین‌دا فرقلندیریب. موغام ایفاچیلاری آراسین‌دا تئزلیکله سئچیلیب، دینلییجیلرین قلبینه یول تاپیب.

۱۹۴۴-جو ایلده آذربایجان رادیو کمیته‌سین‌ده موغه‌ننی کیمی چالیشماغا باشلایان توکزبان ایسماییلووا سونراکی ایللرده آذربایجان دؤلت فیلارمونییاسینین سولیستی اولوب، اینجه‌صنعت گیمنازییاسیندا پئداقوژی فعالیت گؤستریب.

داهی اوزییر بی موغه‌ننینین شاقراق سسینی، گؤزل وکال امکانلارینا مالیک ایفاسینی، دولغون زنگوله‌لرینی ائشیدیب اونون اوچون مخصوصی اولاراق "قاراگؤز»، "شفقت باجیسی» و س. ماهنیلاری یازیب. ت.ایسماییلووانین اؤزونه‌مخصوص اوسلوب‌دا اوخودوغو "قطار»، "خاریج سگاه»، "شاهناز»، "کوردون گؤزه‌لی»، "یئری، دام اوسته یئری»، "قاراباغ شیکسته‌سی» و س. موغام و ماهنیلار میللی موسیقی خزینه‌میزی خیلی زنگینلشدیریب.

"سنین وقارین منم»، "سن‌سه‌ن»، "جیران»، "قونشو قیز»، "سن منیمله گئت»، "چیچک» کیمی بسته‌لر ۶۰-۷۰-جی ایللرین دینلییجیلرینین ان چوخ سئودیی ماهنیلار ایدی.

دونیانین بیر چوخ اؤلکه‌لرینه - آلمانییا، پولشا، عراق، ایران، تورکییه، مصر، الجزایر و س. گاسترول سفرلرینه چیخیب و هر یئرده آذربایجان مدنیتینی لاییقینجه تمثیل ائدیب. گؤرکملی ایفاچینین اؤلکه‌میزده گنج خواننده‌لر نسلینین یئتیشدیریلمه‌سینده ده خیدمتی اولوب

ت.ایسماییلووانین موغام و ماهنیلارینین چوخو "قیزیل فوند»دا ساخلانیلیر. "کسمه شیکسته»، "یئتیم سئگاه» کیمی موغاملارین یانیق‌لی سسله ایفاسینا گؤره او، اوزولونماز ایفاچی ساییلیردی. "او اولماسین، بو اولسون» فیلمین‌ده توی صحنه‌سینده قادینلار مجلیسین‌ده موغام اوخویان دا محض توکزبان ایسماییلووادیر.

توکزبان ایسماییلووا اوزون صحنه فعالیتینی اؤز حیات یولداشی، اونو تاردا مشایعت ائد‌ن خالق آرتیستی حبیب بایرامووون اؤلوموندن سونرا دایاندیریب.
موغاملاریمیزین ماهیر ایفاچیسی توکزبان ایسماییلووا ۲۰۰۸-جی ایل مارتین ۲۴-ده باکی‌دا وفات ائدیب.