بو گون ۲-جی دونیا محاربه‌سی دؤورون‌ده کشفیات-تخریبات گروپونون رهبری، آذربایجان‌لی پارتیزان، سووئت اتفاقی قهرمانی مهدی حسینزادنین آنادان اولماسین‌دان ۱۰۴ ایل اؤتور.

Kult.az خاطیرلادیر کی، او، ۱۹۱۸-جی ایل دکابر آیینین ۲۲-ده باکینین نووخانی کندینده آنادان اولوب.

۱۹۳۶-جی ایلده آذربایجان دؤولت رساملیق مکتبینی بیتیریب. آردینجا، لنینگراددا خاریجی دیللر اینستیتوتوندا تحصیل آلیب. ۱۹۴۰-جی ایلده یئنی‌دن باکییا قاییدیب. آذربایجان دؤولت پداگوژی اینستیتوتوندا تحصیلینی داوام ائتدیریب.

۱۹۴۱-جی ایلین آوگوستوندا اوردویا چاغیریلیب. مهدی حسین‌زاده تیفلیس حربی پیادا مکتبینی بیتیردیکدن سونرا جبهه‌یه یوللانیب. مینومیوت تاغیمینین کوماندیری کیمی ایستالینگراد دؤیوشونده اشتراک ائدیب. کالاچ شهری اطرافینداکی قانلی ووروشمالارین بیرینده آغیر یارالاناراق، آلمانلارا اسیر دوشوب. آلمانییایا گؤندریلن مهدی حسین‌زاده بئرلینده اوچ آیلیق ترجمه‌چی کورسلاریندا اشتراک ائدیب و آلمان دیلینی اؤیرنیب.

۱۹۴۳-جو ایلین سونلارین‌دا مهدی حسین‌زاده بیر دسته آذربایجان‌لی اسیر ایله فاشیست اسارتین‌دن قاچاراق، یوگوسلاوییا و ایتالییا پارتیزانلارینا قوشولوب. او، خصوصی تخریبات-کشفیات دسته‌سی یارادیب. هیتلرچی ظابط فورماسی و یوخسول کندلی لیباسیندا آدریاتیک ساحلین‌ده شهر و کندلری سربست گزیب. پارتیزانلارا لازیم اولان کشفیات خبرلرینی توپلاییب. اونون عملیاتلاری نتیجه‌سین‌ده مینلرله فاشیست محو ائدیلیب، اونلارلا دمیر و شوسئ یولو کؤرپوسو، چوخلو فاشیست آوتوماشینی سیرادان چیخاریلیب.

۱۹۴۴-جو ایل نویابرین ۱۶-دا مهدی حسین‌زاده پارتیزان بیرلشمه‌سی قرارگاهینین تاپشیریغی ایله فاشیستلرین بؤیوک حربی سورسات آنبارینی پارتلادیب گئری قاییدارکه‌ن، فاشیست کئشیک‌چیلری ایله اوز-اوزه گلیب. قهرمان دؤیوشچو خیلی فاشیست اؤلدوروب. لاکین دؤیوشرکن آغیر یارالانیب.

«میخایلو»لقبلی ایگید پارتیزان چوخلو قان ایتیره‌رک هلاک اولوب.

قید ائدک کی، مهدی حسین‌زاده حربچی اولماقلا یاناشی، هم ده گؤزل رسام‌لیق و شاعرلیک فیطری ایستعدادینا مالیک اولوب.

۱۹۵۷-جی ایل آپرئلین ۱۱-ده اس.اس.ار.ای عالی سووئتی ریاست هئیتینین فرمانی ایله بؤیوک وطن محاربه‌سی ایللرینده فاشیست ایشغالچیلارینا قارشی مباریزه‌ده گؤستردیی قهرمانلیغا گؤره، مهدی حنیفه اوغلو حسین‌زاده‌یه اؤلوموندن سونرا «سووئت اتفاقی قهرمانی» آدی وئریلیب. حاقین‌دا مرحوم رژیسوروموز حسن سیدبی‌لی طرفین‌دن «اوزاق ساحللرده» آدلی فیلم چکیلیب.

حسینزادنین شخصی اشیالاری، گئییملری، رسام‌لیق لوازیماتلاری، رسم اثرلری، سندلری دؤولت طرفین‌دن قورونور.