بو گون دونیا شهرت‌لی موغه‌ننی، اس.اس.ار.ای خالق آرتیستی زینب خانلارووانین دوغوم گونودور.

Kult.az خاطیرلادیر کی، او، ۲۸ دکابر ۱۹۳۶-جی ایلده باکی شهرینده آنادان اولوب.

زینب خانلارووا داغلی محله‌سینده آنادان اولوب. یاسامال رایونونداکی جعفر جبارلی آدینا ۱۶۱ سایلی اورتا مکتبده تحصیل آلیب. باکی‌دا کئچیریلن شهر بدیعی اؤزفعالیت کولکتیوینده چیخیش ائدرکن مونصیفلر هئیتینین عضولری اولان – افراسیاب بدل‌بیلی، جهانگیر جهانگیروو، قمبر حسین‌لی و س. قارشی‌سیندا «آذربایجان مارالی» خالق ماهنی‌سی ایله چیخیش ائد‌ن زینبین ایفاسی بینیلیر و او، اؤزفعالیت هوسکارلارینین یکون کنسرتینه وثیقه آلیر. دؤولت فیلارمونییاسیندا باش توتان کنسرت‌ده بیرینجی‌لیک قازانیر.

او، ۱۹۵۶-جی ایلده م. صابیر آدینا باکی پداقوژی مکتبینی و ۱۹۶۱-جی ایلده آصف زینال‌لی آدینا باکی موسیقی تکنیکومونو بیتیریب. خالق آرتیستی ۱۹۶۱-جی ایلدن اوپرا و بالت تئاترینین سولیستی کیمی فعالیته باشلاییب. حاجیبیووون "لیلی و مجنون"، "اصلی و کرم" اوپرالاریندا لیلی و اصلی اوبرازلارینی یارادیب. خالق آرتیستینین رپرتواریندا موغاملار، تصنیف و آذربایجان خالق ماهنیلاری، بسته‌کار ماهنیلاری، شرق خالقلارینین ماهنیلاری گئنیش یئر توتور. زینب خانلارووا آذربایجانین قادین خواننده‌لری آراسیندا "چهارگاه" موغامینین ایلک ایفاچیلاریندان بیریدیر.

حاقین‌دا "سلام، زینب!" آدلی سندلی تلویزییا فیلمی چکیلیب. اوزون ایللر یئنی ایل باشلایان کیمی دؤلت تلویزییاسی واسطه‌سی ایله ایلک زینب خانلارووانین ایفاسی وئریلیب. او، صحنه‌میزه حرکتلیلیک و جانلیلیق گتیریب. زینب خانیما قدر ایفاچیلار یئرلریندن ترپه‌نمه‌دن اوخویوردولار. آز قالا بوتون ماهنیلاری هیته چئوریلیب.

یمن‌ده +۵۰ درجه تمپراتوردا آچیق هاوادا کنسرت وئریب. افغانیستان‌دا ایسه تانکلارین، پولمیوتلارین مشایعتی ایله کنسرت کئچیریب. افغانیستانین او واختکی رهبری نجیب‌الله طرفیندن ان یوکسک دؤلت اوردنینه لاییق گؤرولوب. کئچمیش اس.اس.ار.ای-دن، ائلجه ده آذربایجاندان یاپونییادا کنسرت وئره‌ن ایلک موغه‌ننی‌دیر.

زینب خانلارووا دهشتلی چرنوبیل فاجعه‌سی باش وئرن زامان کونسرتلریندن قازاندیغی گلیرلردن عبارت بؤیوک مبلغی ضررچکمیشلره باغیشلاییر و یاردیم سیاهیسیندا آذربایجانین آدی زینب خانیمین سایه‌سینده اؤز لاییقلی یئرینی آلیر.

گونئی آذربایجان‌دا دا حدیندن آرتیق سئویلن «یاشا، یاشا آذربایجان» ماهنیسی زینب خانلارووانین نئجه بؤیوک صنعتکار اولدوغوندان خبر وئریر.

حاضردا ۸۷ یاشی تمام اولان موغه‌ننی ۱۹۹۶-جی ایله «شهرت»، ۲۰۰۸-جی ایلده «استقلال»، ۲۰۱۶-جی ایلده "حیدر علیئو" اوردنینه لاییق گؤرولوب.