بو گون آذربایجانین کینو و تئاتر صحنه‌سینده ماراقلی اوبرازلار گالرئیاسی یارادان گؤرکم‌لی آکتیور، خالق آرتیستی مصطفی مردانووون آنیم گونودور.

Kult.az خبر وئریر کی، او، ۱۰ مارت ۱۸۹۴-جو ایلده گونئی آذربایجانین مرند شهرینده آنادان اولوب.

هله اوشاق ایکن عائله‌سی تیفلیسه کؤچوب و ۱۹۲۴-جو ایله قدر بورادا یاشاییبلار. آتاسی هاشیم کیشی اوغلونو عالی تحصیللی ضیالی کیمی گؤرمک ایسته‌ییب. بو آرزو ایله ده اونو تیفلیس گیمنازییاسینا تحصیل آلماغا گؤندریر، اما مصطفی تئاترا داها بؤیوک ماراق گؤستریب.

عالی تحصیل آلماق آرزوسو ایله مسکوایا گئدن گنج آکتیور اورادا دؤولت تئاتر صنعتی اینستیتوتونا داخیل اولور، مشهور صنعتکارلاردان بو پئشه‌نین اینجه‌لیکلرینی اؤیرنیر. او، ۱۹۲۴-جو ایلده مسکوا دؤلت تئاتر صنعتی اینستیتوتونو بیتیره‌رک باکییا گلیر، عمرونون سونونادک آذربایجان دؤلت درام تئاتریندا چالیشیر.

مصطفی مردانووون یاراتدیغی روللاردا کلاسیک عنعنه‌لر چوخ گوجلو اولور. اونون اطرافیندا بؤیوک صنعتکارلار چالیشیب. عباس میرزا شریف‌زاده، صیدقی روحوللا، آغاصادیق گرای‌بیلی، علسگر علکبروو و اونلارلا صنعتکاردان اؤیرندیکلری بو آکتیورون صنعت یولونا ایشیق سالیب، اونو یئنی یارادیجیلیق آختاریشلارینا روحلاندیریب. «حاجی قارا"دا کرمعلی، "یاغیش‌دان چیخدیق یاغمورا دوشدوک"ده قمبر، "نادیر شاه" کیمی روللاری تیفلیس تئاتریندا یارادان آکتیور، باکی تئاتریندا داها جدی روللار اوینامالی اولدو.

موزدور قولو (بیسمیللاه فیلم، ۱۹۲۵) اونون کینودا ایلک رولو ایدی. بو فیلم عباس میرزا شریف‌زاده‌نین ایلک رژیسور ایشی ایدی. سس‌سیز کینو نمونه‌لریندن اولان بو فیلم ۱۹۲۵-جی ایلده باکی اکرانلارینا چیخاریلیب و اورادا مصطفی مردانوو دا ماراقلی رول ایفا ائدیب. مصطفی مردانووون کینودا ایلک بؤیوک رولو ایسه "حاجی قارا" فیلمینده‌کی کرمعلی اولوب.

اونون ان اوغورلو روللاریندا بیری "او اولماسین، بو اولسون" فیلمینده‌کی "اینتلیگنت" حسن بی‌دیر. بو اوبراز مصطفی مردانووون یئنی آکتیورلوق کیفیتلرینی اوزه چیخاریب. او، فیلم‌ده‌کی چوخ گوجلو آکتیور آنسامبلی ایچریسینده اؤز مخصوصی ایفا طرزی ایله سئچیله بیلیر. خصوصیله، قوناقلیق صحنه‌سینده مشهدی عبادلا دیالوگو تاماشاچیدا خوش احوال روحییه دوغورور.

او، ۱۹۶۸-جی ایلده ۲۸ دکابردا باکیدا وفات ائدیب.