بو گون آذربایجان‌لی شاعر، پوبلیسیست، سناریست نصرت کسمنلینین دوغوم گونودور.

Kult.az خاطیرلادیر کی، او، ۲۹ دئکابر ۱۹۴۵-جی ایلده آغستافا رایونوندا آنادان اولوب.

۱۹۶۶-جی ایلده آذربایجان دؤلت اونیورسیتتینین ژورنالیستیکا فاکولته‌سینه داخیل اولان نصرت کسمنلی تحصیلینی باشا ووردوقدان سونرا آذربایجان یازیچیلار اتفاقیندا رفرنت و ادبی مصلحتچی وظیفه‌سینده چالیشیب. جعفر جبارلی آدینا "آذربایجانفیلم" کینوستودییاسیندا باش رداکتور ایشله‌یه‌ن ن. کسمنلی "دونیایا پنجره" سندلی تلویزییا وریلیشینین سناری مؤلفی و آپاریجیسی اولوب.

نصرت کسمنلی بدیعی یارادیجیلیغا ۱۹۶۰-جی ایللرین اوللریندن باشلاییب. اونون ۱۵۰-دک شعرینه موسیقی بسته‌لنیب. "بوش کندلرین هارایی"، "موضوع اوزره ایمپروویزاسییا"، "انبیزلرین کشیین‌ده"، "سووت آذربایجانینا سیاحت" و س. سندلی فیلملرین، "آفرودیتانین قوللاری"، "قاراباغ احوالاتی" بدیعی فیلملرین سناری مؤلفیدیر.

آذربایجان‌دا داها چوخ یازدیغی سئوگی شعرلری ایله تانینیب. بیر چوخ شعرلرینه ماهنیلار یازیلان نصرت کسمنلی محبت ژانریندا یازدیغی شعرلرله آذربایجان ادبیاتیندا باشقا بیر صحیفه آچیب. اونون «اوغرو اولماق ایستییرم»، «قادین اوریی»، «بیری واردی، بیری یوخ» ، «ندیر؟» و دیگر بیر چوخ شعرلری دیللر ازبریدیر.

سئویلن شاعر ۱۵ اوکتیابر ۲۰۰۳-جو ایلده تبریزده وفات ائدیب.

اوغرو اولماق ایستییرم

قوی پولیسلر ائشیتمه‌سین،

قورخولو بیر سیرر دئییرم:

چوخ‌دان‌دیر کی، بیر آرزوم وار،

اوغرو اولماق ایستییرم!…

اینسانلارین آراسین‌دان

عقیده‌سیز آداملاری،

وجدانینی پولا ساتان

نادانلاری

اوغورلاماق ایستییرم!

بو تورپاغین گوندن-گونه

نیه آرتیر دردی-سری…

دولتلرین آراسیندان سرحدلری

اوغورلاماق ایستییرم!

آخی، نه ایش گؤرموشه‌م کی،

اوغورلوق دا ایشدی باری.

من آنامین صیفتینه

واخت‌سیز دوشموش قیریشلاری

اوغورلاماق ایستییرم!…

بیری‌سینی ییخماق اوچون

ایکی‌سینین اولفتینی،

اینسانلارین اوریین‌دن

هر کینینی، نیفرتینی،

یالانینی بوندان اونا،

اوندان بونا ساتانلاری،

ایکی سئوه‌ن آراسین‌دان

او اوچونجو آداملاری

اوغورلاماق ایستییرم!

آراز آخیر…

او تایدان دا اینسان باخیر،

بو تایدان دا اینسان باخیر،

نئجه میلیون گؤزویاشلی عزیزیمی،

او حسرتلی تبریزیمی

اوغورلاماق ایستییرم!

ایندی نئجه دولتلردن

مظلوملارین آه-زارینی،

یاد تورپاقدا یاتیب قالان،

عصرلرین آرخاسیندان

قوللارینی چاتیب قالان

کربلادان فضولینین،

حلبدنسه نسیمینین مزارینی

اوغورلاماق ایستییرم!

نه گیزلدک، بیلیر هامی

تونقال چاتیب یاندیریرلار

بو جهانی.

قلبیم دئییر:

«بیر آذری مثلینی یادینا سال:

«اوغرودان-اوغرویا حلال…»

پرومتی اوغورلاییب

اینسانلارا وئرن اودو

اوغورلاماق ایستییرم!

لاپ غضبی توتسا بئله

یئرین منه، گؤیون منه

نه دئییرسیز، دئیین منه

اوغرو اولماق ایستییرم!!!