ایراندا ایلک دفعه مدنیت ناظیرلیینین اجازه‌سی ایله تورکجه یاییملان «آذربایجان و تورک تاریخی آراشدیرمالاری» آدلی الکترون ژورنال ایشیق اوزو گؤروب. آرتیق درگینین ایلک سایی تقدیم اولونوب. بیر سیرا یئنی‌لیکلر ده نظرده توتموشوق.

بو سؤزلری Kult.az-آ درگینین مدیری و باش رداکتورو توحید ملیکزاده دئییب.

اونون سؤزلرینه گؤره الکترون مجموعه‌ده یئر آلان مقاله‌لری بو عنوانا داخل اولاراق اوخوماق ممکوندور:

«یئنی‌لیک دئدیکده، نظرده توتموشوق کی، مقاله‌لر اوچ دیلده - فارس، انگلیس و آذربایجان تورکجه‌سینده یاییملانسین. ژورنالدا یئر آلان یازیلار عرب الفباسی ایله یاناشی، لاتین الفباسی ایله ده نشر اولوناجاق.
بیرینجی سایینی درج ائتمیشیک. آذربایجان تورکجه‌سینده عرب الفباسیندا یاییلیب. ایکینجی نمره‌سی ایسه فورالین سونلاریندا چیخاجاق. ایکینجی نمره‌ده لاتین گرافیکاسیندا دا یازیلارین ایشیق اوزو گؤرمه‌سی نظرده توتولوب. امید ائدیرم کی، بو جهدیمیز اوغورلو اولاجاق. ایلک دفعه‌دیر کی، بورادا آذربایجان تورکجه‌سی اسکی الفبا ایله یاناشی، لاتین گرافیکاسیندا دا درج اولونور. ایراندا، عادتا سایتلار ایکی دیلده - فارس و انگلیس دیلینده یاییملانیر».

توحید ملیکزاده-نین سؤزلرینه گؤره، ژورنال مدنی، تاریخی و آراشدیرما یازیلارینا آچیقدیر و آرزو ائد‌ن هر کس اونلارلا امکداشلیق ائده بیلر:

«بیزیم ایشیمیز، ساده‌جه، مدنیتیمیزی یایماقدیر. آذربایجانیمیزین مدنیتینی، بوردا اولان وارلیغیمیزی، یازیچی و آراشدیرماچیلاری تانیتماقدیر. بو ژورنال بیر نوع کؤرپو رولو اوینایاجاق. اینترنت واسطه‌سی ایله قورولان بیر کؤرپودو. بو، دنیانین ایسته‌نیلن یئریندن ژورنالی اوخوماغا و حتی مؤلفی ایله علاقه یاراتماغا امکان وئریر. خارجده اسکی الفبانی بیلمیرلر، لاکن لاتین گرافیکاسیندا اولان مقاله‌لری دیگر سویداشلاریمیز دا راحت بیر شکلده اوخویا بیله‌جکلر. قید ائدیم کی، آذربایجان تورکجه‌سی، انگلیس و فارسجا مقاله‌لر قبول اولونور. اودور کی، نوبتی ساییمیزادک دنیانین ایسته‌نیلن یئریندن اولان عالملریمیز، یازیچیلاریمیز اؤز مقاله‌لرینی گؤندرمه‌یه تلسسه‌لر، یاخشی اولار».