دئمک اولار کی بوتون خالقلارین میفولوگییاسیندا گوزگو تکجه معیشت اشیاسی کیمی یوخ، اینانج پردمتی کیمی دیرلندیریلیر. تورک دونیاسیندا قیز گلین کؤچورولرکن اونون اؤنونجه گوزگو آپاریلماسی (بخت گوزگوسو) یئنی حیاتین، یارانیشین باشلانغیجی آنلامینا گلیرسه، اینسان اؤلن زامان اوزرینه گوزگو قویولماسی حیاتین سونو آنلامینا گلیب.

Kult.az نه اوچون مختلیف خالقلارین عادتینه گؤره، اؤلونون سینه‌سی اوستونه گوزگو قویولدوغو باره‌ده معلوماتی تقدیم ائدیر.

هله قدیم زامانلاردان گوزگولرین میستیک قوه‌یه مالیک اولماسینا اینانیلیردی. سینیق گوزگولر بدبختلیک علامتی ساییلیردی. قدیم روما اینانجینا گؤره، گوزگو سیندیرماق ۷ ایل بلایا دچار اولماق آنلامینا گلیردی. سیندیردیقلاری تقدیرده، گوزگو پارچالارینی آخار چایدا یومالی و باسدیرمالی ایدیلر. آذربایجان خالقی دا گلینین بخت گوزگوسونون سینماسینی بدبختلیک ایشاره‌سی کیمی قبول ائدیر.

ایندیده دونیانین بیر چوخ اؤلکه‌لرینده اینانجلارا گؤره، ائوده گوزگونون هارادا یئرلشمه‌سینی دقتله سئچمک لازیمدیر. بئله کی، بوللوق، رفاه، آیدینلیق سیموولو اولان آینالاری قونشو ایله اورتاق دیوارا و یاتاق اوتاغینا آسماق دوغرو دئییل. قونشو ایله اورتاق اولان دیوارا آسیلمیش آینا اونلارین منفی انرژیسینی چکه بیلر. یاتاق اوتاغینا ایسه آسیلاجاقسا، اوندا اونو ائله یئرلشدیرین کی، چارپایی و اوردا یاتان اینسانلار گوزگوده عکس اولونماسین. اینسان پسیخولوگییاسیندا بو عکس تأثیر گؤستره بیلر. اصلینده آنلاشیلاندیر. یوخولو اینسان قارانلیقدا قالخیب گوزگوده اؤزونو گؤرسه، قورخا بیلر.

کئچک گوزگونون مییتینین سینه‌سی اوزرینه قویولماسی فاکتینا. بونون بیرینجی ایضاحی طبله باغلی‌دیر.

کلینیک اؤلوم زامانی بدن اؤز فونکسییالارینی تمامیله ایتیریر، یالنیز ضعیف تنفس فونکسییاسی قورونور. بئله وضعیتده اینسانی آسانلیقلا اؤلموش ساییب دفن ائتمک اولار. کئچمیشده حکیملر اؤلوم فاکتینی تصدیق ائتمک اوچون جنازه‌نین آغزینا گوزگونو یاخینلاشدیریردیلار. اگر گوزگونون اوزری ترلییردیسه، اینسانین هله ده نفس آلدیغینی و اؤلمدیینی بیلیردیلر. اولا بیلر کی، جنازه‌نین اوزرینه گوزگو قویولماسی عنعنه‌سی ده بونونلا باغلیدیر.

ایکینجی اینانج ایسه میستیکا ایله باغلی‌دیر.

بعضی اینانجلاردا آینانین روحلارین آخیرته گئتمه‌سینی انگللدیینه، بعضی اینانجلاردا ایسه آینانین روحو اؤزونه چکیب ساخلادیغینا اینانیلیر. بیر چوخ تورک خالقلارین‌دا بو اینانج وار. بو ایسلاملا یوخ، داها چوخ قدیم دینلرله و شامانیزمله علاقه‌لیدیر. یهودی اینانجینا گؤره، اؤلو دفن ائدیلدیکدن سونرا ۷ گون عرضینده گوزگودن ایستیفاده قاداغان‌دیر. ائوده گوزگونون اوستو یا اؤرتولمه‌لی، یا دا گوزگو دیوارا ترس چئوریلمه‌لیدیر. قدیم رومالیلاردان قالان بنزر عادت ایندی ده ایتالییادا یاشادیلماقدادیر. ایتالیانلار روحون مانعه‌لره راست گلمه‌دن راحت سیاحت ائده بیلمه‌سی اوچون مرحومون ائوینده‌کی گوزگولری اؤرتوردولر.

دئییلنه گؤره، شامانلار آینایا باخاراق گله‌جه‌یه گئدر، اؤز روحلاری اؤزلرینه گؤرونر، اورادان خبر وئرردیلر. ائرلیک خان یانیندا گوزگو گزدیرر، اونا باخدیقجا اینسانلارین روحلارینی گؤررمیش.

بیر سؤزله گوزگولر پارالل دونیا، پارالل عالمه آچیلان یول کیمی قیمتلندیریلیر.