بو گون ۱۹۹۰-جی ایل ۲۰ یانوار شهیدلرینین باکینین ان اوجا یئری اولان داغوستو پارکدا دفن ائدیلدیی گوندور.

Kult.az خاطیرلادیر کی، سووت ایمپرییاسی رهبرلیینین گؤستریشی ایله آذربایجان خالقینین آزادلیق آرزوسونو بوغماق اوچون حیاتا کئچیریلهن بو قانلی فاجعه نتیجه‌سینده ۱۴۷ نفر قتله یئتیریلیب، ۷۴۴ نفر یارالانیب، ۸۴۱ نفر قانونسوز حبس ائدیلیب.

شهیدلرین جنازه‌لری اینسانلارین چیینلرین‌ده آزادلیق میدانین‌دان بؤیوک ایزدیهاملا پایتاختین کوچه‌لریندن کئچمکله شهیدلر خیابانینا گتیریلیب، احتیراملا تورپاغا تاپشیریلیب. همین گونلر دونیا آذربایجان خالقینین گوجونو و دوشمنه نیفرتینی ایفاده ائد‌ن نهنگ بیر آکسییاسینین شاهدی اولوب.

یانوارین ۲۲-ده باکی‌دا شهیدلرین دفنی باشلانیر. میلیونلارلا اینسان کوچه‌لره، میدانلارا چیخاراق اؤز آزادلیق اوغروندا هلاک اولان قهرمانلارینا سون بورجلارینی وئرمه‌یه گلیبلر. یانوار شهیدلرینین دفن مراسمی دینی ریتوالدان چیخاراق، خالقین مسکوایا قارشی اعتراضینین نماییشینه چئوریلیر.

بو نهنگ ایزدیهامی ایداره ائد‌ن شیخ الاسلام آللاهشوکور پاشازاده ایله یاناشی، سووت تجاوزونه قارشی دیگر دینی کونفسییالارین نماینده‌لری – روس پراووسلاو کیلسه‌سی و یهودی اجماسی دا آددیملاییب. اونلار ماتم مراسیمینده چیخیش ائد‌رک سووئت رهبرلیینی و اوردوسونون بو جینایتینی آچیق متنله پیسله‌ییبلر. کرملین آرزو ائتدیی دینی آیری-سئچکی‌لیک باش توتماییب.

۴۲ گون – یانوارین ۲۰-دن مارتین ۲-دک فعالیت گؤسترن اجتماعی دفن کومیسییاسی بو مدتده شهیدلرین حاقیندا معلوماتلار توپلاییب، باکی شهر اجراییه کمیته‌سینین دفن بوروسونا تقدیم ائدیب.

۲۰ یانوار شهیدلرینین دفنینین تشکیلی و «شهیدلر خیابانی»نین خالقیمیزین مقدس آند یئری، هابئله اوجا زیارت مکانینا چئوریلمه‌سینده اجتماعی دفن کمیسییاسی موستسنا بیر رول اویناییب.

«لوس آنجلس تایمز» قزئتی ۲۳ یانوار ۱۹۹۰ -جی ایلده یازیردی:

«یانوارین ۲۰-ده و ۲۱-ده تشکیل ائدیلن یوروشلر، ۲۲-ده کئچیریلن کوتلوی دفن مراسمی هر جور میتینقلری قاداغان ائد‌ن فوق‌العاده وضعیته قارشی آچیق‌دان-آچیغا میدان اوخوماقدیر. بوتون سرت مانعه‌لره و تهلوکه‌لی نظارته باخمایاراق، غیرت‌لی اینسانلار شهیدلرین خاطره‌سینه لاییق دفن مراسیمینین کئچیریلمه‌سینه نایل اولدولار».