۲۲ یانوار افسانوی گنرال، ۲۰-جی عصرین اوزولونماز حربچی‌سی هزی آصلانووون دوغوم گونودور.

ایکینجی دنیا محاربه‌سی ایللرینی تدقیق ائد‌ن روسیالی عالیم، آکادمیک سامسونوو یازیر: «هزی آصلانوو سووئت اردوسوندا یگانه گنرال ایدی کی، «ایر‌لی» سؤزونو دئمزدی، «آردیمجا» دئیردی. دؤیوشلر زمانی ایلک اؤزو اؤنده اولوردو، آردینجا دا عسگرلری».

شاه اسماعیل خطایی – داهی استراتگ ایدی. اؤز قوشونلارینی ۱۲ یئره بؤله‌رک، آیپارا شکلینده دوزردی. بو دوزولوش ضعیف مرکزه و گوجلو جناهلارا مالک ایدی. دشمن ضعیف مرکزی ازمکله مشغول اولدوغو زمان گوجلو جناهلار دشمنی احاطه ائدیر، قوشونو محاصره‌یه آلیب دارماداغین ائدردی. گله‌جکده بو استراتگیانی هزی آصلانوو اؤز تانکلاری ایله حیاتا کئچیرجک و اونا روسلار «آسلانوو نالی» (آسلانووسکایا پودکووا) آدینی وئرجکلر.

ایلک دفعه بو تاکتیکانی تطبیق ائد‌ندن سونرا «پراودا» قزئتینه مصاحبه وئرن گنرال «جناه ضربه‌سی» باشلیق‌لی مصاحبه‌ده «شاه اسماعیلین تاکتیکاسینین اؤزللیکلری حاقیندا» دانیشیمیشدی.

روسیالی حرب تاریخچی‌سی، تاریخ علملری نامیزدی آلکسی عیسی‌یئو یازیر: «بیر دفعه هزی آصلانوو اؤز پئشکارلیغی سایه‌سینده آلمانلاری ائله قورخودور کی، دشمنلر دؤیوشه باشلامادان دؤیوش میدانینی ترک ائدیر. عسگرلرینه ان یاخین کندده اولان بوتون کند تصرفاتی تکنیکاسینی دؤیوش میدانینا چاتدیرماغی امر ائدیر. تانکلارین آراسینا بو کند تصرفاتی تکنیکالاری یئرلشدیریلیر، دینامیکلر قوراشدیریلیر، محرکلر ایشه سالینیر و ایشیقلار یاندیریلیر. تخنولوگییادا اوستونلویه مالک اولان آلمان قوشونلاری باش وئرنلردن قورخور. اونلار ائله بیلیرلر کی، مینلرله سووئت تانکی اونلارا دوغرو ایرلیلییر. سوندا گئری چکیلیرلر. بئله‌لیکله، ویلیکا شهری دؤیوشسوز آلینیر».

باشقالاری تانکدا لیوکو اؤرتوب هجوما کئچنده، هزی آصلانوو آچیق لیوکدا، بدنینی یارییا قدر چؤله چیخاراراق گئدیرمیش. او اؤزونو الله‌-ین ساخلادیغی انسان کیمی حس ائدیرمیش، اؤلومدن قورخمورموش. آکادمیک سامسونووا گؤره، آصلانوو اینانیردی کی، او، اؤله بیلمز.

دنیادا یگانه تانک کماندیری ایدی کی، کئچیلمز یئرلردن اردونو ایر‌لی آپاریردی. تصور ائدین، یگانه اولاراق هزی آصلانوو آنلاییب کی، محاصره‌ده قالمالارینین تام محرومیتله بیتمه‌سینین، تانکلارین هامی‌سینین آلمانلارین الینه کئچمه‌سینین قارشی‌سینی نئجه آلماق اولار. آغلینا گلیب کی، بری باشدان ایکی تانکی چایا باتیرسین کی، او بیری تانکلار اونلارین اوستوندن کئچیب خلاص اولا بیلسینلر.

دؤیوش گئدن زمانلاردا هزی آصلانوو بیر تانکدان باشقا تانکا کئچیرمیش کی، عسگرلر قورخماسینلار.

«هزی آصلانوو استالینگراد جبهه‌سینه - بیزه گلدی. خوش سیمالی، عقللی، قطعیتلی، اراده‌لی بیر کماندیر ایدی. اوندا گنج ایدی. اونون ۳۲، منیم ایسه ۲۰ یاشیم واردی. بیز لیتنانتیق، تانک مکتبلرینین ماذونلارییق، کورپوس یاراتمیشیق، اورادا اونون حاقیندا دانیشیب، نمونه گؤستریریک. هزی آصلانوو تجربه‌لی کماندیر ایدی. او، همیشه کورپوسدا شهرت قازانیب. استالینگراد دؤیوشونده گؤستردیی بؤیوک قهرمانلیقلارا گؤره او، سووئت اتفاقی قهرمانی آدینا لایق گؤرولدو»، - استالینگراد دؤیوشونون اشتراکچی‌سی دمیتری ایوانوویچ ریازانتسئو مصاحبه‌سینده دئییر.

گنرال هزی آصلانوو آذربایجانین مستقللیی و اراضی بوتؤولویو اوغروندا هلاک اولموش قهرمانلاریمیزلا یاناشی دفن ائدیلیب.

روحون شاد اولسون، گنرال!