تورکییه ایران‌دا پان‌تورکیزمین رواجینا استراتژی مسئله کیمی باخیر و بو اؤلکه سون ۱۰۰ ایل عرضینده "آذری" و ایران‌دا یاشایان تورکلردن سوءاستفاده ائد‌رک، ایرانی تهدید و محدودلاشدیرماغا چالیشیب.

Kult.az خبر وئریر کی، بو باره‌ده شاعر و آراشدیرماچی رضا شیبانی ایرانین "مهر" خبر آگنتلیینه مصاحیبه‌سین‌ده دئییب.

"بیزیم رقیبلریمیز، او جمله‌دن آذربایجان، تورکیه و اسرائیل پان تورکیزمه ایران اوزرینده ریچاق واسطه‌سی کیمی چوخ مهم سرمایه قویوبلار. اونلار ایران‌لی تورک دیل‌لیلر آراسیندا تورک ملت‌چی‌لی‌ینین تبلیغی اوزرینده چالیشیبلار. آدی چکیلن اوچ اؤلکه‌نین بو مسئله‌ده اتفاقی وار و بونون اوزرینده ایشلییر، حتی کتاب دا یازیرلار"،- شیبانی ادعا ائدیب.

او، آمریکالی تدقیقات‌چی و شرق‌شناس بریندا شافرین "سرحدلر و قارداشلیق؛ ایران و آذربایجان کیم‌لییی پروبلملری" کتابینین فارس و آذربایجان دیللرینده نشرینی خاطرلافاراق، بونون پان تورکیزمین تبلیغی اولدوغونو سؤیله‌ییب.

رضا شیبانی ایران‌دا آذربایجان و تورک ملی کیم‌لییی، آنا دیلی مسئله‌لرینی، بو ساحه‌ده‌کی حقوقلارین طلبینی "اسرائیلین ایرانی پارچالاماق پلانی"نین ترکیب حیصه‌سی اولدوغو باره‌ده خبردارلیق ائدیب.

پان فارسیزم جریانا منصوب‌لوغو ایله تانینا شیبانی ایرانین شمال-غرب بؤلگه‌سینده تورک-فارس مسئله‌سینین اساس مذاکیره موضوع‌لاریندان بیرینه چئوریلدینی بیلدیریب، بو بؤلگه‌ده فارس دیلینه قارشی مناسیبتین پیسلشمه‌سین‌دن ناراحاتلیق افاده ائدیب.

قید ائدک کی، تبریزلی رضا شیبانی آذربایجان‌لی اولسا دا، میلیتجه تورک دئییل. او، بیر نئچه ایلدیر آذربایجان دیلی و مدنیتینه قارشی عکس-تبلیات آپاران "آذریلر" جریانینا یاخین‌لیغی ایله تانینیر.