یاغیش سحره‌جن یاغسین شهره،

هامینین دردینی یوسون آپارسین.

قوشلار قوناق گلسین ماوی خزره،

بالیقلار ائوینه یوسون آپارسین.

۲-جی قیسمت

باکییا یاغیش یاغیر. یادیما قازاخین یاغیشلی گونلری دوشور.

اؤتن عصرین ۹۶-جی ایلینده، ایولون آخیرلاریندا رایون مسجیدینده عشا نمازینی بیتیریب، گئجه ذکرلری ائدیردیک.

بیردن گؤی گورولادادی، شیمشک چاخدی، شیدیرغی یاغیش یاغماغا باشلادی.

هامیمیز ائوه نئجه گئدجییک دئیه دردلندیک. بیرجه جوپپه‌لی، ساققاللی نقشیبندیلر اؤز عالملرینده ایدیلر:

هله لنگ-لنگ لنگم...

هله لنگ-لنگ لنگم...

ایمکله‌یه-ایمکله‌یه قونشوموز محمده یاخینلاشدیم. محمد اوندا اونیورسیتته حاضیرلاشیردی.

اکثر قازاخ گنجلری کیمی، او دا آبیتورینتلیک دؤنه‌مینی مؤمنلیکله کئچیریردی. ساکیتجه قولاغینا اییلدیم:

- ماقو، منی ائوه اؤتوررسن؟...

- قورخورسان؟

- یوخ ای، داریخیرام. تک گئتمک ایستهمیرم.

- یاخشی، آپارارام... آوارا...

علینی آتیب ساچلاریمی قاریشدیردی.

ذکریمیزی بیتیریب مسجیددن چیخدیق. یاغیش گوجلنمیشدی. محمد قولومدان توتوب «قاچدیق» دئدی. آددیملاریمیزی یئیینلدیب تزه‌جه اوزاقلاشیردیق کی، قونشوموز کمالین آرخادان بیزی چاغیردیغینی ائشیتدیک:

- دینقیش، (وای دده‌م وای، سیرر آچیلدی. یاخشی، بوینوما آلیرام: اوشاقلیق‌دا منی بئله چاغیریردیلار) منی ده گؤزلیین، دردیش!...

- تئز ائله. سویا باتدیق...

کمال ایکیجه آددیم آتمیشدی کی، آیاغی سوروشدو. آرخاسی اوسته یئره دئدی. چیغیریب آغلاماغا باشلادی. اونو تلسدیردییمه پشمان اولدوم. آغلامسینیب محمده یالواردیم:

- قوروان اولوم، آی ماقو، کؤمک ائله...

محمد اییلیب اونو آیاغا قال‌دیرماق ایسته‌یه‌نده کمال داها برکدن آغلادی:

- دیمیین، دیمیین!... قیریلدی آیاغیم... قیریلدی!...

- ا، بوش-بوش دانیشما. قیریلماق ندی؟

- یوخ اه، محمد، من بیلیرم، آیاغیم قیریلدی.

کمالین گؤز یاشی سئلله‌مه یاغیشا قاریشمیشدی:

- من اؤل‌جه‌م، پاپام-مامام یئتیم قالاجاق.

محمد گول‌دو:

- دلی اولما، دور آیاغا، آغلاما، کیشی‌سن!...

بیرتهر کمالی آیاغا قالدیریب، ائوه آپاردیق. او، یولبویو آغلادی.

تپه‌دن دیرناغا سویا باتمیشدیق. آغلاغان دوستوموزو بیرتهر کیریدیب ائولرینه اؤتوره بیلدیک.

داها یاغیشدان قورخوموز یوخدو، ایسلانا بیلدیکجه ایسلامیشدیق، سویوموز سوزوله-سوزوله یاواش-یاواش ائوه ساری اوز قویدوق.

ائویمیزه اؤتورنده محمد منی باغرینا باسیب، آغ فسیمین آلتیندان چیخان تلریمدن اؤپدو.

وعدلشدیک کی، صاباح ساعت ۶-دا گؤروشوب صبح نامازینا بیرلیکده گئدک. محمد اوزونو چئویریب گئتمک ایسته‌یه‌ن‌ده آرخاسینجا سسلندیم:

- ماقو!

- هه...

- من قورخموردوم ای، «پروستو» (سادجه) داریخیردیم. اونا گؤره سنینله گلمک ایستدیم.

محمد گولدو:

- بیلیرم. بیلیرم. گئت ائوه، گئت یات. صاباح صبح دوراجاقسان.

***

باکییا یاغیش یاغیر. یادیما قازاخین یاغیشلی گونلری دوشور.

۲۰۰۵-جی ایلین آوگوستو ایدی. نماز منی تزه‌جه آتمیشدی. اوخودوغوم کیتابلار باشی‌می خاراب ائلمیش‌دی.

معنوی بحران کئچیریردیم.

هر گون رایونون آوارالارینا قوشولوب وورماغا گئدیردیم. سحره کیمی قومار اوینادیغیمیز اولوردو.

سئودییم قیزنان گون‌ده دالاشیردیم. نه ائدجیی‌می بیلمیردیم. بیر دفعه یئنه یاغیش‌لی بیر گون‌ده ووروب، قیزا زنگ ائلدیم، تئلئفون‌دا آغزیمین قاتیغینی داغیتدیغیما گؤره «آدبوی» (قطع) وئردی.

بوگونکو کیمی یادیمدادیر: آغاپپاق اوزون قول کؤینییمی شالواریمین اوستونه آتیب قیزگیلین محله‌سینه گئتدیم.

داماغیمداکی سیگارتین منی داها دا کدرلی گؤستردیینی دوشونوردوم. گئدیب دوز قیزگیلین ائیوانینین آلتین‌دا دایاندیم:

- قره‌نفیییییللللل، من سنی سئوییییرممممممم!... ائشیدیرسن، سئویرمممممم...

آلنیمی بالکنون آیاغینا سؤیکه‌ییب آغلاماغا باشلادیم.

قرنفیلین قارداشینین تورپاق دادی وئرن تپیکلری کیریتدی منی. سونرا یومروقلار یاغماغا باشلادی اوستومه.

عمرومده هئچ بئله دؤیولدویوم اولمامیشدی. قرنفیلین آناسی منی اوغلونون الیندن گوج-بلا ایله آلدی.

کیمینله دالاشدیغیمی ائوده بوینوما آلماسام دا، آخشام هامی هر شئیی بیلدی.

ننمین یئکه‌ مه‌مه "پودروقا"لاری (قادین دوستلاری) بوتون باش وئره‌نلری بیزیمکیلرین اووجونا قویموشدولار.

سحری گون دانلاق و طعنه یاغیشی آلتیندا اؤزومو حماما وئریب، جنابت قوسلو آلدیم. ننمگیله دئدیم کی، حاضیرلاشین، آخشام سیزی بیر یئره آپاراجام.

مغریب نامازینا یاریم ساعت قالمیش اونلاری مسجیده آپاردیم.

مؤذن‌دن خواهیش ائلدیم کی، بو گون اذانی من وئریم. راضیلاشدی. میناره‌یه چیخیب اذان چکدیم.

"حیا الی صلاح " (نجاتا تله‌سین) یئرینه گلنده آغلاماق توتدو منی.

بیرتهر اذانی بیتیریب، آشاغی دوشدوم. بیزیمکیلر آغلاشیردیلار. مغریب نمازینی قیلیب ائویمیزه قاییتدیق.

سونرالار بیر ده مسجیده گئتمدیم، ائله او واختدان دا نماز قیلمیرام.

چکدییم او اذان اوشاقلیغیملا، سافلیغیملا، مؤمینلییمله ویدالاشماغیم ایدی.

***

هر دفعه باکییا یاغیش یاغاندا یادیما قازاخین یاغمورلو گونلری دوشور.

یاغیشلی گئجه‌لرده ائوه تک قاییتماق ایسته میرم. قورخمورام. داریخیرام. و گؤزلریمدن اوزومه یاغیش یاغماغا باشلاییر.

مؤولود مؤولود