تورک ائللرینین ائللیک قانونلاری ائلین سایغینلیغینی دیریلتمکدیر. یاس-دویونون، یاخشی-یامانین، گئجه-گوندوزون اکیز قارداشی آنیلمیش اولسا دا، ائللر آراسیندا «یاس یئریندن بیرباشا توی-دویون ائوینه گئتمزلر»، «هفته‌نین بیرینجی گونو یاس توتمازلار»، «آلوئرده سیفته‌نی کور ائتمزلر» کیمی دئییملر وار.

اما نیه، ندن؟ سویدان-سویا، سینه‌دن-سینه‌یه گلمیش اینانجلاری «ائل بیلیمی» آدلاندیراراق یارانان سورولاری سیرایلا بئله یانیتلاماق اولار.

۱. یاس یئریندن بیرباشا توی-دویون ائوینه گئتمزلر

یاس ائوینده اولان کدر ایستر-ایستمز یاسا گئدنین روحونا تأثیر ائدیر. یاسدان تاثیرلنمیش روحلا توی-دویونه گئتمک توی-دویونو ده تأثیرلندیره بیلر، اورادا اوغورسوزلوق گتیره، توی-دویون ییه‌سینی ده اینجیده بیلر. بو ایشلر اولماسین دئیه، ائل آراسیندا یاس یئریندن دوروب بیرباشا توی-دویون ائوینه گئتمه‌یه مجبور ائدیلسه‌لر، یا اوزه دوشوب گئتسه‌لر، توی-دویون ائوینه چاتمادان اوز‌لرینه سو وورارلار.

اونو دا قید ائدک کی، «سو» تورک اینانجلاریندا دورولوق گتیرن، آیدینلیق دوغان، یئنیلیک باغیشلایان، تمیزلیک آرتیراندیر. «اوزه سو وورماق» یا «ال-اوزو یوماق» اینسانین حالینی دییشیب روحونا ساغلاملیق باغیشلایار!

۲. هفته‌نین بیرینجی گونو یاس توتمازلار!

تورک اینانجلاریندا هر بیر باشلانیغیجی یاخشیلیقلا، سئوینج آرتیران ایشلرله باشلایارلار. بونا گؤره ده هفته‌نین بیرینجی گونونده یاس مراسیمی تشکیل ائتمزلر. مجبور اولدوقدا دا یاس ائویندن چیخانا «اوزونه بیر سو وور، چیخ»، - دئیرلر.

باشلانغیجی یاسسیز، کدرسیز ایستیرلر! باشلانغیج گونو ایشدن قالماغی دا چوخ پیس بیلرلر. «هفته‌نین اولی ایشله‌مه‌یه‌ن هفته‌نین بوتون گونو ایشله‌مه‌یه سوست اولار، الی ایشه گلمز»، - دئیرلر.

۳. آلوئرده سوفته‌نی کور ائتمزلر

باشلانغیجی یاخشیلیقدان یامانلیغا یؤنلتمه‌مک اوچون ائل آراسیندا «هر گونون ایلک آلوئرینی اولومسوز ائتمزلر، آلوئر ائد‌ن آلوئردن راضی اولماسا دا، آلوئری سحر چاغی دوکان-بازارین ایلک باشلانیغیجیندا پوزماز! هئچ اولماسا سیفته‌نی کؤر ائتمه‌سین دئیه آل-وئری بیر آیری آل-وئرله تاخلایار"

«سیفته‌نی کور ائتمک» اینانجلاردا باشلانغیجی اوغورسوز ائتمک، یاخشینی یامانا چئویرمک دئمکدیر.