بو گونلرده سوسیال شبکه‌لرده بیر درمانین رکلامینی گؤردوم. یازیردیلار کی، ارینیزین خبری اولمادان اونو معالیجه ائدین. بو چوخ کؤهنه اصولدو. ۲۰-۳۰ ایل اول ده بئله درمانلار واردی. و ارینی معالیجه‌یه راضی سالا بیلمه‌یه‌ن قادینلار بو جور درمانلاری گیزلی شکیلده الده ائدیر، ارلرینین چایینا، یئمیینه، حتی آراغینا قاتیردیلار. بو جور درمانلارلا ساغالان کیشیلر باره‌ده ائشیتممیشم. اما تانیدیغیم بیر کیشی بو درمانین سایه‌سینده شیکست اولوب. باشقا بیر کیشی ایسه ماشینین آلتینا دوشموشدو. آروادینین گیزلیجه سحر چایینا قاتدیغی درمانی ایچن بیرینجی کیشی پیللکه‌نلردن آشاغی یومبالانمیشدی.

همین آدامین ائوینده کیرایه یاشاییردیق. غربی آذربایجاندان قاچقین ایدیلر. یاخشی کی، چوخلو اوتاقلاری اولان بیر ارمنی ائوینه گیرمیشدیلر. بوتون عائله کیرایه وئریلن اوتاقلاردان الده اولونان گلیر حسابینا یاشاییردی. کیشی عمومیتله، دانیشا بیلمیردی. نیطقینی ایتیرمیشدی، یئریینده سنتیرلییردی. روح کیمی گزیب-دولاشیردی. ارینین ایچدیی، اما ساغلام اولدوغو گونلرین هسرتیله یانیب قوورولوردو قادین. دیگر یان‌دان دا سوچلولوق حسی اونو محو ائلییردی. کیشییه کؤرپه اوشاق کیمی یاناشیردی، قایغیسینا قالیردی. قاراباقارا دالینجا گزیردی.

دئییردی کی، اریمی معالیجه‌یه راضی سالا بیلمدیم. سؤز دئینده اسیردی، جوشوردو کی، سن منی آلکاش حساب ائدیرسن؟

آذربایجان کیشیلری ضعیفلیکلرینی بوروزه وئرمیی سئومیرلر. اونلارا دئینده کی، ایچکی آلوده‌چیسه‌ن، معالیجه اولونمالیسان، بونو قبول ائتمک ایستمیرلر. بیلیرلر کی، ایچکی آلوده‌چیلیگی یاخشی شئی دئییل، بیلیرلر کی، ایچنده اؤزلرینی یاخشی آپارا بیلمیرلر، عائله‌لرینی ده، اؤزلرینی ده حؤرمتدن سالیرلار. اما بونو بویونلارینا آلماق چتین اولور اونلارا. اؤزلری اؤز آیاقلاری ایله معالیجه اوجاقلارینین قاپیسینی دؤیمورلر، گلمیشم معالیجه آلام، بو خسته‌لیکدن قورتولام دئمیرلر.

نارکوتیک، سیگارئت آلودچیلییندن ده طبی یاردیم آلماقلا قورتولماق ایسته‌یه‌ن کیشیلر بارماقلا ساییلاجاق قدردی اؤلکه‌میزده.

آذربایجان‌دا ایچکی سوفره‌لرینده کیشیلر کیم داها چوخ ایچه بیلیر، کیم آخیرا قدر دؤزه‌جک دئیه یاریشا گیریرلر. ایچه بیله‌نلر ایچه بیلمه‌یه‌نلری اله سالیر. بوشالتدیقلاری بوتولکالارین سایینین چوخلوغونو قهرمان‌لیق بیلیرلر.

اما هئچ بیری ده ایچکی آلوده‌چیسینه چئوریلدیینی بوینونا آلماق ایستمیر. چونکی هم ده یاخشی بیلیرلر کی، ائل آراسیندا بئله‌لرینین حؤرمتی اولمور.

بیر عائله تانیییردیم. اوشاقلاری اولموردو. قادین بوتون آنالیزلردن کئچمیشدی، نؤوبنؤو معالیجه‌لر آلمیشدی. آخیردا دئمیشدیلر کی، سن ساغلامسان، حیات یولداشین دا معالیجه آلمالیدی. بو خبری کیشی عصیانلا، کینله، داوا-دالاشلا قارشیلامیشدی. «آخی منده نه اولا بیلر، من کیشییم! سن نئجه منیم کیشیلییمه شوبهه ائده بیلرسن؟!»- دئمیشدی. باشا دوشموردو کی، کهنه کیشیلیک آنلاییشینین مسئله‌یه نه دخلی وار؟ کیشینین ده قادین کیمی طبی کمکه احتیاجی اولا بیلر. هر شئیدن اول او دا آدامدی.

قاییداق رئکلام اولونان درمانلارا. من بیلمیرم بو درمانین رکلامی نه قدر دوزگوندور؟ بیر آدامین اؤزونون راضیلیغی اولمادان اونو معالیجه ائتمک اؤزو نه درجه‌ده دوغرودور؟ حکیم معایینه‌سی، حکیم مصلحتی اولمادان او درمانلارین قبولونا ایجازه وارمی؟ اما سوسیال شبکه‌لرده بئله درمانلارین رئکلامی گئدیر. اریمین خبری اولمادان اونو معالیجه ائلدیم دئیه دانیشیر قادینلار.

عزیز کیشیلر، اگر ایچکی آلودچیلیینیز وارسا، خانیمینیزلا دانیشین. نورمال قایدادا طبی اوجاقلارا باش وورون، کؤنوللو معالیجه‌لر آلین. سونرا اؤزونوزون خبرینیز اولمادان قبول ائلدیینیز درمانلار باشینیزا اویون آچماسین. من‌دن دئمکدی.