کئچن هفته سونو باجیملا کیتاب ماغازاسینا گئتمیشدیک. بؤیوک کیتاب ماغازاسیندا سایسیز-حسابسیز کیتابلارا باخاندا دوشوندوم کی، اینسانلار کیمی کیتابلارین دا تنهالیق دؤورو اولور.

- نئجه کی؟ – باجیم گؤزلرینی قیییب سوروشدو.

- اوخونمایان کیتابلار تنهادی. مثلاً، سن «ماستئر و مارقاریتا»نی اوخومامیسان دا. دئمک او کیتاب سن طرفدن تنها قالیب.

باجیم سوسوب باشینی آستا-آستا ترپتدی. من رفده گؤرونن، اوز قابیغیندا پیشیک باشی اولان کیتابی گؤتوروب ورقله دیم. بولقاکووون اثرلری کئچیب گئتدی گؤزلریمدن: «ماستئر و مارقاریتا»، «ایت اوره یی»... بو یئرده باجیم تئز کیتابی الیمدن دارتدی، گؤتوروب یئرینه قویدو.

- نئینیرسن؟ - عصبیلشیب تزه‌دن کیتابی گؤتوردوم. – بو کیتابی آلاق دا...

- نه اولار، آلما. بیر ده فاجعه ایسته میرم.

- نه فاجعه؟

باجیمین گؤزلرینده سامان چؤپوندن یاپیشیب بوغولماقدان خلاص اولماق ایسته‌ین آدام جانلاندی.

«ماستئر و مارقاریتا»نی اوخویاندا ۱-جی کورسدایدیم. اثرین تیلسیمینه دوشموشدوم. او زامانلار باجیم دهشتلی قورخو یاشامیشدی، ائوین ایچینده دورمادان گزیشیر، اؤز-اؤزونه آنلاشیلماز سؤزلر دئییردی. آنام، آتام یامان ناراحات اولموشدولار، بوتون گونو قیزلارینا باخیب تأسفله باشلارینی ییرغالاییردیلار. هر دفعه باجیمین ساییقلامالارینا باخان آنام اوز-گؤزونو جیریب «منه اؤلوم وئر» دئییردی.

سونرا قارداشیمین حالی خارابلاشدی. دوستلاری ایله بیر یئرده ایچیرلرمیش، قفیل اؤزونو پیس حیس ائدیب. گئجه‌نین بیر واختی ائوه گلنده ائله بیلدیک کی، اوره یی آغزیندان چیخاجاق. لهله ییردی، اوسته‌لیک رابطه‌سیز جمله‌لر سپدیریردی اطرافا. بیر-بیرینه باغلی اولمایان شئی لردن دانیشیردی: پولیس... ایچکی... نارکوتیکا... سؤیوش سؤین قیز... قارانلیقدا اوستونه گلن ماشین...

برک قورخموشدو و اؤزونو هئچ جور اله آلا بیلمیردی. ائوین دیوارلارینا یاپیشیب جیرماقلاییردی، دلی کیمی باغیریردی. آنامین اوزونو جیردیغی او منظره بوردا دا تکرارلاندی...

- نه اولار، آیخان، گئدک. آیری کیتاب گؤتور. او کیتابی آلمایاق دا. نولار... – باجیم الیمدن توتوب مؤحکم دارتیردی. – یالواریرام سنه. آلما دا...

ایکینجی کورسدا ایکینجی دفعه «ماستئر و مارقاریتا»نی اوخویاندان سونرا آتا و آنام اؤلدو. باجیم دا بوتون بونلارین سببینی او لعنتلی روماندا گؤروردو.

- بوش-بوش دانیشما. اونلار اؤلدو. بونون «ماستئر و مارقاریتا» ایله نه علاقه‌سی؟

- آخی سن دانیشیردین کی، اثر اساسیندا چکیلن فیلم‌دن سونرا دا فاجعه‌لر اولوب. یقین کی، نسه وار دا بو روماندا. نولار آلما. ائویمیزه گیرمه‌سین او کیتاب. قارداشین تزه عائله قوروب، اوشاق گله‌جک دونیایا. نولار... نولار... آلما...

بالاجا اوشاق کیمی دارتیشدیریردی منی. عینا اوشاق واختی آتامدان بانان آلماق ایسته‌یه‌نده اوندان ساللاشدیغی کیمی ساللاشمیشدی مندن.

- قیزیم، - اونا هردن بئله دئییرم. – قورخما... واللاه، بو کیتابلا علاقه‌سی یوخدور. آلاق کیتابی سیز ده اوخویون. آتاملا آنامی بو کیتاب آپارمادی کی. اونلار اؤزلری گئتدی.

- بس بیز؟ من... قارداشین؟

- هامیسی تصادفدو.
- نه اولار آلما دا. قولاق آس دا منه. ایچیمده پیس حیس وار. قورخورام یئنه نسه باش وئره.

- هئچ نه اولان دئییل.

کیتاب الیمده ساتیجییا یاخینلاشیردیم. تک-توک موشتریلر و بیر-ایکی ساتیجی دئیه‌سن غریبه دیالوگوموزدان حیرتلنمیش، دونموش ایفادیله بیزه باخیردیلار.

- ائئئ... یوخ... آلمایاق... من ایسته میرم او کیتابی. سن ایکی دفعه اوخوموسان.

باجیم یئنه قولومدان دارتیب اؤز یئریمه قایتاردی. او روسلارین مشهور فیکرینه ایشاره ووروردو: «ماستئر و مارقاریتا»نی اوچونجو دفعه اوخویان آدامین باشینا میستیک حادثه‌لر گلیر».

- ایکی دفعه اوخودون باشیمیزا نلر گلدی. بوراخ او کیتابی. بسیندی. بیر ده کیمیسه ایتیرمک ایسته میرم.

گؤردوم کی، زارافات ائلمیر. اوزو بوز کیمیدی، ائله بیلدیم سویودوجونون قاپیسینی آچمیشام. باخیشلاری اوشوتدو منی.

- باخ، ساکیتلش. جاماعات بیزه باخیر. اؤزونه گل.

- باشقا کیتاب آلاق. نیه موطلق او کیتاب اولمالیدی؟

- ایسته ییرم، اوچونجو دفعه اوخویوم. اوره ییم چکیر.

- غلط ائلییرسن.

صحبتدن ایستیفاده ائدیب کیتابی الیمدن قاپدی و پنجه‌سی اوستونه قالخیب بالاجا بویو ایله لاپ یوخاری قویماغا چالیشدی. کیتاب قفیل یئره دوشدو. باجیم بالاجا الینی اوره یینه توتدو: «الله باغیشلا» – دئیه پیچیلدادی. گولومسونوب کیتابی گؤتوردوم و غریبه‌دیر کی، اثرین بو یئری آچیق قالمیشدی: «سن بیلمیرسنمی کی، ال یازمالار یانمیر؟» بو ایبلیسین ماستئره دئدیی سؤزلر ایدی. باشیمین اوستوندن باجیم دا بو جمله‌نی اوخودو و قورخموش گؤزلری ایله منه باخدی: «گؤرورسن؟»
ائله بیل اؤز سؤزلرینین همده‌مینی تاپمیشدی.

- ال یازمالار یانمیر دئییر. خلاص یوخدو یعنی. باشیمیزا بو قدر شئی لر گلدی. بو رومانین بلاسی‌دیر هامیسی.

- یاخشی گؤرک.

- آلمایاجاییق هه؟

- هه، یاخشی.

کیتابی یئرینه قویدوم، اوز قابیغینداکی پیشیک منه گؤز ائله دی.