تبریز حبسخاناسی تپه-تیخما دوستاقلارلا دولودور. محکوملارین حبس اولونما سببی داها چوخ نارکوتیکله باغلیدیر. کیمیسی چکن، کیمیسی آتان، کیمیسی ساتان...

اؤلکه‌نین ان دیرلی وارلیقلاری اولان گنجلر ایستر-ایستمز بیر گون حبسخانا کونجونده سارالیب سولور.

ایکینجی قروپ دوستاقلارا اوغرولار، فیریلداقچیلار، آوارالار، اودلو-اودسوز سلاحلار ایله اؤزلرینین و اؤزگه‌لرینین یاشاییشینی تام دییشیب، فلاکته اوغرادانلار، ان تهلوکه‌لی قروپلار ایسه ایپ آیاغیندا اؤلوم گونلرینی سایانلاردیر. بونلار ناموسلا باغلی دار آغاجیندان آسیلمالیدیرلار.

من ایسته میرم، بو اوچ قروپون هامیسینی حاقلی ساییب حکومتی قینایام، آنجاق واختیندا بیر چوخلارینا ایش-گوج اوچون شانس یارانسایدی، ایندی یئرلری حبسخانا یوخ، عائله‌لری ایله بیرلیکده، نه بیلیم، هانسیسا باغ-باغچالاردا دئییب-گولوب، شنلیک ائتمک اولا بیلردی.

سون قروپ ایسه محکوم بیلینمه‌ین بیر دورومدا دوستاقدیرلار. حکومت اونلارا «سیاسی محبوس» آدینی وئرمکدن بئله قورخور، اونا گؤره ده اونلار اوچون آیریجا بیر بؤلمه یوخدور. نیه آخی ایرانین جینایت مجلله‌سینده سیاسی دوستاق بؤلمه‌سی آچیلیب. اؤلکه‌نین باشچیلاری ایله سؤیوشله، کوبود داورانانلار سیاسی دوستاق ساییلیرلار! گؤره‌سن، دوشونن بیر یازیچی، شاعر، ژورنالیست و ...

سؤیوش دیلینه گتیررمی؟

بئله چیخیر کی، اؤلکه رهبرلیینین اونوانینا خوشاگلمز ایفاده‌لر ایشلدیب، پیس داورانیش نوماییش ائتدیره‌نلر سیاسیلردیر.
الله بیزلردن ایراق ائتسین.

بس بیز نیه حبسده یدیک؟

محکمه و تهلوکه‌سیزلیک قوه‌لرینین باشچیلارینین دئدیینه گؤره، بیزلر میللی امانتی تهلوکه‌یه سالمیشیق! چوخ ساده، ائله، باخ بو یازیلارا تای بیر چوخ جیزما قارالاریمیز ایله...