اؤتن اون ایلده اورمو والیبال کوماندالاری ایران والیبال لیگاسیندا ۸ دفعه اوچونجو، ۲ دفعه ایکینجیلیک الده ائتسه‌لر ده، بوگونه قدر چئمپیون اولماییبلار. تبریزین «تراکتور» کومانداسی دا عینی عاقیبتی یاشاییر. ایرانی ایداره ائد‌ن سیاسی گوجلره گؤره، آذربایجانی تمامیله یوخ سایماق زیان وئره بیلر، اما اونو قهرمانلیق روتبه‌سینه قالدیراندا دا ایرانین دؤرد بوجاغیندا داغینیق حالدا آلچالیب یاشایان تورکلرده باشی اوجالیق حسی دوغورار. بو، هئچ ده ایرانین «آلچالت، یؤنلت» سیاستیله موافیق اولماز.

ایدمان، سیاست، اینجه صنعت، علم ساحه‌سینده آذربایجانلی و تورکلرین قازاندیغی اوغورلار مئدیالاردا بایکوت ائدیلیب، گیزلین ساخلانیلیر، اما نگاتیو کاراکترله تانینمیش آداملارین هانسی اتنیکه باغلی اولدوغو دیللر ازبری اولور.
اؤرنک اوچون بوگونه قدر قادین ایدمان ساحه‌سینده ایرانین یئگانه اولیمپییا مدالینی قازانان کیمیا علیزادنین تورکلویو مئدیالاردا بایکوت ائدیلیر، اما دوپینگه محکوم اولموش ایدمانچینین اردبیللی اولدوغو هر گون تکرار سؤیلنیلیر. لطفی زاده‌نین اردبیللی اولدوغو گیزله‌دیلرک، صادق خلخالینین تورک اولدوغو سؤیلنیلیر.

گونو-گوندن بیزیم منلیک حسیمیزی یوخ ائد‌ن سیاست بودور!