صمد وورغونون محمد امین رسول‌زاده‌یه «شارلاتان» دئمه‌سی، یقین، چوخلارینا معلوم‌دور. یقین، او دا معلومدور کی، رسول‌زاده ۱۹۵۰-جی ایلده وورغون حاقدا یازدیغی مقاله‌ده اونو یوکسک ایستعداد صاحبی کیمی قیمتلندیریر.

یازیچی کرامت بؤیوک چؤلون شاعر خلیل رضا اولوتورک حاقدا یازدیغی سؤزلر ده، یقین، چوخلارینا معلوم‌دور. یقین، او دا معلوم‌دور کی، بیر قروپ اینسان کرامت بؤیوکچؤلون دریسینی بوغازیندان چیخارماغا حاضردیر.

یوخ، مقصدیم شخصلر آراسیندا دئییل، تاریخ آراسیندا موقاییسه آپارماق‌دیر.

***

کرامت بؤیوک چؤل هارادا یانلیش ائتدی؟

۱. اولجه اوندان باشلایاق کی، بؤیوکچؤلون خلیل رضانین شعیریاتینا یاناشماسی کؤکون‌دن یانلیش‌دیر. خلیل رضا پوئزییانین یوخ، خالقین، میدانین، تریبونانین شاعری ایدی. بو معنادا اونون شعیرلرینده واقیف بایاتلی، علی کریم، فضولی پوئتیکاسی آختارماق ناشیلیق‌دیر. خلیل رضا اوسلوب و پاتئتیکاسی ایله تام فرقلی یارادیجیلیغا صاحب‌دیر، توتاق کی، مایاکووسکی ایله موقایسه اولونا بیلر. خلیل رضا اینقیلابین، میللی کیملیین، آزادلیغین سسی‌دیر، ایفاده‌سی‌دیر، تریبونادان قانلاری جوشدوران اؤزونودرک‌دیر؛ خلیل رضا خالقین همین دؤورده‌کی دوشونجه‌سی‌دیر، فیکری‌دیر.

خلیل رضا یاشام طرزی‌دیر، خالقین اویانیش دؤورونون سیموولودور. اونون شعیرین‌ده فضولی پوئتیکاسی آختارماق و خلیل رضایا او پریزمادان یاناشماق ساوادسیزلیق‌دیر.

۲. کرامتین خلیل رضانی، بیر نؤو، «ک.ق.ب آگئنتی» آدلاندیریب قاراباغ ساواشینی قیزیشدیرماسین‌دا اتهام ائله مه‌سی دوستوموزون سیاسی پیادالیغینی اورتایا چیخاردی. خلیل رضادا سیاسی اوزاق گؤره‌نلیک آختارماغین آدی هله تاپیلماییب. سونو دوشونه‌ن سیاست‌چیلردیر، خلیل رضا ایسه قهرمان‌دیر، اونلار سونو دوشونمزلر!

۳. خالق شاعرینین اوغلو تبریز خلیل بی لی نین محض آتاسینین قازدیغی قویویا دوشمه‌سی فیکری... بو روسوایچی ایفادنین ده هله آدی یوخ‌دور. هر شی بیر طرفه، چوخلارینین اؤلکه‌دن قاچدیغی بیر واختدا تبریز خلیل بی لی نین ساواشا قاتیلاراق، ان آغیر دؤیوشلرده ایشتیراک ائتمه‌سی اونون و آتاسی خلیل رضانین هانسی تفککورله، هانسی ایده‌آللارلا یاشادیغینین گؤستریجیسی‌دیر.

آخی، بو آدام اوغلونا آذربایجانین معنوی پایتاختینین – تبریزین آدینی قویوب. آخی، تبریز اؤزونو قاراباغا قوربان وئریب.

بو او دئمک‌دیر کی، خلیل رضا دوشوندویو کیمی یاشاییب، یازدیغی بویدادیر و یازدیقلاری ایله یوخ، هم ده حیاتی ایله هامیمیزا نومونه‌دیر.

***

بورا قدر تامام. ایندی گلک خلیل رضانین سئودیی خالقین (خلیل رضانی سئوه‌ن خالقین یوخ هاا!) کرامت بؤیوک چؤلو اعدام ائتمک ایسته‌مه‌سینه.

سیزجه، خلیل رضا ساغ اولسایدی، کرامت حاقدا نه دئیردی؟ ایستیردیمی کی، سیز اونو بو شکیل‌ده سؤیسینیز، تهدید ائدسینیز، ایشده‌ن چیخارتدیراسینیز، سفیل گونونه سالاسینیز؟

کرامتی شاققالاییب، هر تیکه‌سینی نیزه‌یه کئچیرمه‌یه حاضر اولانلار، اونو سورگون ائتدیرمک، یاخود ایشده‌ن قوودورماق ایسته‌یه‌نلر، سیزین خلیل رضادان خبرینیز وارمی؟ «داوام ائدیر ۳۷»-نی اوخوموسونوزمو؟

سیزلر کرامتین عائله‌سینی بو ایشه قاتماقلا، اونون بالاسینی آج قویماغا چاغیریش ائتمکله «۳۷-نی» داوام ائتدیریرسینیز، خبرینیز وارمی اؤزونوزدن؟

خلیل رضا بونومو ایستییردی؟ گویا سیزلر خلیل رضایا دوغرو آسپئکتدنمی یاناشیرسینیز؟ خلیل رضانی درکمی ائدیرسینیز؟ اونون یاشادیغی و تبلیغ ائتدیی ایده‌آللاردان معلوماتلیسینیزمی؟

***

یئکون:

صمد وورغونون تحقیری رسول‌زاده‌دن هئچ نه آپارمادی، رسول‌زاده هئچ کیمین گؤزوندن دوشمه‌دی. عکسینه، داها دا بؤیودو.

چونکی رسول‌زاده صمد وورغوندا «سیاسی اوزاق گؤره‌نلیک» آختارمیردی، بیلیردی کی، صمد وورغون بو خالقین شیرین دیلی، پوئتیک ایستعدادی‌دیر.

خلیل رضانی سئویرسینیزسه، خلیل رضادان، رسولزاده نی سئویرسینیزسه، رسول‌زاده‌دن نومونه گؤتورون: آدامین یانلیشینی دئیین، تنقید ائدین، اؤیردین...

اما بس‌دیر ۵۰۰ ایلدیر «۳۷-جی ایلده» یاشادیغینیز! میللتین یئتیشدیردیی گنج ایستعدادلارا صاحب چیخین، تربییه ائدین، اؤزونوزونکو ائدین، اوجالدین...

اورگانیزم‌ده بیر هوجئیره بیر مقامدا «یانلیش ائد‌نده» اونو درحال کسیب توللاماق اوچون الده‌ن-آیاقدان گئدیرسینیز. سهییه‌نیز ده بو «دوشونجه‌ده‌دیر».

کسه-کسه، آمبوتاسییا ائده-ائده بو میللتی شیکست ائتمه یین!

یئری گلمیشکه‌ن: خلیل رضانین لئکسیکونوندا "آگئنت"، "شارلاتان"، حتی "بیشرف" سؤزو ده واردی و تریبونادان سسلندیرردی. آنجاق میللی دوشمه‌نلرین عنوانینا...