یازین آخیرلارییدیمی، یایین اوولیدی‌می، عذر ایستییرم، گئجه قونشودان غریبه بیر سس گلدی. دوشدوم سسین دالینجا من. قولاغیمی دیواردا سوروشدوره-سوروشدوره، سوروشدوره-سوروشدوره چیخدیم اوزو تاوانا من، گاه دا قفیل دوشدوم یئره. بو دیواردان او دیوارا، عذر ایستییرم، باشقا دیلده، باشقا جوره...

سونرا اؤیرندیک، گنج بیر آلمان عائله‌سی‌دیر، عذر ایستییرم، قادین ائودار، ار شیرکتده موهندیس. بیر ده ۲ یاشی اولا-اولمایا هئلما وار، بونلارین ایزدیواج مئیوه‌سی، ساپساری بیر قیز.

او بیری قونشو دا، - محمودلا سوئتانی دئییرم، - قونوم-قونشونون، قوهوم-عقربانین «بی شی-می شی وار» سوالیندان بئزیب بیر اوشاق دوزلدیب. ائله تخمیناً هئلما یاشیندا، بیر آز بویو اوندان کم، اما اتلی-قانلی، یوپیومرو. آدی گؤزل، اؤزو گؤزل شفیقه.

هاوا یاخشی اولدومو، منی ائوده تاپاممازسان، یا ائیواندا کیتاب اوخویارام، یا سیقارئت چکرم سمایا باخیب، یا دا محله‌نین باشینداکی «زاور دوست کافه»ده چای خورتولدادارام بوش قارینا.

کئچه‌ن هفته ائیواندایام، قفیل گؤردوم بیزیم هئلما، آناسی - الینده آلما، او طرف‌ده سوئتا باجی شفیقیله - حیطده‌کی اوشاق-ایله‌نجه پارکیندا اوتوروبلار اوزبوز.

سونرا اوشاقلار جوککولدشدیلر، فینگیلدشدیلر، بیری «قا» دئدی، بیری «قوو»، یاخینلاشدیلار، گولدولر. دئیردین، چمنلیک‌ده گولدورلر. گؤرونور، اوشاقلاردان اؤترو بیر تفاووت یوخدور. دیل آیری، دین باشقا، هره‌نین اؤز دونیاسی، هره‌نین اؤز مایاسی. اوشاقدی دا، نوردو قایه‌سی.

عذر ایستییرم، - قوناق‌دیر، یوخسا آدینی یازاردیم، البت. اؤزو ده من ائیواندان باخیشلاریمی تیلوو تک قادینلارین اوسته آتیب توستوله‌نمیردیم، لاپ ائله سوئتا باجی اولسون، بیر الله شاهیدیمدیر، اوشاقلارا باخیردیم، یان-یؤره‌ده اونلار دا دییردی گؤزومه هردن. او دا بیر باجیتک، دوغما کیمی – آلمان قادین، گؤرورسن، بودون-سینه‌سینی چؤلده قویور، سیقارئت چکیر، اما سن بیلدیین قادینلاردان دئییل، البت.

باخدیم، باخدیم و بیر حقیقت حاصیل اولدو مندن اؤترو: دونیانین هر یئرینده اوشاقلار عینی‌دیر، آنالار فرقلی.

موشاهیده‌می پایلاشماق اوچون آنالاری شرطی اولاراق ایکی یئره بؤلورم: آلمانکا و سوئتا. بئله: آلمانکا آوروپا آنالارینین عومومیلشمیش آدی‌دیر، سوئتا تیپیک آذربایجانلی.

۱) سوئتا تئزه جانلی‌دیر. اوشاقلار اوچون نردیوان اولمورمو، بو یاندان چیخیب، او یاندان دوشورلر رئزین توپلارین اوسته، - فیکیر وئردیم، ایمکان وئرمه‌دی اوشاغا کی، اؤزو چیخسین آخیراجان، قوجاقلاییب سورودو هر دفعه. اما آلمانکا گؤزله‌دیر، بلکه ده ۳۰ دقیقه اوشاق ییخیلدی، یومالاندی، او دا صبیرله باخدی. اما چیخدی اوشاق نردیوانا کؤمکسیز. (فیکیر وئرین، ۱۸ یاشیندا یئرلیمیز بیر چیین اولماسا، الیندن توتانی یوخدورسا، حیاتین ائنیشینده-یوخوشوندا تنگنفس اولاجاق، باشینی ایتیره‌جک، ایتیره‌جک، ایت‌جک...)

۲) سوئتایا گؤره، اوشاق اونا تابع‌دیر، آلمانکایا گؤره هره‌سی بیر فرد. (فیکیر وئرین، بیزیم آتالاریمیز، آنالاریمیز بعضن بیزی فرد اولاراق اونودورلار. اونلارین دئدیکلری آکسیوم اولور، قرارلاری یئریمیزه اونلار وئریر، سئچیملری اونلار ائدیر).

۳) سوئتا اؤزونه صرف ائد‌نده، یا دا اوشاغی ساکیتلشدیرمک‌دن اؤترو قویدوغو قاداغالاردان واز کئچه، اونلاری دییشدیره بیلر. مثلاً، تئلئویزور سئیر ائتمک، تلفونلا اویناماق، کومپوتر و سایر. آلمانکا ایسرارلیدی، قطعی‌دی، دقیق‌دی. سوئتا اوره یی یوخادی، اوشاق آغلاسا، قییماز اونا، یومشالار. آلمانکا داش قلبلیدی، سویوققانلیدی. آغلاماقلا، سیزلاماقلا مانیپولیاسییا ائده بیلمز اوشاق اونو. (فیکیر وئرین، دوست-دوشمن تانیمیریق، اوره ییمیزین آغزی مسجید قاپیسی تک همیشه آچیق).

۴) سوئتا اوشاغی ندنسه چکیندیرمک اوچون قورخودور: «جیزززا»، «خوخودوووو، هاپ ائلیر سنی»... آلمانکا ایسه ایضاح ائدیر. (فیکیر وئرین، پولیس‌دن ده، الله‌دان دا قورخوموز گنتیک کئچیر، اصلینده، سببلر آیدین دئییل. او قدر «اولماز» دئییبلر کی، سورغولایا بیلمیریک، ائله جه وردیش حالیندا تعظیم ائدیریک...)

۵) سوئتا ائله بیلیر کی، دونیانین ان یاخشی آناسی اودو، اما آلمانکانین ائله بیر ادعاسی یوخدو. (فیکیر وئرین، سونرا ارین‌دن، والیدئینلریندن باشقا بوتون حقیقتلره خیانت ائد‌ن آدام یئتیشیر. یاخشی اینسان اولماق اوزینه، یاخشی آنا اولور سوئتا...)

۶) سوئتا اوشاغی کلم کیمی قات-قات گئییندیرر، پاپاق، الجک اؤز یئرینده. هله بئلینده‌کی اسکینی دئمیرم. آلمانکا چوخ دا قورخماز سویوقدان. (فیکیر وئرین، بیر یونگول مئه اسسه، قریپ اولار، خسته دوشر بیزیم طیفیل. علی اکبر دئمیش، آذربایجانلییا همیشه سویوقدور...)

بو، منیم ایکی سیقارئتلیک موشاهیدمدیر. ائشیتدییم یوخ، گؤردویوم‌دور.

اونوتمایاق، والیدئین اوشاغی نئجه تنبئه له‌سه، هانسی جور جزا وئرسه کؤرپه‌سینه، او طیفیل ده کوکلاسینا عینی جور جزا وئریر، عینی جوره تنبئه له ییر.