۵ یاشیم وار ایدی. آتام سیگارت کؤتویو اولان کول قابینی وئردی کی، آپاریب بوشالدیم. من ده کؤتوکلری گؤتوروب ائوین آرخاسیندا زیبیل یئشیینه آتماق ایستییردیم کی، کؤتویون بیرینین هله ده توستوله‌مه‌سی منی فیکریمدن یاییندیردی. ایچیمدن بیر سس ایسرارلا او توستونون دادینا باخماق ایستییردی. اوزون مدت گؤزلریمی آییرمادان توستونون خفیف شکیلده بورولاراق یوکسلمه‌سینی ایزلدیم.

داها سونرا قورخاق و اورکک بیر شکیلده کؤتویو دوداقلاریمین کندارینا یاخینلاشدیردیم. کؤتوک دوداقلاریما یئنیجه توخونموشدو کی، آتامین ازازیل سسینی ائشیتدیم. قورخودان بالاجا اللریمین اوزون بارماقلاری بیر-بیرینه دولاشمیشدی. اؤزومو توپارلایاراق آتامین یانینا گئتدیم.

- یاخین گل

- نیه؟

-یاخین گل، آغزینی ایلییم!

- ۱ ایستکان سو ایچیب گلیرم.

- یاخین گل دئدیم!

- چوخ سوسامیشام، سو ایچیب گلیرم.

-دئمیرم، یاخین گل؟!

-آی آتا، چوخ سوسامیشام...

کی آنامین گلیب منی آتامین الیندن آلماغا چالیشدیغینی خاطیرلاییرام. چوخ عصبیلشمیشدی. ائوین آرخاسینا آچیلان نفسلیکدن منی ایزلییرمیش. دئمه، او کول قابینی دا منه مقصدلی شکیلده وئریبمیش. ۵ یاشیمدا آتامین سیناغیندا چیخا بیلمدییم، منیم اوچون قارا بولودلارلا احاتلنمیش او گونشلی گون حیاتیمین ان بؤیوک درسی اولموشدو. کیچیک بیر سیگارئت کؤتویوندن قالخان توستو همین گون اوچون ۵ ایللیک عؤمرومو دومانا بوروسه ده، او آندان سونرا هر زامان آغلیمین بیر کونجونده اونودولماز ایز قویدو. او توستو ۵ یاشیمدان سونراکی حیاتیمدا دوماندان سونرا گلن تمیز هاوا تأثیری باغیشلادی.