ایل ۲۰۱۷. مؤولودون اؤلوم خبرینی آلیرام. غریبه‌دیر کی، هئچ واخت اوزونو گؤرمدییم بیر اینسانین واختسیز گئدیشینه او قدر سارسیلیرام.

اونو دوستلارینین، ایش یولداشلارینین ایستاتوسلاریندان تانیماغا باشلادیم. آنجاق بونو دوشونوردوم: «گؤره‌سن، بو قدر سئویلدیینی بیلسیدی، یئنه ائدردی؟» آخی بو قدر سئویلن اینسان نیه جانینا قییسین کی؟

یا دا هامینین یاخشی تانیدیغی، یوزلرله اینسانی دپرسییادان چیخاران، حیاتی سئودیره‌ن دیانت رضایئوین «منی باغیشلایین» یازیب گئتمه‌سی...

نه دیانت، نه مؤولود، هئچ بیری دونیادان گئدنده بیزدن ایجازه آلمادی. بوتون سیرلری اؤزلری ایله آپاریب گئتدیلر. ائل‌جه ده کئچه‌ن ایل بینامیزدا اؤزونو آسان ۱۷ یاشلی قیزلا شاماخی‌دا ائوینین حیطینده موسیقی صدالاری آلتین‌دا حیاتلا ویدالاشان ۱۷ یاشلی اوغلان... اونلار اؤلوملری ایله کیمه جزا وئرمک ایستییردیلر؟ یقین کی، ساعتلارلا باشینی داشا چیرپیب هوشونو ایتیرن آتا منظره‌سینی گؤره‌نده بو باره‌ده داها چوخ دوشونورسهن...

اوندان سونرا «اینتیهار ضعیف اینسانلارین ایشی‌دیر» دئییمی ایله هئچ واخت راضیلاشا بیلمیرسن. نئجه ضعیف اولاسان کی، چؤلده قاریشقانی اینجیتمه‌یه قییمازکن، گوناهینی، هانسیسا ریسکلری گؤزه آلماقلا بونا اورک ائد‌سن.

یاخشی بس، حقیقتامی مقصد بیردفعه‌لیک ویدالاشماق ایدی؟ اونلار هامی‌سی بیردفعه‌لیک اؤلومومو سئچدی، یا بیز اونلارین ایمداد دیرنیشینی گؤرمزدن گلدیک؟

اونلاری بیز - جمعیت قیناق اوبیکتینه چئویردیک. یا دا قینانیلماماق اوچون بو یولو سئچدیلر.

هر زامان دئییرم: اینسان نیه لاییقدیرسه، او حیاتی یاشاییر. چونکی شعورو، آغلی ایله دوشونوب، اؤز یولونو سئچه بیلیر. اما بعضیلری آنادان بدبخت اولور. بعضیلرینی ایسه جمعیت بدبخت ائدیر. اونو آنلامایان، قینایان، مسئولیتله یوکله‌یه‌ن حیات یولداشی، سئوگیلی، والیدین، ایش یولداشلاری، سیخان، اینجیدن، اؤولادی قارشی‌سیندا بوینوبوکوک قویان جمعیت... اوست-اوسته ییغیلان فایزلر، بانک بورجلاری، ایشسیزلیک، حتی اینسانسیزلیق...

اینسانی ان چوخ اینسانسیزلیق اؤلدورور. اینسان ان چوخ الین‌دن توتوب اونو حیاتا قایتاراجاق اینسانلاری گؤرمه‌یه‌ن‌ده دونیادان گئدیر. خیاللاری قیریلان‌دا، چوخلوق ایچین‌ده بوشلوق‌دا قالان‌دا... او آن سنین یاشادیغین تراومالاری آنلایاجاق بیرجه نفر اولمایان‌دا گؤزونه هئچ نه گؤرونمور. تلفن کونتاکتین‌داکی یوزلرله آدام ایچیندن سورغوسوز-سوالسیز سنی دینله‌یه‌جک، آنلایاجاق نئچه نفرین وار؟ باخ اونلارین سایی نه قدردیرسه، صاحب اولدوقلارین دا اودور.

یوخسا کی، نییمه لازیم من اولمایان‌دان سونرا منی قینایاجاق جمعیت، دوست-تانیش؟!

هئچ کیم اؤلومه گوله-اوینایا گئتمیر آخی...

بونا ان بؤیوک نومونه یازی‌چی کنان حاجی‌دیر. آدام دفعه‌لرله ایشسیز، مادی چتین‌لیک‌ده اولدوغونو یازدی، ایجتیمایلشدیردی. مؤولوددان سونرا اینتیهار آنونسو وئریب، چیخیب گئت‌دی. بئله‌جه هامینین یادینا دوش‌دو. دؤولت قیمتلندیردی، ائو وئردی. دی گل، ۴ دیوار آراسین‌دا اوتوروب عائله ساخلاماق دا اولمور. اونون دا وضعیتینی ائله «ائوینین ایچی» اولان یاخین دوستلاری بیلیردی. قیسا مدت‌لی ایشله تعمین اولون‌دو، حاضردا یئنه ایشسیزدی. یقین کی «دوست»لاری، سلاهیت‌لی بیریلری یئنه گؤزلییر کی، یاخشی آدام اینتیهار آنونسو وئرمز، ائله گئدر اینتیهار ائدر! یاخشی آدام «منه ایش وئرین، عائله‌می دولاندیریم» دا دئمز، یاخشی آدام قاپی‌سینی باغلاییب، آجیندان اؤلر!

بو دا جلیل جوانشیر...

سون ۳ ایلدیر حیاتیمین ان آغریلی خبرلرینی یوخودا آلیرام. او زهریمارا قالمیش تلفن چالیر و او زنگده ان دیرلیلریمی بیر-بیر ایتیریرم. اونا گؤره ده یوخودان اویادان بوتون تلفن زنگلرینه نیفرت ائدیره‌م.

جلیلین اینتیهارا جهد خبری ده بئله ایدی. داها دوغروسو، خبر یانلیش وئریلمیشدی. «جلیل جانلی یاییمدا اینتیهار ائتدی»، - دئییلدی.

جلیل دفعه‌لرله اینتیهارا جهد ائتدیینی اؤزو ده دئییب. دوزو، هئچ من ده بونو او قدر جدی حساب ائتمیردیم. سون ۱ ایلده ائله بیلیردیم، او آدام ائله اینتیهارا دوغرو گئدن یولو سئویر، عادی قبول ائدیر، اما اطرافینداکی هر کسی ده بوندان قوروماغا چالیشیر. اما همین اطرافین اکثریتی «پروبلمین وارمی، نه کؤمک ائدک» دئمک یئرینه، «شاعر، گئدک ایچک» دئدی. بلکه ده اونون ساده‌جه دینلنیلمه‌یه احتیاجی وار؟! اما دوست دئدیکلریندن ۲ گونده نئچه نفر جلیلی سیلدی؟ بس نئچه نفر اونون بو وضعیته دوشمه‌سین‌ده آز دا اولسا اؤزونو قینادی؟

اینتیهاری هانسیسا فورمادا دستکله‌مک، یا حاق قازاندیرماق اصلا اولماز. ان آزیندان بیزیم ایشیمیز دئییل. ائلجه ده اونلاری تمامیله جمعیتدن تجرید ائتمک، قیناماق، آشاغیلاماق دا اینسانلیقدان دئییل.

اما ان آزیندان بو اینتیهارلار، یا اینتیهارا جهدلر هامیمیزی آز دا اولسا سیلکلییر. اطرافیمیزا، حیاتیمیزداکی اینسانلارا داها چوخ واخت آییرمالی اولدوغوموزو یادا سالیر.

ائله اینتیهارلا باغلی معلوم ایستاتوسومدان سونرا منی اوتاغینا چاغیریب، دفعه‌لرله «نئجه‌سن؟» سوالینی وئریب، مؤوضوعیا نئجه باشلایاجاغینی دوشونن رداکتوروم کیمی. ایشلرین چوخلوغوندان چوخوموزون اوزونو گونلرله گؤرمه‌یه‌ن، حتی اؤولادلارینا سایتیندان داها آز واخت آییران بیری ده قیناییردی اؤزونو، «سیزه واخت آییرا بیلمیرم» دئییردی.

تکی بیزی بو اینتیهارلار سیلکه‌له‌مه‌سین، عائله‌میز، عائله بیلدییمیز عزیزلریمیزین بیر گون یوخ اولما دوشونجه‌سی صادق ساخلاسین.

بیر ده مندن سیزه مصلحت (بؤیوک چیخماسین)، ائله کی گؤردونوز اؤلورسونوز، چیخین گئدین. اوزاقلاشین... سیزی سیخان، اینجیدن، آنلامایان جمعیتدن موقتی ده اولسا، اوزاقلاشین. اینسانلارا سئوگی وئرین، بول گولومسیین، یاخشی‌لیق ائدین، اؤزونوزو فایدالی حس ائدین. اینسان ان چوخ فایداسیز حس ائتدیینده الینی حیاتدان اوزور...

اینتیهارا جهد اصلینده بیر کؤمک هایقیریشیدیر. بو هایقیریشا سس‌سیز قالمایین. بعضا تانیمادیغینیز بیرینه ده واختینیزی آییرین، دستک اولون. فایدالی اولماق، حیات انرژیسی وئرمک سیزه داها چوخ یاشام انرژیسی قاتاجاق.

بیر ده چالیشین حیاتدا هدفینیز اولسون. مثلاً، دئیین کی، من سعادتی گؤرممیش، نیه اؤلمه‌لییم؟ گؤردونوز کی، یاشایا بیلمیرسینیز، یاشاتماغا چالیشین. اگر هر قارانلیغین آیدینلیغا چئوریلن سحری وارسا، سحری گؤزله‌مه‌دن گئتمه ایستیی نیین لوکسودور؟