نئجه سؤیله‌مک | ایوازطاها

سئوگیلینیزه گول چلنگی آپارماق ایسته‌دیکده نه‌لره فیکیر وئریرسینیز؟ بوردا سیز یالنیز مضمونلا کیفایتلنمیرسینیز. یعنی نئجه‌گلدی بیر چیچک آپارمیرسینیز. بوندان داها اوزاغا گئدیر، گولون رنگی، چئشیدی، هانسی فورمادا دسته‌لنمه‌سی ایله ده ماراقلانیرسینیز. حتتا گول چلنگینه تاخاجاغینیز جومله ایله دقیقه‌لرجه اوغراشیرسینیز. جومله‌نیزین داها ائتکیلی اولماسینی دوشونورسونوز. فورما بوردان باشلانیر.

نئجه سؤیله‌مک نه‌یی سؤیله‌مکدن اؤنمسیز دئییل. دئیردیم فورما مضموندان داها اؤنملی‌دیر. نئجه کی، یونان کلاسیک فلسفه‌سینده نسنه‌لرین ذاتی اونلارین ووجودوندا دئییل، بیچیمینده و یا ماهیتنیده‌دیر. آنجاق بیزده گومان ائدیلیر، هانسی‌سا أثرین مضمونوندا بللی "یوکسک خئیره" ایشاره ائدیلیرسه، دانیشلان سؤز حقیقت یوکونو داشیییر. یوکسک خئیر بونلار اولا بیلر: تانری، اولوس، اؤزگورلوک، عدالت، صینیف، دموکراتیا، توپلوم و اوسته گل افلاتونون اوتوپییاسینی.

اولا بیلسین، دموکراتیانی ساوونان بیر سؤز، بیچیم باخیمیندان مستبدانه ایفاده اولونسون. بونون اوچون شوونیزمه قارشی شوونیست‌جه دانیشاماغین قباحتی شوونیزمدن آز دئییل. سؤیله‌دیییمیز "یوکسک خئیرلر" باره‌ده سرت اؤزجو [ذاتگرا] و تامچی بیر دیل له دانیشماق عدالتسیزلیکدیر، دیکتاتورانین اؤزودور.

هئچ بیر دیکتاتور اؤز چیخیش‌لاریندا دیکتاتورانی ساوونمور. اونون سؤیله‌دیکلری‌نین مضمونو آزادلیق، عدالت، اینسان یوکسکلیییندن دولوب داشیر. دیکتاتورون اووجونو سؤزونون مضمونو یاردیمی ایله دئییل، اونون دانیشیق بیچیمیندن دولایی آچماق اولار. فورما عدالت‌لی یارغیج‌دیر. أدبی أثرین مضمونو سانتیمانتالیزیمه، ایموسییایا قاپیلا بیلر، فورماسی یوخ.

بو اوزدن‌دیر کی، میلادی یئتمیشینجی ایل‌لرده‌کی ممالیک محروسه نین آزادلیق‌اوداقلی پارتیزان سؤیلمی، شاه دیکتاتوراسی ایله بیر قاپییا چیخمایا بیلمزدی. چونکو هر ایکی طرفین سؤیلمی مضمون باخیمیندان تام فرقلی ایدیسه، فورما باخیمیندان تام اوست اوسته دوشوردو. قارا و قیرمیزی ارتجاع، شاه ارتجاعسی‌نین قاچیلماز تؤره‌مه‌سی ایدی.