کمال سونالین رول آلدیغی «یاپون ایشی» آدلی بیر فیلم وار. یقین کی، خاطیرلادینیز. فیلم رستوراندا ایشله‌یه‌ن اوفیسیانتین کدرلی سئوگی حکایه‌سیندن بحث ائدیر.

اوفیسیانت ایمکانسیز بیر سئوگییه مبتلا اولوب. رستورانین گؤزو-ایشیغی، موشتریلرین باش تاجی موغننییه عاشیقدیر. موغننی ده اونون سئوگی‌سینی اله سالیر، اوفیسیانتا یوخاریدان آشاغی باخیر. بیر گون اوفیسیانت پولو اوغورلانان چاره‌سیز بیر یاپونو کوچه‌ده تاپیر، اونو ائوینه آپاریر، قوللوق گؤستریر. یاپون اوفیسیانتین عاشیق اولدوغو موغننینین دیواردان آسیلمیش شکیللرینی گؤرور، مسئله‌دن حالی اولور. یاپون اؤلکه‌سینه قاییدیر. بیر گون اوفیسیانتا بیر هدییه گؤندریر. اوفیسیانت چاش-باش قالیر: قوتونون ایچینده اونون سئودیی قادین. یاپون موغننینین روبوتونو دوزلدیب گؤندریبمیش. مکتوبدا دا بئله یازیب: «سن سئودییم یانیمدا اولسون، منه باخیب گولومسه‌سین، بسدی دئمیشدین. من ده سنه سئودیین قادینین روبوتونو گؤندردیم.»

بو فیلمی نیه خاطیرلادیم؟ بو یاخینلاردا عقللی سکس روبوتلارینین حاضرلانماسی باره‌ده خبرلر یاییلدی: «جینسی علاقه اوچون ایستیفاده ائدیله‌جک ایلک روبوتلارینی ساتیشا تقدیم ائد‌ن رئالدولل شیرکتی محصول حاقیندا بعضی دئتاللاری آچیقلاییب. تنظیملییجیلرده «عقللی»، «سادلؤوح»، «سکسوال»، «خوشرفتار» و «تواضع کار» کیمی واریانتلارین و بو واریانتلارین موختلیف درجه‌لرینین اولاجاغی بیلدیریلیب. بونونلا اویونجاغین «حس»لری تنظیم‌لنه‌جک. داورانیشلاری بو تنظیملییجیلرله تنظیملنن روبوتلار، صاحبلرینی سئوه ده بیله‌جکلر».

رکلاملارین تعبیرینجه دئسک، خیاللار گئرچک اولاجاق. بیر واختلار «سهیرلی خالات» فیلمینه ناغیل کیمی باخیردیق، سونرا تکنولوگییا ناغیلی رئاللیغا قوووشدوردو. ایندی ده «یاپون ایشی» فیلمی...

ماراقلی اولان بیلیرسینیز ندیر؟ بو روبوتلارین اینسانی سئومه‌سی. تکنولوگییا سئوگی دویمه‌سی یارادیب. سن یانینداکی روبوتلا محبت دونیاسینا سیاحت ائد‌جکسن.

تصور ائلیین، سیزی ترک ائدیب گئتمیش کؤهنه سئوگیلینیزین روبوتونو یارادیرسینیز. عینی آدام دوروب قارشینیزدا. سسی همین سس، باخیشی اؤگئی...

یا دا هان‌سیسا بیر مشهور قادینین روبوتونو. یقین ساغ اولمایانلار اولار. مثلاً، مرلین مونرو. قونشولار سیزی اونونلا قول-بویون گؤرسه چات وئریب چاتلایارلار.

بوردا بیر «اما» دا وار. بس بو روبوت خیانت ائد‌جکمی؟ بیر ده گؤردون روبوتون باشقا بیر کیشی ایله ال-اله توتوب گزیشیر. شیرکت سنه پولت وئریب. اونلاری اوزاقدان گؤرورسن، عصبیلشیرسن. پولتدا «الیم‌ده الینین ایستیسی قالیب» جمله‌سینی ایفاده ائد‌ن بیر دویمه اولمالیدیر. موطلق! بو یاپونلار گرک موسلمان و پاتریارخال جمعیتلری ده فیکیرلشسینلر. آخی روبوتون دا ناموسو وار. روبوتون دا آناسی، باجیسی وار. روبوت اؤز باشینا دئییل کی، گئدیب کیمله‌سه گزسین... عاییبدیر. گؤره‌ن دئمزمی، فیلانکه‌سین آلدیغی روبوت آیاغی سوروشکن چیخدی؟

مسئله نین معنوی طرفی وار. روبوت سنی سئوه‌جک، قایغینا قالاجاق، یاتاقدا سنه هزز وئره‌جک. اما دئیینمه‌یه‌جک. هانسی‌سا قیزا باخدیغین یئرده بیر شیلله ایلیشدیرمه‌یه‌جک اوزونه. غضبلنیب دده‌سی ائوینه گئتمه‌یه‌جک.

علاوه دویمه‌لر حاضرلاماق لازیمدیر و یقین کی، بو دا اولاجاق. ایسته‌یه‌نده روبوتون غضب‌لی اولاجاق، ایسته‌یه‌نده خوشرفتار. آرادا دالاشمالیدیر دا، قیسقانمالیدیر دا! بونسوز حیاتین نه لذتی؟ بیر گون گئجه ائوه ایچکیلی گلنده ترس چئوریلیب یاتمالیدیر. کوسولو قالمالیدیر. هردن یئرسیز اینجیمه‌لر اولمالیدیر. بس نه؟ قادینین روبوتونو دوزلتمکله دئییل ائ، گرک ایشی یاخشی گؤره‌سن.

ایش اوندادیر کی، کیشی روبوتلار دا دوزه‌له‌جک. بوردا دا بیر «اما» چیخیر اورتایا. سنین روبوتون باشقا بیر کیشی روبوتا قوشولوب قاچسا نئجه اولاجاق؟ شیرکت بونا گؤره مسئولیت داشییاجاقمی؟ بو روبوت باشقا روبوتو گؤروب سئوسه او بویدا کشف چؤکمزمی؟

تصور ائلیین، کیشی روبوتلارلا «رازبورکا» ائلییرسن. ماراقلی بیر منظره چیخار اورتایا. «سن منیم روبوتوما نیه باخدین؟»، «سنین روبوتون منه باخیردی»، «یاخشی روبوت باشقاسینین روبوتونا باخماز»...

ایلاهی نئیلییرسن، سن منه ائیله، ایلاهی بو روبوتلا ایشین اولماسین. بیردن پولتو کیمینسه الینه کئچر، تنظیملییجی‌سینی دییشرلر، گؤتوروب آپارارلار. سونرا کافلرین بیرینده بوشالمیش ایچکی شوشه‌لرینین آرخاسیندا سنی ترک ائد‌ن روبوت اوچون آغلایارسان.

کیشیلر بیر اولمور، آتام بالاسی. قورخاغی وار، ایگیدی وار... اما هر کیشینین اؤلندن سونرا قبرینین اوستونده آغلایاسی بیر قارا پالتارلی روبوتا احتیاجی وار. روبوتون گؤز یاشلاری... یاخشی بیر فیلم دئتالی...

هله بونون گئجه‌لر روبوتلا سئویشمیی وار...

تنها آداملارا روبوت گرک. اصلینده هر ائوه آغلی باشیندا بیر روبوت لازیمدیر. ائوی چکیب چئویرسین، یئمک بیشیرسین، پالتارلاری یوسون.

بلکه هامیمیز گئتدیکجه اوزاقلاشیریق بیر-بیریمیزدن؟ بلکه هامی تنها قالاجاق؟ بلکه بو روبوتلار اونا گؤره یارادیلیر کی، تنهالیغیمیزی اونوداق؟ سئومک ده تکنولوژی ایشه چئوریلدی. سنی بوندان سونرا اورکله دئییل، آپاراتلا سئوه‌جکلر. تنهاسانسا، هئچ کیم سنی سئومیرسه، چیرکینسنسه... – لاپ رکلام کیمی اولدو – بیر روبوت آل و خوشبخت اول. آرتیق خوشبختلیک اینسان حسی دئییل، تکنولوژی ایشدیر.

دونیامیزا خوش گلدینیز، روبوت سئوگیلیلر!

خوش گلدین، روبوت خوشبختلیک!